بريفينگ بارىسىندا ز.باليەۆا قازاقستاندا بالا قۇقىقتارى جونىندەگى ۋاكىل ينستيتۋتى قۇرىلعاننان بەرى بالالار مەن جاستاردىڭ قۇقىقتارىن قورعاۋ سالاسىندا كوپتەگەن يگى ىستەر اتقارىلىپ, بىرقاتار الەۋمەتتىك ماڭىزدى جوبالار ىسكە اسىرىلعانىن اتاپ ءوتتى.
«سونىڭ ءبىرى – بالا قۇقىقتارى جونىندەگى ۋاكىل جانىنان اشىلعان قازاقستان بالالارى مەن جاستارىنا ارنالعان ۇلتتىق سەنىم تەلەفونى بولاتىن. بۇگىنگى جيىندا مۇنداي سەنىم تەلەفونى تەك بالالار مەن جاستارعا عانا ەمەس, قازىرگى قوعام وكىلدەرىنىڭ بارلىعىنا قاجەت ەكەنىن جەتكىزگىمىز كەلەدى. ءبىز بۇل پىكىرىمىزدى كەلىپ تۇسكەن قوڭىراۋلار كورسەتكىشىنىڭ ناتيجەسىنە سايكەس ايتىپ وتىرمىز», – دەدى ز.باليەۆا.
قازاقستاندا سەنىم تەلەفونى وتكەن جىلدىڭ قاراشا ايىنان بەرى قىزمەت اتقارا باستاعان بولاتىن. بۇگىنگى كۇنگە دەيىن جەدەل جەلىگە 2 ميلليونعا جۋىق قوڭىراۋ شالىنعان. سونىڭ ىشىندە بيىلعى 8 ايدا 1 ملن 376 مىڭ قوڭىراۋ قابىلدانعان بولسا, ونىڭ اياسىندا
5 مىڭ بالا مەن جاستار وكىلدەرىنە جەدەل كومەك كورسەتىلگەن. اتاپ ايتقاندا, 1 737 ءوتىنىش بويىنشا پسيحولوگيالىق جانە زاڭگەرلىك كومەك كورسەتىلىپتى.
تۇتاستاي العاندا, سەنىم تەلەفونى ارقىلى ءوتىنىش بىلدىرگەندەردىڭ باسىم بولىگى كامەلەت جاسقا تولماعان جاسوسپىرىمدەر. ماماندار ۇسىنعان دەرەكتەرگە سۇيەنسەك, جەدەل جەلى ىسكە قوسىلعالى 103 سۋيتسيد جاعدايىنىڭ جولى كەسىلىپ, بالالارعا قاتىگەزدىك جاساۋدىڭ 42 وقيعاسىنا توقتاۋ سالىنعان. سونىمەن بىرگە, ەرەسەكتەر تاراپىنان سەكسۋالدىق زورلىق-زومبىلىققا ۇشىراعان 7 بالاعا پسيحولوگيالىق قولداۋ كورسەتىلگەن.
جالپى, تاۋلىك بويى قىزمەت كورسەتەتىن «111» تەلەفونى ارقىلى اقپاراتتىق كەڭەس, پسيحولوگيالىق جانە زاڭگەرلىك كومەك الۋمەن قاتار, بالا قۇقىقتارىنىڭ بۇزىلۋ فاكتىلەرى تۋرالى دا شۇعىل حابارلاۋعا بولادى.
تاعى ءبىر ايتا كەتەرلىك جايت, «111» شۇعىل قىزمەتىنىڭ جەتەكشىسى ءارى ۇيىمداستىرۋشىسى ىسقاق قۇلاتايدىڭ مالىمدەۋىنشە, باستاپقىدا بالالاردى قانداي دا ءبىر قاۋىپ-قاتەردەن قورعاي وتىرىپ, ولارعا تەلەفون ارقىلى قول ۇشىن سوزىپ, كومەكتەسۋگە باعىتتالعان بۇل جەلىگە حابارلاسۋشىلاردىڭ باسىم بولىگى ەرەسەكتەر قاۋىمى بولعاندىقتان, كونسۋلتاتسيالىق قىزمەت اۋقىمىن مەيلىنشە كەڭەيتۋگە تۋرا كەلگەن. سول سەبەپتى, جەلىدە جاۋاپ بەرەتىن مامانداردىڭ سانى كوبەيتىلىپ, ساپاسىن بارىنشا جاقسارتۋ ماسەلەسى قاراستىرىلىپ جاتىر.
نۇرلىبەك دوسىباي,
«ەگەمەن قازاقستان»
