ولاردىڭ ەڭبەكاقىسى قازاقستاندىقتارمەن سالىستىرعاندا ءبىرشاما جوعارى بولىپ, وسىعان بايلانىستى نارازىلىقتار اراكىدىك بولسا دا بوي كورسەتىپ قالادى. سوندا دەيمىز-اۋ, ىشكى نارىقتاعى جۇمىس كۇشىن رەتتەۋگە, جۇمىسشى ماماندارمەن جەتكىلىكتى قامتاماسىز ەتۋگە ەلىمىزدىڭ مۇمكىندىگى جەتپەي وتىرعانى ما؟ جوق الدە الىپ قۇرىلىستاردى سالۋعا قازاقستاندىقتاردىڭ شاما-شارقى مەن ءبىلىم-تاجىريبەسى جەتپەي مە؟ وسى جاعدايدى جاقسارتۋ ءۇشىن قانداي ءىس-شارالاردى قولعا العان ءجون؟ وسى جونىندە وي بولىسسەك.
ەملەكەت باسشىسى قاراپايىم ەڭبەك ادامدارىن اسقاقتاتىپ, ولاردى ۇلگى ەتىپ, جۇمىسشى ماماندىقتارىنا جاس-تاردى كوبىرەك تارتۋ كەرەكتىگىن ۇدايى ايتىپ كەلەدى. جاسىرىپ كەرەگى نە, قارا جۇمىسقا ارالاسۋعا ارلاناتىندار دا, نامىستاناتىندار دا بار. مەكتەپ ءبىتىرىپ جاتقان تۇلەكتەردىڭ كوبى ۋاقىت وزدىرماي جوعارى وقۋ ورنىنا ءتۇسىپ, جىلى كابينەت پەن كرەسلوعا جايعاسا قالاتىن جايلى جۇمىسقا تۇرۋدى قوش كورەدى. اتا-انالارىنىڭ دا ويلايتىنى وسى. البەتتە جاستاردىڭ ەڭبەك جولىنىڭ داڭعىل بولىپ, ۇلكەن ماماندىق يەسى اتانۋىنا ەشكىم دە قارسى ەمەس. جولدارى اشىق بولسىن. بىراق سول جوعارى وقۋ ورنىن ءبىتىرىپ, قولىنا تاباقتاي ديپلوم تيگەن مامانداردىڭ بارلىعىنا بىردەي كوڭىلى قالايتىنداي جۇمىس تابىلا قويار ما, ءسىرا؟
قازىر, جاسىرىپ كەرەگى نە, ەڭبەك نارىعىندا جوعارى وقۋ ورىندارىن بىتىرگەندەرمەن سالىستىرعاندا, جۇمىسشى ماماندىقتارىنا سۇرانىس وتە جوعارى. مۇنى ساناۋلى جىلداردان سوڭ ەڭبەككە ارالاساتىن بۇگىنگى مەكتەپ وقۋشىلارى دا جاقسى بىلەدى. ولاردىڭ اراسىندا «قازىرگى ۋاقىتتا قازاقستاندا قانداي ماماندىق مارتەبەلى دەپ ويلايسىڭدار؟» دەگەن ساۋالناما جۇرگىزىلگەن كەزدە كوبى باسا كورسەتكەن ماماندىقتار: اسپاز, كولىك جوندەۋ شەبەرى, ءساندى شاش ۇلگىسىن جاسايتىن شاشتاراز, داياشى, ەلەكتر مەحانيگى. راس, بۇل ءبىر عانا قالانىڭ جوعارى سىنىپ وقۋشىلارى اراسىندا جۇرگىزىلگەن سا-ۋالناما قورىتىندىسى. مۇمكىن قازاقستاننىڭ باسقا وڭىرلەرىندە مەكتەپ پارتاسىندا وتىرعان وقۋشىلار جوعارىدا كەلتىرىلگەن ماماندىقتاردان باسقا دا كاسىپتەردى اتايتىن بولار. بىراق وسى ساۋالناماعا قاراعاندا, ۇلكەن قۇرىلىس پەن ءوندىرىس ورىندارىنداعى ماماندىقتاردى مارتەبەلى سانايتىن جاستار از. ونىڭ سىرى نەدە؟ ولارعا قاجەتتى اقپاراتتىڭ جەتپەي جاتقاندىعىنان با, جوق الدە اۋىر قارا جۇمىستى قالامايتىندىعىنان با؟ الدە مەكتەپ بىتىرگەلى وتىرعان تۇلەكتەرگە جۇمىسشى ماماندىقتارىنا بايلانىستى باعىت-باعدار, كەرەكتى كەڭەس بەرە الماي وتىرمىز با؟ جالپى, اۋقىمدى قۇرىلىس پەن ءوندىرىس سالاسىنداعى ماماندىقتاردى ماقتانىش ساناپ, وسى ماقسات-مۇراتقا ۇمتىلاتىن جاستار قاتارىنىڭ سيرەك بولۋىنىڭ سەبەبى نە؟ وسىنى ءتيىستى ماماندار سارالاپ, زەرتتەپ كورسە ارتىق بولماس ەدى. ماسەلەن, استانادا ءدال قازىرگى ساتتە ساراپشىلاردىڭ تۇجىرىمىنا قاراعاندا, تاس قالاۋشىلار جانە ەلەكترمەن دانەكەرلەۋشىلەرگە, اسپالى كران ماشينيستەرى مەن سىلاقشى-سىرشىلارعا, اۆتوكولىك سلەسارلارى مەن سانتەحنيكتەرگە, مەدبيكەلەر مەن بايلانىس وپەراتورلارىنا جانە باسقا دا جۇمىسشى ماماندىقتارىنا سۇرانىس وتە جوعارى. وسى سالالارعا بايلانىستى بىلىكتى مامانداردى وتە قاجەتسىنىپ وتىر. ءتىپتى قالا بيلىگى قاجەتتى ماماندىقتارعا مەملەكەتتىك تاپسىرىس بويىنشا وقىتۋدى بيىل مىقتاپ قولعا الدى.
لوردانىڭ ەڭبەك نارىعىن ساراپتاي كەلىپ, 2017-2021 وقۋ جىلدارىندا استانالىق كوللەدجدەرگە بەرىلگەن مەملەكەتتىك تاپسىرىس 3207 ورىن. ەگەر قاجەتتى جۇمىسشى ماماندىقتارىنا سۇرانىس ارتاتىن بولسا, بۇل كورسەتكىش جوعارىلاۋى ابدەن مۇمكىن. كەرەك دەسەڭىز, استانا كوللەدجدەرىندە بۇعان دەيىن دايارلانباعان جاڭا ماماندىقتار اشىلا باستادى. بيىلدىڭ وزىندە وسىنداي 6 ماماندىققا تالاپكەرلەر قابىلدانعان. ونىڭ ىشىندە «كوپىر جانە كولىك توننەلدەرى», «وندىرىستەگى ەلەكترمەحانيكالىق قۇرال-جابدىقتار», «مەديتسينا تەحنيكالارىن مونتاجداۋ, تەحنيكالىق قىزمەت كورسەتۋ جانە جوندەۋ» ماماندارى باس قالادا بۇگىنگى كۇنى ەڭ قاجەت بولىپ وتىر. الداعى ۋاقىتتا دا وسى باعىتتاعى جۇمىس جالعاسا بەرەتىن ءتۇرى بار.
بارلىعى دا ەڭبەك نارىعىنا بايلانىستى. سونى ساراپتاۋ ارقىلى قانداي كاسىپ تۇرلەرىنە قاجەتتىلىك بار, كوللەدجدەر سوعان قاراي بەيىمدەلىپ, جاڭا ماماندىقتار بويىنشا كادرلاردى دايارلايتىن بولادى.
ەڭ قۇپتارلىق جانە جۇرتشىلىق ءۇشىن جاعىمدى جاڭالىق – جاڭادان قولعا الىنعان «جالپىعا بىردەي تەگىن كاسىپتىك-تەحنيكالىق ءبىلىم بەرۋ» مەملەكەتتىك جوباسى.
وسىنىڭ اياسىندا تابىسى از وتباسىلاردىڭ بالالارىنا جانە ارناۋلى ينتەرناتتاردىڭ تاربيەلەنۋشىلەرىنە, اتا-انانىڭ قامقورلىعىنسىز قالعاندار مەن جەتىمدەرگە, بالا جاسىنان مۇمكىندىگى شەكتەۋلى مۇگەدەك بالالارعا ايرىقشا جاعداي جاسالماق. سونىمەن بىرگە بۇل جوبا مەملەكەت تاراپىنان تەگىن كاسىپتىك-تەحنيكالىق ءبىلىم الۋدى نيەت ەتكەن بارلىق جىگىتتەر مەن قىزدار ءۇشىن ۇلكەن مۇمكىندىك. ولار ەڭ باستىسى, ەرتەڭگى كۇنى جۇمىسشى ماماندىقتارىن يگەرگەنىن ماقتانىش ەتەتىن بولۋى ءتيىس. سوندا عانا ماماندىقتىڭ مارتەبەسى ارتادى.
