اتا-بابانىڭ مۇراسىن ارقالاپ جۇرگەن ءداستۇرلى انشىلەردىڭ ونەرىن ناسيحاتتايتىن تەاتردىڭ جاڭا باسشىسى بولىپ جۋىردا عانا تاعايىندالعان بەلگىلى جىرشى, فولكلورتانۋشى-عالىم بەرىك ءجۇسىپ ەلىمىزدىڭ ءار ايماعىنان كەلگەن جيىرماعا جۋىق انشىمەن كەزدەسۋ وتكىزىپ, بىرلەسكەن مەموراندۋمعا قول قويدى. بۇل قۇجات بويىنشا ءداستۇرلى ونەر تەاترى ءار ولكەدە تۋىپ, وزىنشە قانات جايىپ, ءوز جولىمەن وركەندەپ كەلە جاتقان ايماقتاعى ءان مەن جىردىڭ زاماناۋي ماسەلەلەرىمەن اينالىسۋدى قىزمەتىنىڭ باستى قىرى ەتىپ الماق. قازاق جەرىندە قالىپتاسقان انشىلىك, كۇيشىلىك, جىرشىلىق مەكتەپتى ءارى قاراي دامىتىپ, ناسيحاتتاۋ ءىسى دە تەاتردىڭ جۇيەلى اينالىساتىن جوسپارداعى شارۋاسى بولىپ قالا بەرەدى. «بۇل مەموراندۋم وبلىستاعى انشىلەردىڭ جەكە كونتسەرتىن ۇيىمداستىرۋعا مۇمكىندىك بەرسە, ەڭ باستىسى, وڭىرلەردە تانىلماي جۇرگەن جاس تالانتتاردىڭ تۇساۋىن كەسىپ, ۇلكەن ساحنادا جارقىراي كورىنۋىنە جول اشادى» دەيدى تەاتردىڭ ديرەكتورى بەرىك ءجۇسىپ. جاڭا باسشىنىڭ باستاماسىمەن تاياۋ ارادا قازاقتىڭ ءان ونەرى بويىنشا كۋرستار ۇيىمداستىرۋ ماسەلەسى دە ءسوز بولدى.
ءداستۇرلى ونەردىڭ تىنىسىن اشىپ, قولتىعىنان دەمەپ, دارىپتەۋ ءۇشىن قۇرىلعان «الاتاۋ» تەاترىنىڭ ءبىر جىلدىعىنا وراي كونتسەرت ۇيىمداستىرىلىپ, جىردان شاشۋ شاشىپ, قۇلاق قۇرىشىن قاندىرا ءان اۋەلەتكەن كۇمىس كومەي, جەز تاڭداي انشىلەر كوپشىلىككە ناعىز ونەر جارمەڭكەسىن ۇسىندى. ءارتۇرلى ءان مەكتەبىنىڭ ۇلگىسىندە شەبەرلىگىن شىڭداپ جۇرگەن مۋزىكا مايتالماندارى قازاق ونەرىنىڭ ارقىرلى ەكەنىن, دامىتقان سايىن دارالىعى ايقىندالا تۇسەتىن بيىك قاسيەتىن بەدەرلەدى. قازاقستاننىڭ ەڭبەك سىڭىرگەن قايراتكەرى جانعالي جۇزباەۆ ايتقانداي, «تىڭدارماندار وسى كەشتە العاش رەت كۇي ورىنداۋ شەبەرلىگىنىڭ جەتى, انشىلەردىڭ بەس مەكتەبى مەن ەكى بىردەي جىرشى-جىراۋدىڭ ۇلگىسىن كورسەتكەن مىقتى ورىنداۋشىلاردى ءبىرىنشى رەت ءبىر مەزگىلدە, ءبىر ساحنادا كوردى». تۇس-تۇستان قوشامەت ءبىلدىرىپ, قيقۋ قوسقان كورەرمەننىڭ كوتەرمەلەگەنىنە ارقالانىپ العان انشىلەردىڭ ءوزى دە: وسىعان دەيىن ءداستۇرلى ونەر يەلەرىنىڭ باسى ءبىر جەردە ءدال وسىلاي توعىسپاعان ەدى دەستى.
ايگۇل احانبايقىزى,
«ەگەمەن قازاقستان»
الماتى
