قازاق ءتىلىن قاشىقتىقتان ۇيرەنۋگە ارنالعان «Soyle.kz» تۇڭعىش ونلاين-كۋرسىنىڭ اۆتورى سانالاتىن مەملەكەتتىك ءتىلدى دامىتۋ قورى تىلدەر مەرەكەسىنە ورايلاستىرىپ ەلباسىمىز ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا بىرقاتار جاڭا ينتەرنەت-جوبالارىن جۇرتشىلىققا ۇسىندى. قوردىڭ جاڭا جوبالارى مەن انا ءتىلىمىزدىڭ مارتەبەسىن ارتتىرۋ باعىتىندا اتقارىلىپ جاتقان وزگە دە جۇمىستارى تۋرالى ايتىپ بەرۋىن ءوتىنىپ, قوردىڭ ديرەكتورى ازات شاۋەەۆتى اڭگىمەگە تارتتىق.
– ازات سادمەت ۇلى, ءسىز باسقارىپ وتىرعان قوردىڭ «Soyle.kz» ونلاين-پورتالى قازاق ءتىلىن حالىققا تەگىن ۇيرەتىپ وتىرعانىنان حاباردارمىز. جۋىردا تاعى دا جاڭا ينتەرنەت-جوبالاردىڭ تۇساۋىن كەستىڭىزدەر, وسى ونىمدەرىڭىزگە تولىعىراق توقتالساڭىز...
– ەلباسىمىز ن.ءا.نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋىندا ءبىلىم بەرۋدە ءىت سالاسىن كەڭىنەن قولدانۋ, 3D-پرينتينگ, ونلاين, ءموبيلدى, تسيفرلىق قىزمەت كورسەتۋ سەكىلدى سالالاردى دامىتۋدى ايتىپ, بۇل ىسكە مەملەكەتتىك ەمەس سەكتوردى بەلسەندى تۇردە تارتۋ قاجەتتىگىن اتاپ ءوتتى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ باستاماسىمەن جانە قولداۋىمەن ازىرلەنىپ, كۇنى كەشە كوپشىلىككە ۇسىنىلعان Qazaqstan3d.kz ينتەرنەت-سايتى ەلباسى جۇكتەگەن مىندەتتەردى جۇزەگە اسىرۋ باعىتىنداعى ناقتى جۇمىس دەر ەدىم. قازىر ءبارىمىز, اسىرەسە جاستار جاعى وزىمىزگە قاجەتتى ماعلۇماتتى, اقپاراتتى ينتەرنەتتەن ىزدەيتىنىڭىز بەلگىلى. بۇل جىلدام ءارى قولجەتىمدى. وسى تۇرعىدان كەلگەندە «Qazaqstan3D» جوباسى – قازاقستاندى بەينەلى تۇردە تانىستىرۋداعى تاپتىرماس مۋلتيمەديالىق جولسەرىك. جاڭا تەحنولوگياعا نەگىزدەلگەن جوبانىڭ باستى ماقساتى ءوز وتانداستارىمىزدى, شەتەلدىك قوناقتاردى رەسپۋبليكامىزدىڭ كورنەكتى جەرلەرىمەن عالامتور جەلىسىنىڭ مۇمكىندىگى ارقىلى تانىستىرۋ بولىپ تابىلادى. قازىرگى زامانعا ساي دايىندالعان 3D مودەلىندەگى ۆەب-سايتتىڭ, ونىڭ Android جانە iOS پلاتفورمالارىندا جۇكتەلەتىن قوسىمشاسىنىڭ قۇرىلىمى دا جۇيەلى, ينتەرفەيسى دە قولايلى. سايت ارقىلى بۇكىل الەم قازاقستان تۋرالى تولىق ماعلۇمات الا الادى, ەلىمىزگە ساياحاتتاپ كەلەتىن شەتەلدىك ازاماتتارعا دا كومەگى زور بولماق, ولار قاۋىپسىز ساياحات جاساۋ باعىتىن انىقتاۋعا, قولايلى تۇراتىن ورىن تاڭداۋعا مۇمكىندىك الادى. جوبا ءۇش تىلدە: قازاق, ورىس جانە اعىلشىن تىلدەرىندە ۇسىنىلىپ وتىر.
