كورمەگە كەلۋشىلەر نازارعا ۇسىنىلعان وتكەن عاسىرداعى لاتىن ارپىمەن باسىلعان قۇجاتتار, گازەتتەر مەن جۋرنالداردى ۇلكەن قىزىعۋشىلىقپەن تاماشالادى. بۇدان بولەك «رۋحاني جاڭعىرۋ» جوباسىنا دا ارنايى ورىن بەرىلدى. شارا شىمىلدىعى وبلىستىق ارحيۆ قىزمەتكەرى جازيرا اكىجانوۆانىڭ بايانداماسىمەن اشىلدى. «بولاشاق» اكادەمياسىنىڭ وقىتۋشى-پروفەسسورلىق قۇرامى ستۋدەنتتەرگە قازاق ءتىلىنىڭ لاتىن الىپبيىنە كوشىرۋ جوباسىن بارىنشا كەڭ كولەمدە ناسيحاتتاپ كەلەدى. قازىر لاتىن گرافيكاسىنا قاتىستى تاريحي دەرەكتەردى مازمۇندى ءتۇسىندىرىپ, قازاق جازۋى لاتىن قارپىنە وتپەيتىندىگىن, كەرىسىنشە قايتا ورالاتىندىعىن اتاپ كەتكەن ءجون. ويتكەنى قازاقستاندا لاتىن گرافيكاسىن قولدانۋ تاجىريبەسى بۇرىننان بار. 1929 جىلى قازاق زييالىلارى لاتىن گرافيكاسىن قابىلداپ, مەملەكەتتىك ءىس قاعازداردى وسى ءالىپبيدىڭ كومەگىمەن جازعان بولاتىن.
تاريحىمىزداعى لاتىن گرافيكاسىن قولدانعان كەزەڭ تۋرالى تولىققاندى اقپارات بەرۋ ماقساتىنداعى وتكىزىلگەن كورمە كوپشىلىكتىڭ كوڭىلىنەن شىقتى.
اتالمىش ءىس-شارادا «بولاشاق» اكادەمياسىنىڭ پروفەسسورى قۇرمانعازى سەمبيەۆ قازاق جازۋىنىڭ تاريحىنا توقتالىپ, لاتىن گرافيكاسىنا كوشۋ زامان تالابى ەكەنىن ناقتى دەرەكتەرمەن باياندادى. اكادەميانىڭ پروفەسسورى, زاڭ عىلىمدارىنىڭ كانديداتى, جوعارى وقۋ ورىندارىنان كەيىنگى ءبىلىم بەرۋ ءبولىمىنىڭ باستىعى ەلەۋجان سەرىموۆ قازاق تاريحىنداعى لاتىن ءالىپبيىنىڭ دامۋ كەزەڭدەرى, «رۋحاني جاڭعىرۋ» ماسەلەلەرى بويىنشا تۇجىرىمدى پىكىر ءبىلدىردى.
كورمەدە «بولاشاق» اكادەمياسى كىتاپحاناسىنىڭ قورىنداعى «رۋحاني جاڭعىرۋ» باعدارلاماسى مەن لاتىن گرافيكاسىنا قاتىستى ماتەريالدار, وبلىستىق ارحيۆ قورىنداعى وتكەن عاسىردىڭ 20-30 جىلدارىنداعى قۇجاتتار, حاتتامالار, ماقالالار قويىلدى.
ميراس اسان,
«ەگەمەن قازاقستان»
قاراعاندى وبلىسى
