كەزدەسۋ اياسىندا ن.نىعماتۋلين اتاپ وتكەندەي, جاپونيامەن جان-جاقتى قاتىناستى دامىتۋ – قازاقستاننىڭ سىرتقى ساياساتىنداعى ماڭىزدى باسىمدىقتاردىڭ ءبىرى. بيىل ەكى ەل اراسىندا ديپلوماتيالىق قاتىناستىڭ ورناعانىنا 25 جىل تولدى. وسى ۋاقىت ىشىندە استانا مەن توكيو ءبىر-بىرىنە تىعىز قولداۋ كورسەتە وتىرىپ, ورتاق ماقساتتار جولىندا سەنىمدى ارىپتەستەر بولىپ كەلەدى.
ءماجىلىس توراعاسىنىڭ ايتۋىنشا, يادرولىق قارۋسىزدانۋ جانە تاراتپاۋ, اتوم ەنەرگياسىن بەيبىت ماقساتتا پايدالانۋ, باسقا دا حالىقارالىق وزەكتى ماسەلەلەر بويىنشا ءبىزدىڭ ەلدەرىمىزدىڭ ۇستانىمى وتە جاقىن. پالاتا سپيكەرى قازاقستان پرەزيدەنتى نۇرسۇلتان نازارباەۆتىڭ وتكەن جىلعى جاپونياعا رەسمي ساپارى بۇعان دەيىن قول جەتكىزىلگەن كەلىسىمدەردى بەكىتىپ, ەكى ەل اراسىنداعى ىنتىماقتاستىقتى كەڭەيتىلگەن ستراتەگيالىق ارىپتەستىك دەڭگەيىنە جەتكىزگەنىن اتاپ ءوتتى.
ءوز كەزەگىندە مارتەبەلى مەيمان جاپونيا قازاقستان پرەزيدەنتىنىڭ يادرولىق قارۋدى تاراتپاۋ جونىندەگى باستامالارىن جوعارى باعالايتىنىن ايتا كەلىپ, پرەزيدەنتتىڭ حالىقارالىق دەڭگەيدەگى وزەكتى ماسەلەلەر بويىنشا ماڭىزدى قادامدارىنا العىسىن ءبىلدىردى.
ن.نىعماتۋلين حالىقتىڭ قونىستانۋى جانە دامۋى ماسەلەسى بويىنشا پارلامەنتشىلەردىڭ جۇمىسىن ىنتالاندىرۋ مەن ىلگەرىلەتۋ بويىنشا فورۋمنىڭ اۋقىمدى جۇمىستار اتقارىپ كەلە جاتقانىن العا تارتا كەلىپ, ءبىزدىڭ دەپۋتاتتاردىڭ الداعى ۋاقىتتا دا حدپاف اياسىندا ارىپتەستەرمەن بەلسەندى ءىس-قيمىل جاساۋعا دايىن ەكەندىگىن ءبىلدىردى. كەزدەسۋ بارىسىندا تاراپتار بارلىق باعىت بويىنشا بايلانىستى تەرەڭدەتۋ جايىن ءسوز ەتىپ, سونىڭ ىشىندە «نۇر وتان» پارلامەنتتىك فراكتسياسى جانە ليبەرالدى-دەموكراتيالىق پارتياسى, بەيىندى كوميتەتتەر مەن ىنتىماقتاستىق جونىندەگى پارلامەنتارالىق توپتار ارقىلى پارلامەنتارالىق ارىپتەستىكتى نىعايتۋدىڭ قاجەتتىلىگىن اتاپ ءوتتى.
ءماجىلىس توراعاسى جيىن سوڭىندا ك.تاكەميدىڭ ساپارى ءبىزدىڭ ەلدەرىمىزدىڭ ەكىجاقتى قارىم-قاتىناسىن ودان ءارى تەرەڭدەتۋگە ىقپال ەتەتىنىنە سەنىم ءبىلدىردى.
