بيىل دا مۇنايلى مەكەننىڭ مەيرامى ەرەكشە شارالارعا تولى. وتكەن سەنبىدە 500-دەن استام اتىراۋلىق ۆەلوشەرۋگە قاتىستى. توعىز شاقىرىم جولدى ءجۇرىپ وتكەن ۆەلوسيپەدشىلەر اراسىندا التىداعى بالادان الپىستاعى قارياعا دەيىن بار. سالاماتتى ءومىر سالتىن ناسيحاتتاپ, بۇقارالىق سپورتتى دامىتۋعا باعىتتالعان شاراعا وبلىس اكىمى نۇرلان نوعاەۆتان باستاپ ايماق تۇرعىندارى بەلسەندى قاتىستى. «بۇل وتە جاقسى ءۇردىس, - دەدى ايماق باسشىسى. –قالا كۇنىنە وراي مادەني-كوپشىلىك, سپورتتىق شارالار جوسپارلاندى. وسىنداي اكتسيالارعا وبلىس تۇرعىندارىنىڭ نەمقۇرايلى قارامايتىنى قۋانتادى».
جارىس الاڭى اتىراۋ قالاسىنىڭ ورتالىق كوشەسىنەن باستالىپ, توعىز شاقىرىمعا سوزىلدى. ۆەلوشەرۋدە ۇزدىك ناتيجەلەرىمەن كورىنگەن قاتىسۋشىلارعا ارنايى اتالىمدار بويىنشا سىيلىقتار تابىستالدى.
قالا كۇنى اياسىندا «سۇلۋلىق الەمدى قۇتقارادى» اتتى حالىقارالىق سۋرەتشىلەر سيمپوزيۋمىمەن باستالاتىن شارالار لەگى «جاس دارىن» بايقاۋى, شاحماتتان اشىق تۋرنير, مۇمكىندىگى شەكتەۋلى جاندار اراسىندا قالالىق فەستيۆال, ازىق-ت ۇلىك ونىمدەرىنىڭ جارمەڭكەسى, جاستار تەاترىنىڭ قويىلىمى, قازىرگى زامانعى كوشە بيلەرى بايقاۋى, مۋزەي ءتۇنى, مارافون, دزيۋدودان, بايداركا مەن كانوە ەسۋدەن تۋرنير بولىپ جالعاسادى. ال 14 قازاندا وبلىس ورتالىعىندا «رەترو» ساياباق جانە «دوس-مۇقاسان» كىشى ساۋلەت نىسانى اشىلادى. وعان اتى اڭىزعا اينالعان توپ ارنايى كەلىپ قاتىسادى.
باقىتگۇل باباش,
«ەگەمەن قازاقستان».
اتىراۋ.
سۋرەتتى تۇسىرگەن ەرلان التىباەۆ.
