جيىن بارىسىندا جازۋشىنىڭ تۇرىك تىلىندە شىققان "قارالى كوش" رومانى مەن "جۇرەك نەگە جىلايدى" اتتى اڭگىمەلەر جيناعىنىڭ تانىستىرىلىمى بولدى. سونداي-اق كەزدەسۋ اياسىندا قالامگەردىڭ ءومىرى مەن شىعارماشىلىعى جانە قوعامداعى ءرولى جايىندا اڭگىمەلەر قوزعالدى.
سالتاناتتى ءىس-شاراعا بەلگىلى جازۋشىلار مەن ادەبيەتشىلەر, ونەر ادامدارى, سونىمەن قاتار جازۋشىنىڭ شاكىرتتەرى مەن ءىزباسارلارى, سونىمەن قاتار جازۋشى-جىرشى بايانعالي ءالىمجانوۆ, جازۋشى-دراماتۋرگ روزا مۇقانوۆا, بەلگىلى تۇركولوگ, فيلولوگيا عىلىمدارىنىڭ دوكتورى قارجاۋباي سارتقوجا ۇلى, اقىن ەربول بەيىلحان مەن تانىمال جۋرناليست بەكەن قايرات ۇلى قاتىستى.
ءجادي شاكەن ۇلى - جازۋشى, قازاقستان جازۋشىلار وداعى مەن ەۋرازيا جازۋشىلار وداعىنىڭ مۇشەسى, حالىقارالىق شىڭعىس حان اكادەمياسىنىڭ اكادەميگى. 1967 جىلى 5 مامىردا قىتايعا قاراستى التاي ايماعىندا ەرتىس وزەنى جاعاسىنداعى شىرىكشي اۋىلىندا دۇنيەگە كەلگەن. 1985 جىلى التاي ايماقتىق پەداگوگيكا مەكتەبىن, 1991 جىلى شىڭجاڭ وقۋ-اعارتۋ ينستيتۋتىن, تاريح ماماندىعى بويىنشا 2001 جىلى اباي اتىنداعى الماتى مەملەكەتتىك ۋنيۆەرسيتەتىنىڭ اسپيرانتۋرا ءبولىمىن تامامداعان.
