بۇل ماسەلەنى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا قازاقستان رەسپۋبليكاسى ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسىنىڭ مىندەتىن اتقارۋشى ەرجان ەرسايىنوۆ, «دارا» قورىنىڭ پرەزيدەنتى ءمادينا باكيەۆا, «بالا وتباسىندا ءومىر ءسۇرۋى ءتيىس» جق جەتەكشىسى شولپان بايبولوۆا, پسيحولوگ جانە بالا اسىراپ الۋشى ەلەنا گەندريكسون, بالا اسىراپ الۋشى مارات قابىلباەۆ تالقىلادى.
«بۇل ەلىمىز بويىنشا جالپى بالا سانىنىڭ 0,5 پايىزىن قۇرايدى. ونىڭ ىشىندە 21 مىڭ بالا قازاقستاندىق ازاماتتاردىڭ قامقورلىعىمەن اسىراپ الىنسا, 6 مىڭنان استامى جەتىم جانە اتا-اناسىنىڭ قامقورلىعىنسىز قالعان بالالارعا ارنالعان 140 مەكەمەدە تاربيەلەنىپ جاتىر» دەدى ەرجان ەرسايىنوۆ.
سونىمەن قاتار ول اتا-اناسىنىڭ قامقورلىعىنسىز قالعان بالالاردىڭ سانىن قىسقارتۋدىڭ وڭ وزگەرىستەرى بايقالاتىنىن باياندادى.
«ماسەلەن, 2014 جىلى ولاردىڭ سانى 6 مىڭنان اسسا, 2017 جىلدىڭ باسىندا بۇل كورسەتكىش 2 مىڭعا ازايعان. سوڭعى ەكى جىلدىڭ ىشىندە جەتىم بالالارعا ارنالعان مەكەمەلەردىڭ سانى 48-گە قىسقاردى (188-دەن 140 دەيىن). جانە دە 4 مىڭنان استام بالالار ءۇيىنىڭ تاربيەلەنۋشىلەرى اسىراپ الىندى, 1145 بالا قامقورلىققا الىندى جانە 1862 بالا ءوز تۋعان اتا-اناسىنا قايتارىلۋىنىڭ ارقاسىندا وتباسىن تاپتى. سونىمەن قاتار, سوڭعى 10 جىلدا اتالمىش مەكەمەلەردىڭ تاربيەلەنۋشىلەرىنىڭ جالپى كونتينگەنتى 10000 بالاعا (2007 جىلعى 1 746-دان 2017 جىلى 7236-عا دەيىن) ازايدى. جىل سايىن ەلىمىزدە 900-دەن استام ەرلى-زايىپتى اتا-انا قۇقىعىنان ايىرىلادى, 3 مىڭنان استام ءبۇلدىرشىن بالالار ۇيىنە تۇسەدى, 6 مىڭعا جۋىق بالا بەيىمدەلۋ ورتالىقتارىنا, اتا-اناسىنىڭ قامقورلىعىنسىز قالعان بالالاردىڭ 40 پايىزى ءبىلىم بەرۋ, دەنساۋلىق ساقتاۋ, الەۋمەتتىك دامۋ ورتالىقتارىنا ورنالاستىرىلادى. اسىراپ الۋدان باس تارتقاننان كەيىن بالانىڭ بالالار ۇيىنە قايتا ورالۋى سياقتى جاعدايلار دا ءجيى ورىن الادى», دەدى ەرجان ەرسايىنوۆ.
راۋان قايدار,
«ەگەمەن قازاقستان».
