ساپار اياسىندا كەلىسسوزدەر جۇرگىزىلىپ, بىرقاتار ەكىجاقتى كەلىسىمدەرگە قول قويىلدى. ەكى ەل باسشىلارى وڭىرلىك كۇن تارتىبىندەگى نەگىزگى اسپەكتىلەردى جانە قارىم-قاتىناستى نىعايتۋ ماسەلەلەرىن تالقىلادى.
ىنتىماقتاستىق ارتا ءتۇستى
وزبەكستان بيلىگىنە شاۆكات ميرزيوەۆ كەلگەننەن بەرى ەكى ەل اراسىنداعى قارىم-قاتىناستىڭ جيىلەي تۇسكەنى راس. بۇل ەلگە جاڭا پرەزيدەنت سايلانعاننان كەيىنگى العاشقى بولىپ مەملەكەتتىك ساپار جاساپ وتىرعان دا قازاقستان پرەزيدەنتى ەكەن. جالپى شاۆكات ميرزيوەۆ ءبىزدىڭ ەلمەن بايلانىستى بەكەمدەي تۇسۋگە ايرىقشا مۇددەلى ەكەنى بيىلعى ناۋرىزداعى قازاقستان ساپارىنان دا ايقىن اڭعارىلعان بولاتىن. سول ساپاردىڭ اياسىندا دا كوپتەگەن قۇجاتقا قول قويىلىپ, قازاق-وزبەك قاتىناسى جاڭا بەلەسكە قادام باسقان ەدى. از ۋاقىت ىشىندە ەكى ەل پرەزيدەنتتەرىنىڭ التى مارتە جۇزدەسۋىنىڭ ءوزى ەلدەر اراسىندا شەشىمىن كۇتكەن كوپ ماسەلەنىڭ جينالىپ قالعانىن, ۋاقىت وزدىرماي كوپتەگەن كەلىسىمدەرگە قايتا قول قويىپ, ىنتىماقتاستىققا جاڭاشا سەرپىلىس جاساۋدىڭ قاجەتتىلىگى بولعانىن كورسەتەدى.
وزبەك اعايىندار قازاقستان پرەزيدەنتىنىڭ وسى ساپارىن دا ەرەكشە باعالاپ, كورشىسىنىڭ كوشباسشىسىن كۇتىپ الۋعا اسا ءبىر ىجداعاتتىلىقپەن دايىندالعانعا ۇقسايدى. تاشكەنت كوشەلەرىندە ءجيى ىلىنگەن كوز سۇرىندىرەر كوك تۋلارىمىز, قازاق باۋىرلارىنا «قوش كەلدىڭ» ايتقان بيلبوردتار, ءتىپتى ولاردىڭ, قازاق تىلىندە جازىلۋىنىڭ ءوزى كورشىنىڭ بىزگە دەگەن كولدەي كوڭىلىن كورسەتكەندەي.
قازاقستان پرەزيدەنتى نۇرسۇلتان نازارباەۆتى تاشكەنت اۋەجايىنان وزبەكستان پرەزيدەنتى شاۆكات ميرزيوەۆ قارسى الدى. مەملەكەتتىك ساپارعا لايىق جول-جورالعىسى, رەسمي راسىمدەرى جاسالعان سوڭ پرەزيدەنتتەر وزبەكستان حالقىنىڭ جالپىۇلتتىق سيمۆولى بولىپ سانالاتىن «تاۋەلسىزدىك جانە گۋمانيزم» مونۋمەنتىنە گۇل شوعىن قويدى. ودان سوڭ مەملەكەت باسشىسى وزبەكستان پرەزيدەنتىمەن بىرگە تاشكەنت قالاسىنىڭ ەڭ كورنەكتى ورىندارىنىڭ ءبىرى سانالاتىن «تولە بي كەسەنەسى» ساۋلەت كەشەنىنە باردى. كەسەنەدە قازاقتىڭ اتاقتى تاريحي قايراتكەرى تولە بي جەرلەنگەن. بۇل ساۋلەت ەسكەرتكىشى – قازىرگى تاشكەنت اۋماعىنداعى ەڭ كونە ەسكەرتكىش. كەسەنە XV عاسىردىڭ ءبىرىنشى جارتىسىندا سالىنعان-دى.
