17 قىركۇيەكتە جالاۋى جەلبىرەگەن بايراقتى باسەكەگە ازيانىڭ 62 ەلىنەن كەلگەن 6000-عا جۋىق سپورتشى سپورتتىڭ 21 ءتۇرى بويىنشا سىنعا ءتۇستى. ال قازاقستان قۇراما ساپىنان 16 سپورت ءتۇرى بويىنشا 181 سپورتشى ەل نامىسىن قورعاعان. جارىستىڭ اشىلۋ سالتاناتىنا قۇرمەتتى قوناق رەتىندە مەملەكەت باسشىلارى, بەدەلدى ساياساتكەرلەر, حالىقارالىق ۇيىمداردىڭ جەتەكشىلەرى قاتىستى. ولاردىڭ قاتارىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ تا بولعان ەدى.
ون ەكى كۇنگە سوزىلعان V ازيا ويىندارىنىڭ قورىتىندىسى بويىنشا 181 سپورتشىمىز 28 التىن, 28 كۇمىس جانە 40 قولا جۇلدە يەلەندى. جالپىكوماندالىق ەسەپتە 96 مەدال جيىنتىعىنا قول جەتكىزگەن ءبىزدىڭ سپورتشىلار ءتورتىنشى ورىنعا تۇراقتادى. بۇل سىندا تۇرىكمەنستان سپورتشىلارى ءبىرىنشى بولدى. جارىستى وتكىزۋشى ەل قورجىنىندا 245 مەدال بار (89 التىن, 70 كۇمىس جانە 86 قولا). قىتاي قۇراماسى 97 جۇلدەمەن (42, 32, 23) ەكىنشى ورىنعا ورنالاستى. ال ءۇشىنشى ساتىعا تابان تىرەگەن يران يسلام رەسپۋبليكاسى سپورتشىلارىنىڭ قورجىنىندا 118 مەدال بار (36, 23, 59).
جابىق عيماراتتاعى جانە جاۋىنگەرلىك ونەر بويىنشا V ازيا ويىندارىندا ەل قورجىنىنا ەڭ كوپ مەدالدى سامبوشىلار سالدى – 19 جۇلدە. ونىڭ جەتەۋى التىن, التاۋى كۇمىس جانە التاۋى قولا. 13 مەدال جيناعان بەلبەۋ كۇرەسىنىڭ بالۋاندارى ەكىنشى ورىندا. ولاردىڭ ەنشىسىندە ءتورت التىن, ءۇش كۇمىس جانە التى قولا بار. سونداي-اق بيىلعى ازيا ويىندارىندا جەڭىل اتلەتتەرىمىز دە ءساتتى ونەر كورسەتتى. «سپورت پاديشاسى» سانالعان سپورت تۇرىنەن جەرلەستەرىمىز التى التىن, ءبىر كۇمىس جانە ءۇش قولامەن جالپى سانى 10 مەدال جينادى.
جابىق عيماراتتاعى جانە جاۋىنگەرلىك ونەر بويىنشا ازيا ويىندارى 2005 جىلدان بەرى تۇراقتى تۇردە ۇيىمداستىرىلىپ كەلەدى. بيىلعى جارىسپەن قوسا ەسەپتەگەندە قازاقستان قۇراماسىنىڭ سپورتشىلارى مۇنداي سايىسقا بەسىنشى رەت قاتىستى. وسى ارالىقتا ءبىزدىڭ سپورتشىلار جالپى سانى – 363 مەدال يەلەنگەن ەكەن. 2005 جىلى تۇڭعىش رەت ۇيىمداستىرىلعان اتالعان تۋرنيردە ءبىزدىڭ ەلدىڭ سپورتشىلارى 23 التىن, 15 كۇمىس جانە 6 قولا مەدال يەلەنگەن بولاتىن. جالپى سانى 44 جۇلدەمەن مەدال كورسەتكىشى بويىنشا جالپىكوماندالىق ەسەپتە ەكىنشى ورىن العان.
اراعا ەكى جىل سالىپ جابىق عيماراتتاعى جانە جاۋىنگەرلىك ونەردەن ازيا ويىندارى قىتايدىڭ ارنايى اكىمشىلىك اۋدانى سانالعان ماكاو قالاسىندا ءوتتى. بۇل دوداعا ازيانىڭ 44 ەلىنەن كەلگەن 1800-گە جۋىق سپورتشى سپورتتىڭ 17 تۇرىنەن ءوز باقتارىن سىنادى. قازاقستان قۇراماسىنىڭ سپورتشىلارى بۇل سىندا مەدال بويىنشا ەكى جىل بۇرىنعى ناتيجەسىن قايتالاي المادى. سپورتشىلارىمىز ماكاودا توعىز التىن, 20 كۇمىس جانە 13 مەدالمەن جالپىكوماندالىق ەسەپتە ۇزدىك بەستىككە ەندى.
ۆەتنامدا وتكەن ءۇشىنشى ازيا ويىندارىندا قازاقستاندىق سپورتشىلار سپورتتىڭ 10 تۇرىنەن قۇراما قورجىنىنا 59 جۇلدە سالعان بولاتىن. جالپى ەسەپ بويىنشا قازاقستان قۇراماسى 21 التىن, 16 كۇمىس جانە 22 قولا مەدال ەنشىلەدى. مەدال جيىنتىعى بويىنشا ءۇشىنشى ساتىدان كورىندى.
ال ءىV ازيا ويىندارى 2013 جىلى وڭتۇستىك كورەيانىڭ ينچحون قالاسىندا ءوتىپ, ءبىر اپتاعا سوزىلعان باسەكەدە قازاقستاندىق سپورتشىلار 31 مەدالعا قول جەتكىزدى. ونىڭ جەتەۋى التىن, سەگىزى كۇمىس جانە 16-سى قولا. جالپىكوماندالىق ەسەپتە بەسىنشى ورىندى قاناعات تۇتقان بولاتىن.
جابىق عيماراتتاعى جانە جاۋىنگەرلىك ونەردەن كەلەسى ازيا ويىندارى 2021 جىلعا جوسپارلانعان. بىراق ناقتى قاي ەل وتكىزەتىندىگى تۋرالى مالىمەتتەر جوق. جارىستى ۇيىمداستىرۋشىلاردىڭ مالىمدەۋىنشە, VI ازيا ويىندارىن وتكىزۋشى ەلدىڭ اتى جىل سوڭىنا دەيىن بەلگىلى بولماق.
ءالي بيتورە,
«ەگەمەن قازاقستان»
