فوتو: «قازاقفيلم» كينوستۋدياسى
فيلمدە جۇرتشىلىقتى ءوزىنىڭ قارا كۇشىمەن عانا ەمەس, كومپوزيتورلىعىمەن دە ءتانتى ەتكەن بالۋان شولاق تۋرالى باياندالادى. بۇل – رەجيسسەر نۇرگەلدى سادىعۇلوۆتىڭ كوركەم فيلمدەگى تىرناقالدى تۋىندىسى. كينوستسەناري جازۋشى, دراماتۋرگ دۋلات يسابەكوۆتىڭ م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ساحنالانعان «جاۋجۇرەك» پەساسىنىڭ جەلىسى بويىنشا جازىلعان. رەجيسسەر بىزگە ءفيلمنىڭ وندىرىستە ءجۇرىپ جاتقان مونتاجداۋ كەزەڭى مەن ءتۇسىرىلىم جۇمىستارى اياسىندا اتقارىلعان شارۋا جايىن بايانداپ بەردى. رەجيسسەر ءفيلمنىڭ ءتۇسىرىلىم جۇمىستارىنا تىڭعىلىقتى دايىندىقپەن كەلگەنىن ايتادى.
– بۇل – بالۋان شولاق جايلى العاش رەت ءتۇسىرىلىپ وتىرعان تولىقمەتراجدى فيلم. بالۋاننىڭ ۇرپاقتارىمەن سويلەسە وتىرىپ, زەرتتەۋ جۇمىستارىن جۇرگىزدىك, – دەگەن رەجيسسەر ءفيلمنىڭ اسىرەسە جاستار ءۇشىن تاربيەلىك, تاعىلىمدىق ءمانى زور ەكەنىن ايتادى.
2016 جىلى جەلتوقسان ايىندا باستالعان ءتۇسىرىلىم جۇمىستارى الماتى وبلىسى, پاۆلودار قالاسى جانە بۋرابايدا وتكەن. الماتى وبلىسى كەگەن جانە جالاڭاش اۋىلدارىندا ءفيلمنىڭ نەگىزگى بولىگى تۇسىرىلگەن. كوپشىلىك ساحنالارعا 500-گە جۋىق ادام قاتىسقان. رەجيسسەردىڭ ايتۋى بويىنشا فيلمدە كومپيۋتەرلىك گرافيكا كوپ جاسالادى.
«وسى كۇزدە تۇسىرەتىن ءبىر ساحنا قالدى, ءتۇسىرىلىم جۇمىستارىنا تولىق 7 اي ۋاقىت كەتتى. قىزىلجار جارمەڭكەسىن ساحنالاۋ ءۇشىن كوپتەگەن تاريحي دەرەكتەردى جيناستىردىق. پاۆلودارداعى ولكەتانۋ مۋزەيىنەن تىڭ مالىمەتتەر تابىلدى. مىسالى, تاۋارلار كەرۋەنمەن عانا ەمەس, سۋ جولدارىمەن دە تاسىمالدانعان ەكەن», دەيدى رەجيسسەر.
رەجيسسەر بالۋان شولاق تاقىرىبىنا بالا كەزدەن ىنتىق بولىپ وسكەن. ويتكەنى نۇرگەلدىنىڭ ءوزى دە كەزىندە كۇرەسكە بەلسەنە قاتىسقان.
«شۋ اۋدانى, تولەبي اۋىلىنداعى شاعىن مۇراجايدىڭ الدىندا بالۋان شولاق كوتەرگەن دەگەن اۋىر تاس جاتاتىن. ءار جارىسقا كەتەر كەزدە اتامىزدىكىندەي كۇش بولسىن دەپ جارىسقا ىرىمداپ اتتاناتىنبىز. كەيىن «جاۋجۇرەك» سپەكتاكلىن كورگەننەن كەيىن, دۋلات اعامىزعا ۇسىنىس تاستادىم. ول كىسىنىڭ قولداۋىمەن 2012 جىلدان بەرى كينو تۇسىرۋگە قامدانا باستادىق», دەيدى.
ءفيلمنىڭ قويۋشى-سۋرەتشىسى ەرجان سۇلەيمەنوۆتىڭ ايتۋى بويىنشا دەكوراتسيالاردى ەكى ايدىڭ ىشىندە تۇرعىزعان. كەيىپكەر بەينەسىن ۇستەمەلەي وتىرىپ قوعام سيپاتىن كورسەتۋگە, شىعارماعا ۇلتتىق سيپات بەرۋگە باس نازار اۋدارىلعان. سۋرەتشىلەر دەپارتامەنتى جارمەڭكەنى ارحيۆ ماتەريالدارى مەن سۋرەتتەر نەگىزىندە جاساپ شىققان. باس كەيىپكەرلەر – بالۋان شولاق, عاليا, بالقاديشا جانە تاتيانانىڭ كيىمدەرى كوستيۋم جونىندەگى سۋرەتشى مەرۋەرت تورىباەۆانىڭ ەسكيزدەرى بويىنشا تىگىلگەن. مىسالى, بالۋاننىڭ اناسىنىڭ وبرازى ءۇشىن 30-دان استام كوستيۋم ەسكيزى جاسالعانىن ايتۋعا بولادى.
رەجيسسەردىڭ سوزىنشە, ءفيلمنىڭ باس كەيىپكەرى – بالۋان شولاقتىڭ رولىنە اكتەردى كوپ ىزدەگەن. كاستينگكە كاسىبي اكتەرلەرمەن قاتار سپورتشىلار دا قاتىسقان. ءبىرىنىڭ دەنە تۇرقى سايكەس كەلمەسە, ەندى ءبىرىنىڭ وبراز جاساۋدا شەبەرلىگى جەتپەگەن. قاتاڭ ىرىكتەۋدەن سوڭ بالۋان شولاقتىڭ رولىنە اكتەر ەركەبۇلان دايىروۆ بەكىتىلگەن. بالۋاننىڭ وبرازىنا سايكەس كەلۋى ءۇشىن اكتەر كۇرەستەن ءدارىس الىپ, 15 كيلوگرامم سالماق قوسقان. فيلمگە ەركەبۇلان دايىروۆپەن بىرگە ەلىمىزدىڭ تانىمال اكتەرى بولات ءابدىلمانوۆ پەن جاس اكتريسا جانەل ماقاجان تۇسەدى.
فيلم 2018 جىلدىڭ كوكتەمىندە جالپى پروكاتقا شىعادى دەپ جوسپارلانىپ وتىر.
ايا ءومىرتاي,
«ەگەمەن قازاقستان»
