بريفينگتە جامبىل وبلىسىندا ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا ايتىلعان مىندەتتەردى جۇزەگە اسىرۋ جايى مەن وسى ءوڭىردىڭ الەۋمەتتىك-ەكونوميكالىق جاعدايى ءسوز بولدى. ك.كوكىرەكباەۆتىڭ ايتۋىنشا, وبلىس حالقىنىڭ كۇش-جىگەرى مەملەكەت باسشىسى جۇكتەگەن مىندەتتەردى ورىنداۋعا جۇمىلدىرىلىپ وتىر.
بيىلعى سەگىز ايداعى كورسەتكىش بويىنشا وبلىس ەكونوميكاسىنىڭ بارلىق سالاسىندا وڭ سەرپىن بايقالعان. العاشقى جارتىجىلدىقتاعى جالپى وڭىرلىك ءونىم 0,5 پايىزعا ارتىپ, 231 ملرد تەڭگەنى قۇراسا, ينۆەستيتسيا كولەمى 0,9 پايىزعا وسكەن. ونەركاسىپ ونىمدەرى كولەمى 0,6 پايىزعا ارتىپ, 227 ملرد تەڭگەگە جەتكەن. «ەلباسى جامبىل وبلىسىنا بارعان ساپارىندا حيميا ونەركاسىبىنىڭ الەۋەتىن ارتتىرىپ, وبلىستاعى يندۋستريالىق جانە ينفراقۇرىلىمدىق دامۋعا جەتە كوڭىل ءبولۋدى تاپسىردى. يندۋستريالاندىرۋ باعدارلاماسىنىڭ ارقاسىندا وبلىستا 158 ملرد تەڭگە كولەمىندەگى 53 جوبا جۇزەگە اسىرىلدى. سونىڭ ناتيجەسىندە 7 مىڭ جاڭا جۇمىس ورنى اشىلدى. ەندى باعدارلامانىڭ ەكىنشى بەسجىلدىعىندا 6 مىڭ جۇمىس ورنىن اشۋ كوزدەلۋدە. بيىل 17,3 ملرد تەڭگەنىڭ 13 جوباسى ىسكە اسىرىلىپ جاتىر. بۇل 1350 جاڭا جۇمىس ورنىن قۇرۋعا مۇمكىندىك بەرەدى», دەيدى وبلىس اكىمى.
مەملەكەت باسشىسىنىڭ اگروونەركاسىپ كەشەنىن ەكونوميكانىڭ جاڭا درايۆەرىنە اينالدىرۋ مىندەتىن قويعانى بەلگىلى. وسىعان بايلانىستى وبلىس اۋىل شارۋاشىلىعى سالاسىن دامىتۋعا ايرىقشا ءمان بەرىپ وتىر. بيىل 104,6 ملرد تەڭگەنىڭ ءونىمى ءوندىرىلىپ, ونىڭ كولەمى 2,6 پايىزعا وسكەن. اۋىلشارۋاشىلىق داقىلدارى القابى ۇلعايتىلىپ, ونىڭ كولەمى 630 مىڭ گەكتارعا جەتىپتى. بۇل – بىلتىرعىمەن سالىستىرعاندا 38,5 مىڭ گەكتارعا ارتىق كورسەتكىش.
وبلىس اكىمدىگى قانت قىزىلشاسى, جۇگەرى, ماقسارى, سويا القاپتارىن ۇلعايتۋدى قولعا الىپ وتىر. بيىل قانت قىزىلشاسى القابىنىڭ ءوزى 9,5 مىڭ گەكتارعا جەتكەن. «بىلتىر 5 مىڭ گەكتار جەردەن 116 مىڭ توننا قىزىلشا جينالىپ, ورتاشا ونىمدىلىگى 232 تسەنتنەردى قۇراعان ەدى. بيىل 180 مىڭ توننا ءونىم جيناپ, ودان 18 مىڭ توننا قانت شىعارۋدى جوسپارلاپ وتىرمىز. وسى ماقساتقا جەتۋ ءۇشىن مەركى قانت زاۋىتى
1 ملرد تەڭگەگە قايتا جاڭعىرتىلدى», دەيدى ك.كوكىرەكباەۆ.
