بارىنەن بۇرىن ماجىلىستە «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ بىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋ وتكىزىلىپ, حالىققا ناقتى ۇسىنىسپەن شىعۋى ۇنادى. ەندىگى اڭگىمە وسى توڭىرەكتە بولۋى كەرەك دەپ ويلايمىن.
جەتىنشى سىنىپتا وقىپ ءجۇرىپ, كانيكۋلعا شىققانىمدا وقيتىن باسقا ەشتەڭەنىڭ رەتى بولماي قولىما وتىزىنشى-قىرقىنشى جىلدار ارالىعىندا لاتىن الىپبيىمەن باسىلعان كىتاپ ءتۇستى. قوي باعۋعا شىققانىمدا ورىستە ات ۇستىندە وتىرىپ, كەيدە قىر توسكەيىندە جانتايىپ جاتىپ, الگى كىتاپتى ەجىكتەپ وقي باستادىم. اقىرى ۇيرەنىپ كەتىپ, سۋدىراتىپ وقيتىن دارەجەگە جەتتىم. دەمەك زەيىنىن سالعان ادام لاتىن الىپبيىندە جازىپ, وقۋعا شاپشاڭ جاتتىعىپ كەتەدى دەپ ويلايمىن.
اتىراۋ وبلىستىق مەملەكەتتىك ارحيۆىندە ساقتالعان نەمىس باسقىنشىلارىمەن بولعان سوعىستىڭ اياقتالار تۇسىندا قازا تاپقان كەڭەس وداعىنىڭ باتىرى مۇسا بايمۇقانوۆتىڭ جەكە ىسىندەگى ونىڭ لاتىن ارپىمەن ءوز قولىمەن جازعان ءومىربايانىن كورىپ, كوشىرمەسىن ءتۇسىرىپ الدىم. كالليگرافياسىنىڭ وتە ادەمىلىگى جانە ساۋاتتىلىعى ءتانتى ەتتى. بۇعان قاراعاندا, كوكەيىمدە بۇگىنگى جانە كەلەر ۇرپاق تا, ءتىپتى جاسىمىز جەتپىستەن اسىپ ساقا تارتقان ءبىز دە بارا-بارا وسىلاي توگىلتە جازىپ كەتەرىمىز حاق دەگەن ءۇمىت ۇيالادى.
پارلامەنتتىك تىڭداۋدا ۇسىنىلعان قازاق/لاتىن ءالىپبيىنىڭ 25 تاڭباسىن كورگەنىمدە اعىلشىن/لاتىن گرافيكاسىندا بار, كلاۆياتۋرادا تۇرعان X ءارپى نەگە جوق, ونىڭ ورنىن قانداي تاڭبا باسادى دەپ باس قاتىرۋىما تۋرا كەلدى. بۇل جايتقا مەن سويلەسىپ, ءوزارا پىكىرلەسكەن باسقالار دا الاڭداماي قالماپتى. ويىمىزدى وقىپ قويعانداي بولعان قوعام قايراتكەرى, فيلولوگيا عىلىمدارىنىڭ دوكتورى, پروفەسسور ءادىل احمەتوۆ ءوزىنىڭ «ەگەمەن قازاقستان» گازەتىنىڭ تاياۋداعى 26 قىركۇيەك كۇنگى سانىندا جاريالانعان «لاتىن گرافيكاسى مەن اعىلشىن ءتىلىنىڭ الەم وركەنيەتىندەگى ورنى» دەگەن ماقالاسىندا X تاڭباسىن ەسەپتەن شىعارىپ تاستاعاندارىمەن كەلىسپەيتىندىگىن اشىق ايتىپ, ولاي دەۋىنىڭ سەبەپتەرىن العا تارتىپتى. وتە ورىندى-اق.
ول قالاي دەگەندە دە كەرەك تاڭبا. پارلامەنتتىك تىڭداۋدا لاتىنشا Hh تاڭباسىن كيريلشە قوسارلانعان حح/ھھ تاڭبالارى اۋىستىرادى دەپ ۇسىنۋى ۇيلەسىڭكىرەمەيدى. ەكەۋىنىڭ سوڭعىسىن سول ورنىندا قالدىرىپ, قازاق/لاتىن الىپبيىنە 26-شى ءارىپ ەتىپ X-نى كىرگىزگەن دۇرىس دەپ ەسەپتەيمىن. سونداي-اق تىڭداۋدا ۇسىنىلعان لاتىنشا C تاڭباسى (ول كيريلشە تس ءارپىن ايىرباستايدى دەلىنىپتى) ءوز ورنىندا تۇرماي تۇرعان جوق پا دەگەن كۇدىك بار. سەبەبى, بۇرىن تسەنتركرەديت دەگەن ءسوز لاتىنشا بانك ماڭدايشالارىندا CenterCredit دەپ جازىلىپ ءجۇردى ەمەس پە؟ سوندا لاتىنشا C كيريلشە قايسىسىنا تيەسىلى, تس-عا ما, ك-گە مە؟ بىرەۋىن تاڭداۋ قاجەت ءتارىزدى. ارينە, بۇل ءوز ۇسىنىستارىم عانا. ماماندار, كوپشىلىك تالقىلاۋى نە دەيدى, وعان قۇلاق اسپاي بولمايدى.
تولەگەن جاڭاباي ۇلى,
قازاقستاننىڭ
قۇرمەتتى ءجۋرناليسى
اتىراۋ
