ەلباسى تاۋەلسىزدىك العالى ايتىپ كەلەدى. ال 2012 جىلى «قازاقستان-2050» ستراتەگياسىندا لاتىنعا بىرتىندەپ كوشۋ جونىندەگى مىندەتتەر مەن ماقساتتار جانە مەرزىمدەر ايقىندالدى ەمەس پە؟! رۋحاني جاڭعىرۋ جونىندەگى ماقالاسىندا 2017 جىلدىڭ اياعىنا دەيىن جاڭا گرافيكانىڭ بىرىڭعاي ستاندارتتى نۇسقاسىن قابىلداۋ كەرەكتىگىن مالىمدەدى.
ءبىزدىڭ ويىمىزشا, ۇلتتىق ۇلى تىرلىكتەردە اسىققان دا زيان, كەشىككەن دە زيان. وزبەك پەن ازەربايجان باۋىرلار اسىقتى. قاتەلىكتەر كەزدەستى. ون ءتورت جىل بويى تۇزەتىپ كەلەدى. ايتەۋىر العا جىلجۋدا. ءبىز وسى باۋىرلاردىڭ قاتەلىكتەرىن قايتالاماۋعا ءتيىسپىز.
كيريلليتساعا وتكەندە قازاق ءتىلىنىڭ كوپتەگەن زاڭدىلىقتارى كەشىرىلمەستەي, دورەكى تۇردە بۇزىلدى. 1940 جىلدان باستاپ ستاليندىك رەفورمانىڭ زاردابىنان قايران قازاق ءتىلىنىڭ ايتىلۋ, جازىلۋ, ۇندەستىك, تەرميندەر جانە باسقا دا ماسەلەلەرىنە بايلانىستى جول بەرىلگەن ورەسكەلدىكتەرگە بىرتە-بىرتە ابدەن ۇيرەنىپ, ەتىمىز ءولىپ كەتتى. ەندى لاتىن الىپبيىنە كوشۋ كەزىندە كيريلليتسا كەلتىرگەن بارلىق زالال-زيانداردى تۇگەلدەي تۇزەتۋگە پارىزدارمىز. بۇل ءۇشىن ءتىل جونىندەگى ءتيىستى مەكەمەلەر, ءتيىستى عالىمدار كەيىنگى ون-ون بەس جىلدا جان كۇيدىرە جۇمىس ىستەۋگە مىندەتتى ەدى. ءالى دە كەش ەمەس. ءبىزدىڭ بەكسۇلتان نۇرجەكەەۆ سياقتى جازۋشىلاردىڭ دا ۇسىنىستارى مەن پىكىرلەرىن ەسكەرگەن ابزال.
راس, قيىندىقتار, كۇردەلى كۇرمەۋلەر كەزدەسەدى. وڭاي بولمايدى. «ساۋاتسىزدىق بەلەڭ الادى» دەگەندەي قاۋىپتەر دە كوپ ايتىلۋدا. قازىرگى كيريلليتسادا دا ساۋاتسىزدىقتىڭ سىرقاتتارى مەڭدەپ, دەندەپ تۇرعانىن تۇك تە ويلانبايمىز. ساۋاتتى جازاتىن ادامدار سيرەك. «كىتاپتار, اسىرەسە ادەبيەت وقىلماي قالادى» دەيتىندەر دە از ەمەس. كيريلليتسامەن جارىتىپ وقىپ جاتقاندار دا شامالى. شىن وقيتىندار اراب جازۋىنا وتسەك تە, ءتىپتى تونىكوكتەردىڭ تاڭباسىنا ورالساق تا, وقيدى. وقىمايتىندار, ءبارىبىر وقىمايتىن شىعار. كەيبىر سىرتقى كۇشتەر «قازاقستاندا كيريلليتساعا جانە ورىس تىلىنە شابۋىل باستالدى» دەپ بايبالام سالۋدا. قايران قازاق ءتىلى مەملەكەتتىك ءتىل بولىپ جاريالانعاندا دا ايقاي شىعارعاندار, ۇلت رۋحىن جاسىتىپ, جۋاسىتىپ تاستاعىسى كەلگەندەر تابىلعان. ارانداتۋشىلاردىڭ ايقايىنا سۇرەڭ قوسپاي, ولارعا بىرلىك پەن ىنتىماق, ۇمتىلىس پەن قۇلشىنىس ارقىلى جاۋاپ بەرەيىك.
مارحابات بايعۇت,
جازۋشى
