ەكى اپتا ىشىندە دومينيك پەن باربارا ليتۆا, لاتۆيا, رەسەيدەن ءوتىپ, قازاقستانعا – باتىس قاقپا ورال قالاسىنا جەتىپتى. ينتەرنەت ارقىلى الدىن الا تاپسىرىس بەرىپ قويعان حوستەلىن تابا الماي جۇرگەن شەتەلدىكتەردى بەرىك شادىعالي ەسىمدى ورالدىق تۇرعىن كەزدەستىرىپ, ءوز ۇيىنە اكەلىپ, قوندىرىپ, قوناق ەتىپتى.
– سارىتاۋ جاقتا اداسىپ ءجۇر ەكەن, ينتەرنەت ۇستامايدى, قازاقستاننىڭ sim-كارتاسى جوق. كوشى-قون پوليتسياسىنا اپارىپ, قۇجاتتارىن رەتتەپ, قالامىزدى ارالاتتىم. ۇلتتىق اسىمىزدى بەرىپ, كەلەسى كۇنى شىعارىپ سالدىم, – دەيدى ب.شادىعالي.
ساياحاتشىلار ورتاعاسىرلىق جايىق قالاسىنىڭ ورنىن كورىپ, وبلىستىق ولكەتانۋ مۋزەيىن تاماشالاعان. ورال قالاسىنىڭ كونە عيماراتتارىنا ءسۇيسىنىپ, جاڭا الاڭنىڭ ساۋلەتىن دە ۇناتىپتى. «اسىرەسە ولكەتانۋ مۋزەيىندەگى جادىگەرلەرگە قاتتى تاڭ قالىپ كەتتى», دەيدى قوناقجاي وتاعاسى.
دومينيك پەن باربارا Facebook الەۋمەتتىك جەلىسىندە Wystopili - Autostopem do Azji اتتى پاراقشا اشىپ, كۇندەلىك جۇرگىزىپ ءجۇر ەكەن. كەشەگى جازباسىندا ورالدىق دوسى بەرىكتىڭ, جالپى قازاق حالقىنىڭ قوناقجايلىعىنا العىس ايتىپتى.
قازبەك قۇتتىمۇرات ۇلى,
«ەگەمەن قازاقستان»
ورال