ۇسىنىلىپ وتىرعان ەكىنشى جوبامىز – «جەتى قازىنا» ءموبيلدى قوسىمشاسى, مۇنى دا كوپشىلىك كوڭىلىنەن شىعاتىن ەرەكشە جوبا دەۋگە بولادى. حالقىمىزدىڭ ءداستۇرلى دۇنيەتانىمىنداعى «جەتى قازىنا» ۇعىمى ءموبيلدى قوسىمشانىڭ تۇتاستاي قۇرىلىمى مەن مازمۇنىنا ارقاۋ بولدى. قوسىمشانى جۇكتەپ العان پايدالانۋشى «كيەلى ساندار سىرى», «سالت-ءداستۇر», «اسىل مۇرا», ء«سوز ساندىق», «التىن زەر», «تايقازان», « ۇلى دالا عاجايىپتارى» دەپ اتالاتىن 7 بولىمنەن قازاق جانە ورىس تىلدەرىندە مول ماعلۇمات الادى. رەسۋرس اتا-بابامىزدان قالعان مۇرالار تۋرالى, ۇرپاقتان ۇرپاققا جەتكىزىلىپ كەلە جاتقان تاريحي اڭىزدار مەن شەجىرەدەن سىر شەرتەدى, مادەني قۇندىلىقتارىمىزدى تانىستىرادى. مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا بەلگىلەنگەن مىندەتتەردى جۇزەگە اسىرۋ ماقساتىندا ازىرلەنگەن بۇل جاڭا جوبالار, تانىمدىق رەسۋرستار ۇلتتىق قۇندىلىقتارىمىزدى ناسيحاتتاۋعا, دارىپتەۋگە, جاستاردىڭ ءوز ەلىنە, تۋعان جەرىنە دەگەن سۇيىسپەنشىلىگىن ارتتىرۋعا جانە ولاردىڭ IT سالاسىنداعى ءبىلىم-بىلىكتەرىن جەتىلدىرۋگە ىقپال ەتەدى دەگەن ويدامىز.
– مەملەكەتتىك ءتىلدى دامىتۋ قورىن قۇرۋ يدەياسىنىڭ اۆتورى ەلباسىمىز ەكەنىن جۇرتشىلىق جاقسى بىلەدى. ۇكىمەتتىك ەمەس ۇيىم بولىپ تابىلاتىن قوردىڭ وزگە مەكەمەلەردەن وزگەشەلىگى نەدە؟
– قوردىڭ باستى ۇستانىمى – ەلباسىنىڭ مەملەكەتتىك ءتىلدى دامىتۋعا باعىتتالعان باستامالارىنا قوعامدىق قولداۋ كورسەتۋ, ەلىمىزدىڭ رۋحاني جەتىستىكتەرىن, تاريحي مۇرالارىمىزدى كەڭىنەن ناسيحاتتاۋ, جاستار اراسىندا قازاقستاندىق ءپاتريوتيزمدى قالىپتاستىرۋ مەن نىعايتۋعا اتسالىسۋ. ءبىز قوعاممەن, ءارتۇرلى الەۋمەتتىك توپتارمەن تىعىز قارىم-قاتىناستامىز. جوسپارلاناتىن شارالار, اتقارىلاتىن ىستەر قوعام وكىلدەرىنىڭ تىكەلەي ارالاسۋىمەن, سولاردىڭ قاجەتتىلىگى, سۇرانىسى مەن تاپسىرىسىنا وراي ورىندالادى. وسى ۋاقىتقا دەيىن بالاباقشادان باستاپ بالالار ۇيلەرى, مەكتەپ, كوللەدج وقۋشىلارى, جوعارى وقۋ ورىندارى ستۋدەنتتەرىنىڭ بەلسەندى قاتىسۋىمەن 100-دەن اسا اۋقىمدى ءىس-شارالار وتكىزىلدى. ەتنومəدەني توپتاردىڭ جاستار قاۋىمىن, دارىندى دا قابىلەتتى, وتكىر جاستاردى اقىلداسۋ-كەڭەسۋگە, تالداۋ-تالقىلاۋعا, باسقوسۋلارعا شاقىرامىز, بىرلەسە جۇمىس اتقارامىز. ءىس-شارالاردىڭ ۇيىمداستىرۋ باعىتى دا, ءادىس-ءتاسىلى دە سان الۋان. جاستار اراسىندا بىرلەسە وتكىزىلگەن سان الۋان جارنامالىق-اعارتۋشىلىق اكتسيالار, قازاق ءتىلىن وقىتۋعا ارنالعان ينتەرنەت-پورتال قۇرۋ جوبالارى قازىر كوپشىلىكتىڭ كوڭىلىنەن شىعۋدا. قوعامدىق باستامالارعا كومەك كورسەتەمىز, قازاق تىلىندە وقىتۋدىڭ يننوۆاتسيالىق باعدارلامالارىنا, جەكەلەگەن اۆتورلارعا قولداۋ-كومەك كورسەتىلدى.
