العاشقى ماتچ قىركۇيەكتىڭ 15-ءى كۇنى ءوتىپ, «بارىس» 1:3 ەسەبىمەن ەسە جىبەردى. ماتچتىڭ ءبىرىنشى جانە ەكىنشى كەزەڭىندە كوماندالار قورعانىستا ءساتتى ويناپ, ءبىر-ءبىرىنىڭ قاقپاسىنا شايبا سوعا المادى. ماسەلەنىڭ ءبارى ءۇشىنشى كەزەڭدە شەشىلدى. «بارىستىڭ» كانادالىق شابۋىلشىسى مەتت فرەتتين ويىننىڭ 41-ءشى مينۋتىندا شايبا سوعىپ, كوماندامىزدى العا شىعارعان بولاتىن. ەكى كەزەڭدە شايبا سوعىلماعان سوڭ, ماماندار «بارىس» وسى ەسەپتى ساقتاپ, جەڭىسكە جەتەدى دەپ بولجاپ جاتقان. بىراق, «سيبير» ءبارىنىڭ اۋىزىنا قۇم قۇيدى. ارادان ەكى مينۋت وتكەندە قارسىلاس كوماندانىڭ ويىنشىسى پاتريك زاكريسسون ەسەپتى تەڭەستىرسە, الەكساندر بەرگسترەم 52-ءشى مينۋتتا تابلوداعى كورسەتكىشتى 2:1-گە جەتكىزدى. ماتچ اياقتالۋعا ءبىر مينۋت قالعاندا قوناق كوماندانىڭ حوككەيشىسى ۆياچەسلاۆ وسنوۆين ء«سيبيردىڭ» بۇل ويىنداعى سوڭعى شايباسىن سوقتى. قورىتىندى ەسەپ – 3:1.
اراعا ەكى كۇن سالىپ قوس كوماندا «بارىس ارەنادا» ەكىنشى رەت كەزدەستى. بۇل ماتچتا دا قوناقتار «بارىس» كلۋبىنان ايلاسىن اسىرىپ كەتتى. ءبىرىنشى كەزەڭنىڭ سەگىزىنشى مينۋتىندا يوناس ەنلۋند ماتچتاعى ەسەپتى اشتى. ارادا بەس مينۋت وتكەندە يۆان ۆەرەششاگين مەرگەندىگىمەن كوزگە ءتۇسىپ, ەسەپتى 2:0-گە جەتكىزدى.
ەكىنشى كەزەڭدە قوناقتار ساپىنداعى ۆلاديسلاۆ ناۋموۆ قاقپامىزعا ءۇشىنشى شايبانى سالدى. ال ويىن نۇكتەسىن 57-ءشى مينۋتتا ۆياچەسلاۆ وسنوۆين قويدى. ەسەپ – 4:0. ەكى ماتچ قورىتىندىسى بويىنشا جالپى ەسەپ – 7:1-گە جەتتى. ءسويتىپ, «بارىس» كومانداسى ءوز الاڭىندا ەكى ويىندا دا جەڭىلىسكە ۇشىرادى.
قۇرلىقتىق حوككەي ليگاسىنىڭ «شىعىس» ايماعىنداعى تۋرنير كەستەسىندە كوش باستاپ تۇرعان «بارىس» كومانداسى وسى جەڭىلىستەردەن سوڭ 19 ۇپايمەن بەسىنشى ورىنعا ءتۇسىپ قالدى. ءنوۆوسىبىردىڭ «سيبير» كلۋبى «بارىسپەن» بىردەي ۇپاي جيناپ, التىنشى ورىنعا كوتەرىلدى. بىراق ولاردىڭ «بارىستان» ءبىر ويىنى ارتىق.
ەندى «بارىس» حوككەي كلۋبى كەلەسى ويىنىن 21 قىركۇيەكتە مينسكىنىڭ «ديناموسىنا» قارسى وتكىزەدى. ماتچ «بارىس ارەنا» مۇز سارايىندا وتەدى.
ءالي بيتورە,
«ەگەمەن قازاقستان»
