سالتاناتتى ءىس-شاراعا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, ۆاتيكان, گەرمانيا سەكىلدى بىرقاتار مەملەكەتتەردىڭ ەلشىلەرى, قازاقستانداعى ليۋتەران قاۋىمداستىعىنىڭ پاس-تورلارى, دياكوندارى مەن مۇشەلەرى, سونداي-اق ەلىمىزگە بەلگىلى وزگە دە ادامدار قاتىستى.
اشىلۋ راسىمىندە ءسوز العان ءدىن ىستەرى جانە ازاماتتىق قوعام ءمينيسترى ء«ماسىح» شىركەۋىنىڭ ەلىمىزگە رۋحاني ساۋلە شاشىپ قانا قويماي, جاقسى داستۇرلەردىڭ كوبەيۋىنە ىقپال ەتەتىندىگىنە سەنىم ءبىلدىردى. سونىمەن قاتار, ول مۇنداي عيباداتحانانىڭ اشىلۋى قازاقستان حالقىنىڭ تاتۋلىعى مەن اۋىزبىرشىلىگىنىڭ كەلىستى ءبىر كورىنىسى ەكەنىن ايتتى.
– جاڭا ەۆانگەليا-ليۋتەران شىركەۋىنىڭ اشىلۋىمەن شىن جۇرەكتەن قۇتتىقتايمىن. بۇل عيمارات پروتەستانتتىق شىركەۋ وكىلدەرىنىڭ ومىرىندە ەرەكشە كۇن بولىپ ەسەپتەلەتىن رەفورماتسيانىڭ 500 جىلدىعى قارساڭىندا اشىلىپ وتىر. ال رەفورماتسيا ەۋروپانىڭ دامۋىنا ۇلكەن سەپتىگىن تيگىزدى. سوندىقتان جاڭا عيباداتحانادا جاسامپازدىق پەن ەلىمىزدىڭ دامۋىنا باعىتتالعان ۋاعىزدار ءجيى ايتىلادى دەپ ۇمىتتەنەمىن, – دەدى نۇرلان ەرمەكباەۆ.
ليۋتەرانداردى قۇتتىقتاۋ ءۇشىن وزگە دە شىركەۋلەردىڭ وكىلدەرى قاتىستى. ولاردىڭ اراسىندا پراۆوسلاۆيە شىركەۋىنىڭ استانا ەپارحياسىنىڭ ۆاكاريى, تالدىقورعان ەپيسكوپى نەكتاري جىلى لەبىزدەرىن ءبىلدىرىپ جاتتى.
ايتا كەتەيىك, ەۆانگەليا-ليۋتەران شىركەۋىن سالۋعا بايلانىستى 2014 جىلى ارنايى جەر تەلىمى ءبولىندى. جوبانىڭ باس ساۋلەتشىسى – ريمما سلوبودسكايا. كەشەن ەكى عيماراتتان تۇرادى. عيباداتحانا ىشىندە ءبىر مەزەتتە 120 ادام قۇلشىلىق ەتە الادى. شىركەۋدىڭ جەرتولەسىندە جاستاردىڭ ءبىلىم الۋى ءۇشىن بارلىق جاعداي قاراستىرىلعان.
ايان ءابدۋالي,
«ەگەمەن قازاقستان»
