تالاپتىڭ تۇلپارىن مىنگەن جاس تالانتتار قازىرگى تاڭدا قابىلەتتەرىن ۇشتاپ, ساحناداعى العاشقى قادامدارىن جاساپ ءجۇر. ولاردىڭ كورەرمەن كوزايىمىنا اينالار ساۋلەلى ساتتەرى ءالى الدا.
سەنبى كۇنى «استانا بالەت» تەاترىندا وسىناۋ وقۋ ورداسىنىڭ ايتۋلى مەرەكەسى – ستۋدەنتتەر قاتارىنا قابىلداۋ سالتاناتى ءوتتى. اكادەمياعا جاڭادان تۇسكەن جەتكىنشەكتەردىڭ جانارىندا قۋانىش وتى جارقىلداپ, بولاشاقتارىنا بەك سەنگەندىكتىڭ بەلگىلەرى بايقالادى. بالالارىنىڭ بەلىن بۋىپ, اق جول تىلەۋگە كەلگەن اتا-انالاردىڭ دا جارقىن جۇزدەرى بال-بۇل جانىپ تۇر.
سالتاناتتى راسىمگە قاتىسقان مادەنيەت جانە سپورت ءمينيسترى ارىستانبەك مۇحامەدي ۇلى پرەزيدەنتىمىزدىڭ سارابدال ساياساتى ارقاسىندا قازاقستاننىڭ ابىروي بەدەلى اسقاقتاپ, حالىقارالىق قوعامداستىق مويىندارلىق بيىك دەڭگەيگە كوتەرىلگەنىن, مادەنيەت سالاسىندا دا اسا ءىرى تابىستارعا جەتكەنىنە توقتالىپ, مەملەكەت باسشىسىنىڭ ونەردى وركەندەتۋگە ۇلكەن قامقورلىق جاساپ كەلە جاتقانىن اتاپ كورسەتتى. بۇگىنگى مەرەكە يەلەرىنىڭ سول ەڭبەكتى اقتايتىندارىنا سەنىم ءبىلدىردى.
ال اكادەميا رەكتورى, رەسەيدىڭ حالىق ءارتىسى التىناي اسىلمۇراتوۆا ۇلكەن تولقۋ ۇستىندەگى شاكىرتتەرىنە بىلايشا ءسات ساپار تىلەدى. «سەندەر ءۇشىن بۇل ەشقاشان ۇمىتىلماستاي ەرەكشە كۇن. بۇگىن كاسىبي ساحناعا العاش رەت اياق باساسىزدار. كوپ نارسەنى ۇيرەنۋلەرىڭىز كەرەك. ول ءۇشىن ءوز ىستەرىڭىزگە جان-تاندەرىڭىزبەن بەرىلگەندەرىڭىز ءجون. وقىپ-ۇيرەنۋدەن استە جالىقپاڭىزدار. ەڭبەك ەتە بىلىڭىزدەر. بىردە-ءبىر كۇندەرىڭىزدى بوسقا وتكىزبەۋگە تىرىسىڭىزدار. قالاعان ماماندىقتارىڭىزعا ادال بولىڭىزدار. سوندا بالەتتىڭ سيقىرلى الەمى ەسىگىن ايقارا اشادى. ولاي بولسا, ونەردەگى ساپارلارىڭىزعا ساتتىلىك تىلەيمىن», دەدى التىناي ابدۋاحيمقىزى اعىنان جارىلىپ.
شات-شادىمان قىزىققا تولى شارانىڭ سوڭى اكادەميا وقۋشىلارى مەن ستۋدەنتتەرىنىڭ كۇشىمەن دايىندالعان كونتسەرتتىك باعدارلاماعا ۇلاستى.
تالعات باتىرحان,
«ەگەمەن قازاقستان»
