وعان الەمنىڭ الىس-جاقىنداعى جيىرما ەلىنەن ءبىر كەزدە اقتوبە ايماعىندا تۋىپ-وسكەن, الايدا وزگە وڭىرلەرگە كوشىپ كەتكەن, ءتىپتى تاعدىردىڭ جازۋىمەن بۇگىنگى كۇندەرى جەر شارىنىڭ وزگە قۇرلىقتارىندا تۇرىپ جاتقان 300-گە جۋىق جەرلەستەرىمىز كەلەدى دەپ كۇتىلەدى. باسپاسوزدە مەملەكەت باسشىسىنىڭ رۋحاني جاڭعىرۋ جونىندەگى كەڭ تىنىستى, كەمەل وي-پىكىرلەرى جاريالانعاننان كەيىن اقتوبە وبلىسىندا دەرەۋ «تۋعان جەر» باعدارلاماسىن ىسكە اسىرۋ تەتىكتەرى, ونى جۇزەگە اسىرۋدىڭ بۇگىنگى تاكتيكاسى مەن ەرتەڭگى ستراتەگياسى بەلگىلەنگەن بولاتىن. بۇگىنگى كۇنى اقتوبەدە ازىرلەنگەن بۇل بايىپتى باعدارلاما وزگە وڭىرلەر ونەگە, تاعىلىم الارلىقتاي دەڭگەيگە جەتىپ وتىر.
سوندىقتان دا «تۋعان جەر» تۇڭعىش رەسپۋبليكالىق فورۋمى كەزىندە رەسپۋبليكامىزدىڭ بارلىق وبلىستارىنان كەلگەن دەلەگاتسيالار رۋحاني جاڭعىرۋ شەڭبەرىندەگى وسى بازالىق باعدارلامانىڭ قىزمەتىمەن تانىسپاق. فورۋمنىڭ اشىلۋ سالتاناتى رەسپۋبليكا وبلىستارى اراسىندا بالاماسى جوق جاڭادان بوي كوتەرگەن شىعارماشىلىق اكادەميادا وتەدى دەپ بەلگىلەنگەن. بۇدان كەيىنگى كەزەكتە فورۋم قوناقتارى وڭىردە بيزنەستىڭ الەۋمەتتىك جاۋاپكەرشىلىگى جانە مەملەكەت-جەكەمەنشىك ارىپتەستىگى اياسىندا تۇرعىزىلعان كوپتەگەن نىسانداردى ارالاپ كورمەك.
فورۋم اياسىندا الەمدىك ستاندارتتارعا ساي سالىنعان جەكپە-جەك سارايىندا دزيۋدودان رەسپۋبليكا پرەزيدەنتىنىڭ كۋبوگى ءۇشىن حالىقارالىق جارىس ۇيىمداستىرىلماق. سونىمەن بىرگە «تۋعان جەر» باعدارلاماسىنا سايكەس «اقتوبە كەشە, بۇگىن جانە ەرتەڭ» اتتى كونفەرەنتسيا وتكىزۋ جوسپارلانعان. فورۋمنىڭ سوڭعى كۇنى وعان قاتىسۋشىلاردىڭ ءبىر بولىگى وبلىس اۋداندارىنا جول تارتسا, ەكىنشى ءبىر لەگى وبلىس ورتالىعىنداعى ءبىلىم بەرۋ, دەنساۋلىق ساقتاۋ جانە مادەنيەت مەكەمەلەرىندە سەمينارلار مەن شەبەرلىك ساعاتتارىن وتكىزبەك. مەملەكەت باسشىسى نرسۇلتان نازارباەۆ اتاپ كورسەتكەندەي, تۋعان جەرگە, ونىڭ مادەنيەتى مەن سالت-داستۇرلەرىنە ايىرىقشا ىڭكارلىكپەن اتسالىسۋ – شىنايى ءپاتريوتيزمنىڭ باستى بەلگىسى. اقتوبەدە «رۋحاني جاڭعىرۋ» باعدارلاماسى اياسىندا وتكىزىلەتىن «تۋعان جەر» تۇڭعىش رەسپۋبليكالىق فورۋمىندا تۋعان جەردىڭ مەرەيىن اسقاقتاتار ىستەر مولىنان كورىنىس تابادى دەگەن سەنىم مول.
اقتوبە
