تەاتردىڭ كوركەمدىك جەتەكشىسى, حالىق ءارتىسى, قازاقستاننىڭ ەڭبەك ەرى ءاسانالى ءاشىموۆتىڭ شىعارماشىلىق كەشى دە اتىراۋلىق كورەرمەن ايتا جۇرەر ايتۋلى وقيعانىڭ ءبىرى بولدى.
تەاتر ارتىستەرى ساحنالاعان «تاڭسۇلۋ», «اقتاستاعى احيكو», ء«جۇز جىلدىق ماحاببات», «باقىت كىلتى», «قوشتاسقىم كەلمەيدى», «قىز جىبەك», ء«مولدىر ماحاببات», «تەندەرگە تۇسكەن كەلىنشەك» قويىلىمدارىنىڭ قاي-قايسىسىنىڭ دا شوقتىعى بيىك. اتاپ وتەرلىگى, بۇل سپەكتاكلدەردى تەك وبلىس ورتالىعىنداعى عانا ەمەس, الىس اۋداندارداعى تۇرعىندار دا تاماشالادى. الماتىدان كەلگەن ارتىستەر اۋىلدارعا ارنايى بارىپ, ەلمەن جۇزدەستى, سپەكتاكل قويدى. اتىراۋداعى ءبىلىم وردالارىندا, مادەنيەت مەكەمەلەرىندە كەزدەسۋ, شەبەرلىك ساباقتارىن وتكىزدى.
ونەر ساپارى بەلگىلى جازۋشى-دراماتۋرگ راحىمجان وتارباەۆتىڭ «بەيبارىس سۇلتان» تاريحي دراماسىمەن قورىتىندىلاندى. جايىعىن ساعىنىپ, ءبىر ءتۇپ جۋساندى اڭساپ وتكەن بەيبارىستىڭ تاعدىرى سۋرەتتەلگەن قويىلىم كورەرمەنگە ەرەكشە اسەر سىيلادى.
«رۋحاني جاڭعىرۋ» باعدارلاماسىنىڭ اياسىندا الاتاۋدان اتىراۋعا ساپار شەگىپ, قازاق ونەرىنىڭ قارا شاڭىراعى م.اۋەزوۆ اتىنداعى قازاق مەملەكەتتىك اكادەميالىق دراما تەاترى ەكى اپتا بويى جايىق جۇرتىنا ونەرىن كورسەتتى. ەلدىڭ رۋحىنا رۋح قوساتىن, ايتۋلى شىعارمالارىمىزدى الىپ كەلدىك. اتىراۋ ەلىمەن كيەلى ساحنا ارقىلى تىلدەستىك. وسىنداي مۇمكىندىك سىيلاعان وبلىس باسشىلىعىنا العىسىمىز شەكسىز, - دەيدى تەاتر باسشىسى ەرلان ءبىلال.
باقىتگۇل باباش,
«ەگەمەن قازاقستان»
اتىراۋ