قوعام سۇرانىسىنا, زامان تالابىنا وراي ىسكە قوسىلعان باستى جوبالارىمىزدىڭ ءبىرى – قازاق ءتىلىن قاشىقتىقتان وقىتاتىن «Soyle.kz» ينتەرنەت-پورتالى. كوپ ىزدەنىس ناتيجەسىندە ازىرلەنگەن جوبا ازاماتتارىمىزعا قازاق ءتىلىن ونلاين رەجىمىندە اقىسىز, قولايلى ۋاقىتتا ۇيرەنۋگە مۇمكىندىك بەرىپ وتىر. پورتالدا ەڭ قاجەتتى دەگەن وقۋ-جاتتىعۋ جۇمىستارى قامتىلعان: جاڭا سوزدەردىڭ وقىلۋى مەن اۋدارماسى, سوزدىك قوردى مولايتۋ جاتتىعۋلارى, كۇندەلىكتى قولدانىلاتىن دايىن ءسوز ورامدارى, جاعداياتتىق ديالوگتار, اۋديو جانە بەينە ماتەريالدار, تەست سۇراقتارى, اقپاراتتىق ماتەريالدار, تاعى باسقا كوپتەگەن مالىمەتتەر بار. پورتال ىسكە قوسىلعاننان بەرگى ءۇش جىلدىڭ ىشىندە ونى الەمنىڭ تۇكپىر-تۇكپىرىنەن 3 ملن ادام پايدالانسا, ارنايى تىركەلىپ ءتىل ۇيرەنىپ جاتقاندار سانى 70 مىڭعا جۋىقتاپ قالدى. Soyle ءموبيلدى قوسىمشاسى ارقىلى ءتىل ۇيرەنىپ جاتقاندار جەتەرلىك. سونداي-اق بيىل «Samruk-Kazyna Trust» الەۋمەتتىك جوبالاردى قولداۋ قورىنىڭ قولداۋىمەن «Soyle.kz» ادىستەمەسى بويىنشا 200-گە جۋىق ادام سكايپ ارقىلى ءتىلدى تەگىن ۇيرەنىپ شىقتى, 500-دەن استامى كەزەكتە تۇر.
– بۇدان ەكى جىل بۇرىن ەلباسىنىڭ قابىلداۋىندا بولۋىڭىز كوپتەگەن كوكەيكەستى ماسەلەلەردىڭ شەشىلۋىنە جول اشقان سەكىلدى.
