ەندى وسى جوبالاردىڭ بىرقاتارىن وڭىردە جۇزەگە اسىرىپ, ەل يگىلىگىنە جاراتۋ كوزدەلىپ وتىر. بۇل جوبالار ساتىمەن ىسكە اسىرىلعان جاعدايدا جاقىن جىلداردا ءبىزدىڭ وڭىردە وندىرىلەتىن ەلەكتر ەنەرگياسىن ەلىمىزدىڭ وزگە ايماقتارى وزىندىك باعاسىمەن ساتىپ الۋعا مۇمكىندىك تۋماق. وسىنداي اۋقىمدى جوبالاردىڭ ءبىرى «ەنەرگيا بەلدەۋى – شق ورتالىعى» دەپ اتالادى. قازىرگى ۋاقىتتا اتالعان ورتالىقتىڭ قۇرىلىس-مونتاج جۇمىستارى اياقتالىپتى. ايماقتا كۇن ەنەرگياسىن پايدالانۋ ارقىلى جۇزەگە اسىرىلاتىن «جاڭعىز سولار» جوباسىن ىسكە قوسۋ ءۇشىن يسپانيالىق «اRESOL» كومپانياسىمەن بىرلەسكەن جۇمىستار جۇرگىزىلىپ جاتقان كورىنەدى. ستانسانىڭ بولجامدى قۋاتى – شامامەن 35 مەگاۆاتت. جۋىق ارادا ءىس-ارەكەت جوسپارىن ازىرلەۋ ماقساتىندا وسى كومپانيانىڭ وكىلدەرى وبلىسىمىزعا كەلمەك.
جەل ەنەرگياسى سالاسىنداعى قالعان ەكى جوبا دا قارقىندى تۇردە جۇزەگە اسىرىلۋدا, ولاردىڭ قۋاتى شامامەن 62,5 مەگاۆاتتى قۇرايدى. قوس جوبا ەنەرگيا قۋاتىن 200 مەگاۆاتقا دەيىن ۇلعايتۋعا مۇمكىندىك بەرمەك. جوسپار بويىنشا ستانسالار جارما اۋدانىنا ورنالاسادى. باستاماشىسى «ۆەۋ-شار» جشس بولىپ تابىلاتىن ءبىرىنشى جوبا بويىنشا بارلىق قۇجاتتار دايىن. 33 گەكتار جەر تەلىمى بولىنگەن. جوبانىڭ جالپى سوماسى – 68 ميلليون دوللار. ەكىنشى جەل ەلەكتر ستانساسىنىڭ قۇنى – 18 ميلليارد تەڭگە. نىسانداردى ىسكە قوسۋ كەلەسى جىلدىڭ ەكىنشى جارتىسىنا جوسپارلانعان.
جۋرناليستەرگە ارنايى سۇحبات بەرگەن وبلىس اكىمى دانيال احمەتوۆ شىعىس قازاقستاندا بالامالى ەنەرگيا كوزدەرىن دامىتۋ بويىنشا اۋقىمدى جۇمىستار قولعا الىنىپ جاتقاندىعىن جەتكىزدى. «ەنەرگەتيكاداعى باسىم باعىتتاردىڭ ءبىرى – سۋ ەنەرگەتيكاسى. وبلىستا بۇل تاراپتا دا اۋقىمدى جۇمىستار جۇرگىزىلىپ جاتىر. «تۇرعىسىن گەس-1» جوباسى قارقىندى ىسكە اسىرىلىپ, بوگەن سالىنۋدا. باس مەردىگەر – قىتاي مەملەكەتتىك سۋ ەنەرگەتيكالىق كەشەن كومپانياسى. وسى كەشەننىڭ ەكىنشى سۋ ستانساسىنا قاتىستى ايتار بولساق, جوبا مەملەكەتتىك ساراپتامادان ءوتتى. وسىلايشا, وبلىستا 5 ۇلكەن جوبا جۇزەگە اسىرىلۋدا», – دەيدى ايماق باسشىسى.
جاڭا ەنەرگەتيكالىق قوندىرعىلار شىعىس قازاقستانعا ساعاتىنا 1 ميلليارد كيلوۆاتتىق ەنەرگيا تاپشىلىعىن جابۋعا مۇمكىندىك بەرمەك.
ازامات قاسىم,
«ەگەمەن قازاقستان»
شىعىس قازاقستان وبلىسى
