وسى وقيعاعا ارنالعان راسىمگە قاتىسۋ ءۇشىن امستەردام قالاسىنان ارنايى اۋەزوۆتىڭ نەمەرەسى زيفا-الۋا مۇراتقىزى كەلدى. ەل اقساقالدارىنىڭ باتاسىمەن بوي كوتەرگەن بۇل باقتىڭ بولاشاقتا كوپشىلىك كوزايىمىنا اينالارى انىق.
باق وتىرعىزۋ كاسىبىمەن ونداعان جىلدار بويى اينالىسىپ كەلە جاتقان گوزەل قۇلجاباەۆا ۇلى ادامدار اتىنداعى باق اشۋ يدەياسىنىڭ قالاي باستالعاندىعى تۋرالى بىلاي دەيدى: «فرانتسياعا العاش بارعانىمدا, سونداعى دوستارىم ناپولەوننىڭ باسىنا الىپ باردى. ول جەردىڭ ءۇردىسى بويىنشا, ەسكەرتكىشكە جاقىنداماس بۇرىن, بەس رەت باسىڭدى ءيىپ, تاعزىم ەتۋىڭ كەرەك ەكەن. سول جەردە ماعان «ايدالاداعى فرانتسۋز قولباسشىسىنىڭ ارۋاعىنا, ءوزىمنىڭ ۇلى ابايىمنىڭ رۋحىنا نەگە ءتاۋ ەتپەيمىن؟!» دەگەن وي ساپ ەتە قالدى. ەلگە ورالعاننان كەيىن جيدەبايعا باردىم. بىراق اباي اتىنداعى باق اشۋ جونىندەگى ۇسىنىسىم جەرگىلىكتى بيلىكتەن قولداۋ تاپپاي, ويداعى ءىسىمدى تۋعان جەرىمدە جۇزەگە اسىردىم دەيدى ول بىزگە اعىنان جارىلىپ.
ورايى كەلىپ تۇرعاندا ايتۋ پارىز. گوزەل حانىمنىڭ دەمەۋشىلىگىمەن بۇعان دەيىن بۇل وڭىردە گۇلستاندىقتار 2011 جىلى 2 گەكتار جەرگە قارايعايلى باق, 7 گەكتار جەرگە كوكتەرەك باعىن, 2013 جىل حالىق ءارتيسى نۇرعالي ءنۇسىپجانوۆتىڭ قۇرمەتىنە 5 گەكتار الما باعىن, بىلتىر 10 گەكتار اۋماققا «باتىر انالار» ساياباعىن ەل يگىلىگىنە بەرگەن ەدى.
مۇنىڭ بەر جاعىندا سوڭعى جىلدارى كەربۇلاق اۋدانىنىڭ باسشي اۋىلىنداعى رايىمبەك اتىنداعى ورتا مەكتەپ نۇرىم جانە ارالتوبە اۋىلدارىنداعى ءبىلىم ۇيالارىن, ء«بۇلدىرشىن» بالاباقشاسىنا «وسىمدىكتەر الەمىن » سىيعا تارتقان دا وسىناۋ جايساڭ جان.
ەندەشە نۇرىمداعى «اۋەزوۆ باعى» تۇكپىردەگى اۋىلدىڭ كوركى عانا ەمەس, بەرىسى – قازاقستاننىڭ ءشولدى شالعايىنداعى تۇرعىنداردىڭ, ءارىسى – بولاشاق ۇرپاقتىڭ يگىلىگىنە اينالارى اقيقات.
ايناش ەسالي,
«ەگەمەن قازاقستان»
الماتى