– ءيا, ەلباسىمىز نۇرسۇلتان نازارباەۆ 2015 جىلعى ناۋرىز مەرەكەسى قارساڭىندا مەنى قابىلداپ, ءوزىنىڭ «جىبەك جولى» بەيبىتشىلىك سىيلىعىنىڭ ءبىر بولىگىن انا ءتىلىمىزدى دامىتۋ جوبالارىنا ارنايى بولگەن بولاتىن. وسى قاراجاتتىڭ ارقاسىندا ءتىل ۇيرەتەتىن ونلاين-پورتالىمىزدى ودان ءارى دامىتىپ, بالالاردى مەكتەپكە دايارلاۋعا ارنالعان «bala.soyle.kz» ونلاين سايتى مەن «Sozdik.soyle.kz» تاقىرىپتىق سوزدىك رەسۋرسىن اشۋ مۇمكىندىگىن يەلەندىك. اباي اتامىزدىڭ 170 جىلدىعىنا وراي «Abaialemi.kz» تۇڭعىش ەنتسيكلوپەديالىق پورتالىن ىسكە قوستىق. بالالارعا ارنالعان ء«تاتتى الما» 2-تومدىق كوركەم شىعارمالار جيناعىن شىعارىپ, «Tattialma.kz» بالالار ادەبيەتى سايتىن اشتىق. ء«تاتتى الما» ەلباسىنىڭ بۇلدىرشىندەرگە ارناعان كەرەمەت سىيلىعى بولدى. جيناق ەلىمىزدىڭ بارلىق بالالار كىتاپحانالارىنا تەگىن تاراتىلدى. بيىل ەلباسى قورىنىڭ قولداۋىمەن اتالمىش جيناقتىڭ 3 جانە 4-تومدارى جاس وقىرماندار قولىنا ءتيدى. وسكەلەڭ ۇرپاقتى وتانسۇيگىشتىكە تاربيەلەۋ ماقساتىندا ازىرلەنگەن «مەنىڭ قازاقستانىم», «قازاقستاننىڭ ۇلى تۇلعالارى», «قازاقستاننىڭ مەرەكەلەرى» سياقتى ءموبيلدى قوسىمشالارىن دا جاستار ۇلكەن قىزىعۋشىلىقپەن پايدالانۋدا.
2015 جىلدان باستاپ تۇڭعىش پرەزيدەنت قورىنىڭ قولداۋىمەن ءوزىمىز جاساعان العاشقى وتاندىق ينتەللەكتۋالدى «كىم بىلگىش؟» ءموبيلدى قوسىمشاسى ارقىلى جىل سايىن جوعارى سىنىپ وقۋشىلارى اراسىندا رەسپۋبليكالىق ونلاين-تۋرنير وتكىزىپ كەلەمىز. بيىلعى ءتۋرنيردىڭ ەكى تۋرىنىڭ ناتيجەسى بويىنشا فينالدىق باسەكەگە ەلىمىزدىڭ تۇكپىر-تۇكپىرىنەن 12 وقۋشى ءوتتى. سولاردى ارنايى استاناعا شاقىرىپ, قورىتىندى ويىندى قازان ايىندا وتكىزەمىز. جەڭىمپازداردىڭ بارلىعى باعالى سىيلىقتارمەن, ارنايى ديپلومدارمەن ماراپاتتالاتىن بولادى.
– جاقسى بايقاۋ ەكەن. جاستار ءۇشىن ءوز قابىلەت-قارىمىن شىڭداۋعا, ءبىلىمىن كورسەتۋگە زور مۇمكىندىك, ولاردىڭ تالپىنىسىن ىنتالاندىرۋعا جول اشاتىن.
– مۇنداي بايقاۋلاردى ءجيى وتكىزىپ تۇرامىز. جۋىردا قازاقستاندىق ينتەرنەت-كەڭىستىكتى, اقپاراتتىق رەسۋرستار مەن سەرۆيستەردى دامىتۋ, ولاردىڭ اراسىنان ۇزدىكتەرىن انىقتاۋ, ىنتالاندىرۋ ماقساتىندا تۇڭعىش پرەزيدەنت قورىنىڭ قولداۋىمەن جىل سايىنعى «ۇزدىك قازاقتىلدى ينتەرنەت-سايت سىيلىعى بايقاۋىن» جاريالادىق. قاراشا ايىندا قورىتىندىسىن شىعارىپ, بايقاۋعا تۇسكەن سايتتاردىڭ ون اتالىم بويىنشا ۇزدىكتەرى انىقتالىپ, ارنايى قارجىلاي سىيلىقتارمەن ماراپاتتالاتىن بولادى.