سونداي-اق وبلىس اكىمى وڭىردە مال باسى كوبەيىپ كەلە جاتقانىن ايتتى. وسىعان سايكەس وبلىس ەتپەن ءوزىن-ءوزى قامتاماسىز ەتۋ دەڭگەيىنە جەتىپ, ەندى مال ونىمدەرىن ەكسپورتقا شىعارا باستاپتى. ەت ونىمدەرىن قايتا وڭدەيتىن «مەركى ەت», «وڭتۇستىك حالال تاعامدارى» جانە «اۋليە اتا فەنيكس» قۇس فابريكاسى سياقتى كاسىپورىندار ىسكە قوسىلىپ, سونىڭ ارقاسىندا بىلتىر شەت مەملەكەتتەرگە 451 توننا ەت ەكسپورتتالعان. ەندى بۇل كورسەتكىشتى 700 تونناعا جەتكىزۋ مەجەسى تۇر.
جالپى, اۋىل شارۋاشىلىعىن دامىتۋ ماقساتىندا وبلىسقا 15,8 ملرد تەڭگە, ونىڭ ىشىندە رەسپۋبليكالىق بيۋدجەتتەن – 6,3 ملرد جانە وبلىستىق بيۋدجەتتەن 9,5 ملرد تەڭگە بولىنگەن. «ەت كلاستەرىن ودان ءارى دامىتۋ ءۇشىن مويىنقۇم, مەركى اۋداندارىندا رەسەيلىك «اگروفيرما تۇرىكپەن» جانە مالايزيالىق «اگروستان فەرمس» سەرىكتەستىكتەرى ارقايسىسى 3 مىڭنان 5 مىڭ باسقا ارنالعان ءىرى قارا مال بورداقىلايتىن كەشەندەر سوعۋدا», دەيدى وبلىس اكىمى.
وبلىسقا بارعان ساپارىندا ەلباسى پايدالانىلماي جاتقان جەردى مەملەكەتكە قايتارۋ ماسەلەسىن كوتەرگەن بولاتىن. وسىعان وراي سوڭعى 5 جىلدا پايدالانىلماي جاتقان 553 مىڭ گەكتار اۋىل شارۋاشىلىعى جەرى انىقتالىپ, مەملەكەتكە قايتارىلعان. قازىر بۇل ۋچاسكەلەردى ءتيىمدى پايدالانۋ قولعا الىنىپ, 295 مىڭ گەكتار جەر اگرارلىق سالاعا ينۆەستيتسيا تارتۋ ماقساتىندا ازىرلەنىپ قويىپتى. ال بيىلعى 8 ايدىڭ ىشىندە ينۆەستيتسيالىق جوبالاردى ىسكە اسىرۋ ءۇشىن بارلىعى 827 گەكتار جەر بولىنگەن.
وبلىستىڭ الەۋمەتتىك ماسەلەسىنە دە توقتالعان اكىم جۇمىسسىزدىقتى ازايتۋ ماقساتىندا بىرقاتار شارالار قولعا الىنعانىن جەتكىزدى. ونىڭ ايتۋىنشا, قازىر وبلىستا جۇمىس ىستەۋگە قابىلەتتى تۇرعىنداردىڭ 42 پايىزى ءوزىن-ءوزى جۇمىسپەن قامتىعاندار.
وبلىستىڭ ءبىلىم سالاسىندا قۇرىلىس جۇرگىزۋگە بيۋدجەتتەن 6,2 ملرد تەڭگەدەن استام قارجى بولىنگەن. بيىل 14 مەكتەپتىڭ قۇرىلىسى جۇرگىزىلسە, ونىڭ 4-ەۋى جاڭا وقۋ جىلىندا پايدالانۋعا بەرىلگەن. 2010 جىلى وبلىستا تەك ەكى جەكەمەنشىك بالاباقشا جۇمىس ىستەسە, بيىل ونىڭ سانى 94-كە جەتكەن.
سوڭعى بىرنەشە جىلدا تارازدا ەكى جەكەمەنشىك كارديوحيرۋرگيالىق ورتالىق اشىلعان. ولاردىڭ ارقايسىسىندا جىلىنا 1 مىڭعا جۋىق وتا جاسالادى. جەكە كاسىپكەرلەر تارتۋدىڭ ارقاسىندا 2 ملرد تەڭگەگە «اتلەتيك» كوپسالالى سپورت كەشەنى تۇرعىزىلىپ, بۇل قارجى جەكە ينۆەستيتسيا ەسەبىنەن تارتىلعان.
قىمبات توقتامۇرات,
«ەگەمەن قازاقستان»
