داڭعايىر ديقان, مەحانيزاتور, سوتسياليستىك ەڭبەك ەرى, مەملەكەتتىك سىيلىقتىڭ لاۋرەاتى, بىرنەشە وردەندەردىڭ يەگەرى كامشات دونەنباەۆانىڭ ەسىمى كەزىندە تەك قازاقستان عانا ەمەس, ودان دا تىس جەرلەرگە ءمالىم بولدى. كامشات قازاق حالقىنىڭ ماقتانىشىنا, جاستاردىڭ ۇلگى تۇتار تۇلعاسىنا اينالدى.
– كامشات اپا تۋرالى كەزىندە جۋرناليستەر وچەركتەر, فاريزا اپامىز كىتاپ تا جازدى, دەرەكتى فيلمدەر ءتۇسىرىلدى, اقىندار ولەڭىن ارنادى. بىراق ءان جازىلا قويماعان ەكەن. وسى ولقىلىقتىڭ ورنىن تولتىرۋ كوپتەن ويىمدا جۇرەتىن. سول ماقساتىما جەتكەندەيمىن, – دەدى ءاننىڭ اۆتورى. «قازاقتىڭ كامشاتى» ءانىن كوكشەلىك ءانشى راشيدا عالىموۆا ورىندادى. ەكىنشى ءانىن اۆتور كورەرمەندەرگە ءوزى تارتۋ ەتتى.
بۇگىندە جەتپىستىڭ ۇشەۋىنە كەلىپ, نەمەرەلەرىنىڭ ورتاسىندا ءجۇرىپ جاتقان كامشات اپانىڭ ونەگەلى ءومىرى جاستارعا ۇلكەن ۇلگى.
– كوكشەلىك ونەرپازداردىڭ قوستانايعا بۇل جولعى ساپارى ءبىزدىڭ وتباسىمىزعا دا ەرەكشە قۋانىش سىيلادى. ءبىزدىڭ انامىزعا ارنالعان ءبىر ەمەس, ەكى ءاننىڭ تۇساۋى كەسىلدى. انامىزدىڭ قۋانىشىن, ءاننىڭ اۆتورىنا, ورىنداۋشىسىنا ايتقان العىسىن كورەرمەندەرگە جەتكىزگىم كەلەدى,–دەدى كامشات اپانىڭ كەلىنى اقمارال دونەنباەۆا.
وبلىستىق مادەنيەت باسقارماسى باسشىسىنىڭ ورىنباسارى روزا ولجاباەۆا جاقسى ءاننىڭ ەل يگىلىگى ەكەنىن ايتا كەلىپ, كامشات دونەنباەۆا تۋرالى جاڭا ءان الداعى ۋاقىتتا جاستارعا ارنالعان شارالاردا ورىندالاتىنىن, قوستانايلىق انشىلەردىڭ دە رەپەرتۋارىنان ورىن الاتىنىن ايتتى.
ءنازيرا جارىمبەت,
«ەگەمەن قازاقستان»
قوستاناي