جىل سايىن ءوزىمىز دە, جاس اقىن-جازۋشىلار دا اسىعا كۇتەتىن ەرەكشە سايىس – «التىن توبىلعى» بايقاۋى. بايقاۋ تۇڭعىش پرەزيدەنت قورىنىڭ باستاماسىمەن جانە قارجىلىق قولداۋىنىڭ ارقاسىندا جازۋشىلار وداعىمەن بىرلەسىپ وتكىزىلەدى, وعان 18 بەن 35 جاس ارالىعىنداعى جاس اقىن-جازۋشىلار قاتىسا الادى. «التىن توبىلعى» جۇلدەسى «ۇزدىك پروزا», «ۇزدىك پوەزيا», «ۇزدىك دراماتۋرگيا» جانە «بالالارعا ارنالعان ۇزدىك شىعارما» جانە ەركىن تاقىرىپ اتالىمدارى بويىنشا بەرىلەدى. ءار نوميناتسيانىڭ باس جۇلدەسى 1 ملن تەڭگەنى قۇرايدى. 2015 جىلى بايقاۋدىڭ ەركىن تاقىرىبىنا «ماڭگىلىك ەل» يدەياسى ارقاۋ بولسا, 2016 جىلعى بايقاۋ تاۋەلسىزدىگىمىزدىڭ 25 جىلدىعىنا ارنالىپ, «تاۋەلسىزدىك تۇعىرى» اتاۋىمەن ءوتتى. بيىلعى بايقاۋىمىزدا ەركىن تاقىرىپتى ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا كوتەرىلگەن «تۋعان ەل» تاقىرىبىنا ارنادىق. جاس اقىن-جازۋشىلار وسى بايقاۋعا قاتىسامىن دەسە ءالى ۋاقىت بار, وتىنىمدەر ءبىرىنشى قاراشاعا دەيىن قابىلدانادى. وسى بايقاۋلاردىڭ ەرەجەلەرىمەن تۇڭعىش پرەزيدەنت قورىنىڭ www.fpp.kz نەمەسە ءبىزدىڭ قوردىڭ http://www.qazaq-found.kz سايتتارىنان تانىسۋعا بولادى.
– بۇگىنگى تاڭدا قوعامىمىزدا لاتىن ءالىپبيىنىڭ نۇسقاسى قىزۋ تالقىلانۋدا, ءتىل مامانى رەتىندە وسى ماسەلە بويىنشا ويىڭىزدى بىلدىرسەڭىز. ەلىمىز ءۇشىن ماڭىزدى قادامعا قور قانداي ۇلەس قوسپاق؟
– لاتىن الىپبيىنە كوشۋ – ۇلتتىق مۇددەمىزدى قورعاۋدىڭ باستى تەتىگى. ەلباسى باستاماسىمەن كوتەرىلگەن بۇل يگىلىكتى ىستە الەمدىك تاجىريبەلەر, ىشكى جانە سىرتقى تاريحي-ساياسي جاعدايلار ەسكەرىلىپ, ءبىزدى وسىنداي قادامعا الىپ كەلدى. جانە دە ۇلتتىق سانامىزدى جاڭارتىپ, قوعامعا رۋحاني سەرپىن بەرىپ, زامان كوشىنە ىلەسۋگە جاسالعان يگى قادام دەۋگە بولادى. لاتىن گرافيكاسىنىڭ ماڭىزى, بۇگىنگى الىپبيىمىزگە قاراعانداعى تيىمدىلىگى مەن وڭتايلىلىعى عالىمدار تاراپىنان تولىق زەردەلەندى دەۋگە بولادى. جۇرگىزىلگەن عىلىمي زەرتتەۋلەر مەن سالىستىرۋلار كوپ ۇتاتىنىمىزدى كورسەتىپ وتىر. ەڭ الدىمەن ەلباسىمىز ايتقان «ۇلتتىق كودىمىزدى» ساقتاۋ ءۇشىن جانە شەتەلدە تۇرىپ جاتقان قانداستارىمىزبەن قارىم-قاتىناسىمىزدى جاقسارتۋ جولىنداعى ماڭىزدى شەشىم.
