بۇل تۋرالى بۇگىن وقو وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا «وڭتۇستىك» ايماقتىق ينۆەستيتسيالىق ورتالىعىنىڭ باسقارما توراعاسى قۋانىش بايتورە مالىمدەدى.
ونىڭ مالىمەتى بويىنشا, قارجىلاندىرعان جوبالار سانى وتكەن جىلدىڭ ءتيىستى كەزەڭىمەن سالىستىرعاندا 43,5 پايىزعا ارتقان. ال قارجىلاندىرۋ سوماسى 20,5 پايىزعا كوبەيىپ وتىر. ال, 2017 جىلى قارجىلاندىرىلعان ەڭ كوپ جوبا ماقتارال اۋدانى بولىپ وتىر. ياعني, 1 ملرد. تەڭگەدەن استام سومانى قۇرايتىن 443 جوبا قارجىلاي قولداۋ تاپقان.
«2009 - 2017 جىلدار ارالىعىندا قارجىلاندىرىلعان جوبالار كەلەسى باسىم باعىتتار اياسىندا جۇزەگە اسىرىلدى. اتاپ ايتساق, يندۋستريالاندىرۋ كارتاسىنا ەنگەن 36 جوبانى سوماسى 7 697,2 ملن. تەڭگەگە قارجىلاندىرسا, مال شارۋاشىلىعى باعىتىندا 22 957,3 ملن. تەڭگەگە 10 186 جوبانى, دالا جۇمىستارى بويىنشا 6 075,9 ملن. تەڭگەگە 5 098 جوبانى, ال, اۋىل شارۋاشىلىق ونىمدەرىن قايتا وڭدەۋگە 1 559,2 ملن. تەڭگەگە 55 جوبا سىندى تاعى دا باسقا ءتۇرلى باعىتتار قارجىلاندىرىلعان», - دەدى قۋانىش بايتورە.
بۇگىندە «وڭتۇستىك» ايو-نىڭ نەسيە قورجىنى 12 665 ملن. تەڭگەگە ال, «ىرىس» مقۇ نەسيە قورجىنىنىڭ كولەمى 10 664,0 ملن. تەڭگەنى قۇراپ وتىر. ينۆەستيتسيالىق ورتالىقپەن قارجىلاندىرىلعان جوبالاردىڭ 34 پايىزى وندىرىستىك باعىتتا بولسا, ميكرو قارجى ۇيىمىنىڭ نەسيە قورجىنىنىڭ 65 پايىزى مال شارۋاشىلىعىنا باعىتتالعان.
