ءباسپاسوز ءماسليحاتىندا ءبىلىم جانە عىلىم مينيسترلىگىنىڭ عىلىم كوميتەتىنىڭ توراعاسى بولاتبەك ءابدىراسىلوۆ ەكسپو كورمەسىندە كورسەتىلگەن شەتەلدىك يننوۆاتسيالىق جوبالار مەن تەحنولوگيالاردى ەنگىزۋ جونىندە ارنايى ساراپتامالىق جۇمىس توبى قۇرىلعانىن جەتكىزدى. قۇرامىندا عىلىمي-زەرتتەۋلەر ورتالىعى مەن جوعارى وقۋ ورىندارىنىڭ عالىمدارى جانە ساراپشىلارى بار جۇمىس توبى جاڭعىرمالى ەنەرگيا, كۇن, جەل, بيوەنەرگەتيكا سالالارىنداعى جەتىستىكتەردى زەرتتەپ, كەلەشەك ۇرپاقتىڭ يگىلىگى ءۇشىن پايداسى مول جوبالاردى ىرىكتەپ, ءتيىستى ۇيىمدارعا ۇسىنباقشى. ب.ءابدىراسىلوۆتىڭ ايتۋىنشا, ءبىلىم سالاسىنا جاڭالىق اكەلەتىن تەحنولوگيالاردى مينيسترلىك ءۇش توپقا ءبولىپ قاراستىرىپ وتىر. ونىڭ ءبىرىنشىسى – عىلىمي يدەيالار مەن كوممەرتسيالىق قولجەتىمدى يننوۆاتسيالار لەگى بولسا, ەكىنشىسى – ءبىلىم تەحنولوگياسى نەمەسە ەكسپو مۇرالارىن ءتيىمدى پايدالانۋ, ءۇشىنشىسى – وسى سالاعا قاتىستى سوڭعى زەرتتەۋلەرگە نەگىزدەلگەن وقۋ-ادىستەمەلىك قۇرالدار جيىنتىعى.
جالپى, ەكسپو كورمەسىنە 55 ۋنيۆەرسيتەت پەن عىلىمي ورتالىق وكىلدەرى ارنايى قاتىسىپ, الەمدە جۇزەگە اسىرىلىپ جاتقان تاجىريبەلەرمەن تانىسىپ قايتىپتى. ماماندار شەتەلدىك ارىپتەستەرىمەن 100-دەن استام كەزدەسۋ وتكىزگەن. جۇزدەسۋلەر بارىسىندا ءبىلىم جانە عىلىم سالاسىندا 9 مەموراندۋمعا قول قويىلىپ, 20-دان استام كەلىسىم جاسالعان. اتاپ ايتقاندا, ءال-فارابي اتىنداعى قازاق ۇلتتىق ۋنيۆەرسيتەتى كورەيا, لاتۆيا ۋنيۆەرسيتەتتەرىمەن, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فرانتسيا, اقش وكىلدەرىمەن تەرموەلەكتر ماتەريالدارىنان جاسالعان قۇرالداردى قولدانۋ جونىندە كەلىسىمگە كەلگەن. سونداي-اق پولشا, ۆەنگريا, فينليانديا, چەحيا ەلدەرىمەن جاڭعىرمالى ەنەرگيا, سمارت-گريد, 3D-تەحنولوگيالارى بويىنشا كەلىسسوزدەر جۇرگىزىلگەن.
ەندى ءبىلىم جانە عىلىم مينيسترلىگى ەكسپو الاڭىندا كورسەتىلگەن ۇزدىك يدەيالىق شەشىمدەردى ءتيىمدى پايدالانىپ, ونىڭ ىشىندە ەڭ ۇتىمدىسىن ءىس جۇزىندە قولدانۋدى كوزدەپ وتىر. ءارى بۇل تەحنولوگيانىڭ ءبارىن مۇعالىمدەرگە, وقۋشىلارعا كەڭىنەن تانىستىراتىن ارنايى اقپاراتتىق پورتال ىسكە قوسىلماق. بيىل جىلدىڭ اياعىنا دەيىن اشىلعالى وتىرعان سايت كەلەشەكتە ءبىلىم جانە عىلىم سالاسىنداعى يننوۆاتسيالىق جوبالاردى جۇرتشىلىققا دارىپتەيتىن تانىمدىق اقپاراتتىق الاڭعا اينالماق.
قىمبات توقتامۇرات,
«ەگەمەن قازاقستان»