ەكىنشىدەن, ينتەرنەتتىڭ كەڭىنەن قولدانىلۋى, حالىقارالىق دەڭگەيدەگى ساپا, تالاپ تۇرعىسىنان العاندا لاتىن ءالىپبيى جاڭا تەحنولوگيالارعا جول اشارى انىق. لاتىن ءالىپبيىن قابىلداۋ, بەكىتۋ ارقىلى ءبىز ۇلكەن تىلدىك رەفورما جاسايمىز. الداعى كەزەڭ لاتىن ءالىپبيىنىڭ ۇسىنىلعان نۇسقالارىنا قازاق ءتىلىنىڭ تابيعاتى مەن زاڭدىلىقتارى تۇرعىسىنان, ورفوگرافيالىق, ورفوەپيالىق ەرەجەلەرىنە يكەمدىلىگى جاعىنان تالداۋ, تالقىلاۋ جۇرگىزىلەتىن كەزەڭ بولماق. جانە دە بەكىتىلەتىن سوڭعى نۇسقا ءتىلدىڭ قوعامداعى قىزمەت ەتۋىن تولىققاندى وتەي الاتىنداي, ءتىل ۇيرەنۋشىلەردىڭ قازاق ءتىلىن ەركىن مەڭگەرۋىنە وڭ ىقپال جاساپ, كەلەشەگىمىز قازاق تىلىندە ساۋاتتى جازىپ, ەركىن سويلەيتىندەي بولۋى شارت. سوندا عانا بۇل ماڭىزدى قادامنىڭ يگى ىسكە اينالارى ءسوزسىز.
جالپى, لاتىن الىپبيىنە كوشۋدى ءبىز قۋانىشپەن قابىلدادىق. ولاي دەيتىنىم, بىزگە ەلىمىزدەن تىس جەرلەردە تۇراتىن قانداستارىمىزدان, اسىرەسە ولاردىڭ جاستار قاتارىنان كوپتەگەن ءوتىنىش حاتتار تۇسۋدە. قازاق ءتىلىن ۇيرەنۋ ءۇشىن ءبىزدىڭ پورتال قىزمەتىنە جۇگىنەتىن شەتەلدىك قازاقتار ورىس ءتىلىن, كيريلليتسانى بىلمەي قينالاتىندىقتارىن العا تارتادى. سوندىقتان ولار «Soyle.kz» پورتالىنىڭ اعىلشىنشا-لاتىنشا نۇسقاسىن جاساۋىمىزدى ءوتىنىپ وتىر. لاتىن ءالىپبيىنىڭ نۇسقاسى بەكىتىلە سالا ءبىز وسى پورتالدىڭ اعىلشىنشا-لاتىنشا نۇسقاسىن جاساۋعا كىرىسەمىز. وسى جۇمىستار ارقىلى شەتەلدەگى قانداستارىمىزعا انا ءتىلىن ۇيرەتەتىن بولساق, ال ءوز وتانداستارىمىز قازاق ءتىلىن لاتىن ءالىپبيى ارقىلى ۇيرەنۋگە, اعىلشىن ءتىلىن قوسا مەڭگەرۋگە مۇمكىندىك الادى.
كەلەسى جىلى ءىس قاعازدارىن قازاقشا جازىپ, قازاقشا تولتىرۋعا, ساۋاتتى ازىرلەۋگە ۇيرەتۋ ماقساتىندا «قۇجات ءتىلى» (Quzhat.kz) ونلاين پورتالىن اشۋ جوسپارىمىزدا بار. العاشقى ۇيىمداستىرۋ, جۇيەلەۋ جۇمىستارىن باستاپ تا كەتتىك.
ارينە اتقارىلار شارالار ءتىزىمى مۇنىمەن شەكتەلمەيدى. قور ۇجىمى ۇنەمى ىزدەنىس ۇستىندە. ەلىمىزدە مەملەكەتتىك ءتىل ءوزىنىڭ قوعامدىق-الەۋمەتتىك قىزمەتىن تولىققاندى اتقارۋى ءۇشىن, انا ءتىلىمىزدىڭ بەدەلىن, قاجەتتىلىگىن اتتىرۋ ءۇشىن توقتاۋسىز جۇمىس جاسايتىن بولامىز.
– اڭگىمەڭىزگە راحمەت.
– سىزگە دە راحمەت, وسى مۇمكىندىكتى پايدالانا وتىرىپ, بارشا قازاقستاندىقتاردى ەرتەڭگى كەلە جاتقان تىلدەر مەرەكەسىمەن قۇتتىقتايمىن, انا ءتىلىمىزدىڭ ابىرويى اسقاقتاي بەرسىن دەپ تىلەيمىن.
اڭگىمەلەسكەن
سۇلەيمەن مامەت,
«ەگەمەن قازاقستان»