ساۋلەت كەشەنىن ارالاعان سوڭ نۇرسۇلتان نازارباەۆ پەن شاۆكات ميرزيوەۆ بۇقارالىق اقپارات قۇرالدارى ءۇشىن قىسقاشا بريفينگ وتكىزدى. وندا مەملەكەتتەر باسشىلارى باۋىرلاس ەلدەر اراسىنداعى ءوزارا قارىم-قاتىناستىڭ جاڭا كەزەڭى باستالعانىن مالىمدەدى. ودان سوڭ پرەزيدەنتتەر «وزبەكستان-قازاقستان: ىنتىماقتاستىقتىڭ جاڭا كەزەڭى» اتتى ونەركاسىپ كورمەسىن ارالاپ كوردى. وندا مەملەكەتتەر باسشىلارى قازاقستاندىق تاۋار وندىرۋشىلەردىڭ ونىمىمەن تانىستى. كورمەدە اسكەري-تەحنيكا, اۆياتسيا, فارماتسەۆتيكا, توقىما ءوندىرىسى, قۇرىلىس, سونداي-اق ماشينا جاساۋ, اۆتوموبيل قۇراستىرۋ جانە ءىت سالالارىنداعى قازاقستاندىق 50-دەن استام ءىرى كومپانيالاردىڭ ەكسپورتقا ارنالعان ونىمدەرى قويىلعان ەكەن.
بۇل كۇنى قازاقستان پرەزيدەنتى وزبەكستاننىڭ بۇرىنعى پرەزيدەنتى يسلام كارىموۆتىڭ ەسكەرتكىشىنە گۇل شوعىن قويۋ راسىمىنە دە قاتىستى. وزبەكستاننىڭ تۇڭعىش پرەزيدەنتىنە ارنالعان مونۋمەنت تاشكەنتتە «اقساراي» رەزيدەنتسياسىنىڭ الدىنا قويىلىپ, 2017 جىلعى 31 تامىزدا اشىلعان بولاتىن.
كەلەلى كەلىسسوزدەر
ەلباسىنىڭ وزبەكستانعا مەملەكەتتىك ساپارى اياسىندا ەل كوشباسشىلارى ەكىجاقتى جانە كەڭەيتىلگەن قۇرامدا كەلىسسوزدەر وتكىزدى. كەزدەسۋدە وزبەكستان پرەزيدەنتى شاۆكات ميرزيوەۆ قازاقستان پرەزيدەنتى نۇرسۇلتان نازارباەۆقا شىنايى ريزاشىلىعىن ءبىلدىرىپ, بارشا قازاقستان حالقىنا دەگەن زور قۇرمەتىن جەتكىزدى.
«وسى جىلدى ەكى ەلدىڭ قارىم-قاتىناسىنداعى تاريحي جىل دەپ ايتۋعا تولىق نەگىز بار. مەملەكەتتەرىمىز اراسىندا ەكونوميكانىڭ بارلىق سالاسى بويىنشا ايتارلىقتاي ىلگەرىلەۋشىلىك بايقالۋدا. بۇل ءبىزدىڭ التىنشى كەزدەسۋىمىز. ول باۋىرلاس ەكى ەل اراسىنداعى دوستىق نيەتتى بىلدىرەدى», دەدى وزبەكستان پرەزيدەنتى.
شاۆكات ميرزيوەۆ قازاقستاننىڭ ەكسپو-2017 حالىقارالىق كورمەسىن جانە يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى ءسامميتىن جوعارى دەڭگەيدە وتكىزۋى نۇرسۇلتان نازارباەۆتىڭ بيىك بەدەلىنىڭ ارقاسىندا مۇمكىن بولعانىن اتاپ ءوتتى.
قازاقستان پرەزيدەنتى وزبەك كوشباسشىسىنا ساپارمەن كەلۋگە شاقىرعانى جانە قوناقجايلىق تانىتقانى ءۇشىن ريزاشىلىق ءبىلدىرىپ, ەكىجاقتى قارىم-قاتىناستاردىڭ قارقىندى دامىپ كەلە جاتقانىن, سونداي-اق ونى ودان ءارى كەڭەيتۋدىڭ الەۋەتى زور ەكەنىن ايتتى.
ء«سىز از ۋاقىت ىشىندە ەكىجاقتى قارىم-قاتىناستى تابىستى دامىتۋعا زور ۇلەس قوستىڭىز. ءبىز كەزدەسۋلەرىمىزدىڭ ارقاسىندا كوپتەگەن تۇيتكىلدى ماسەلەلەردى شەشە الدىق. ءبىزدىڭ ءتىلىمىز, مادەنيەتىمىز, ءدىنىمىز ورتاق. سوندىقتان بىزدە تىعىز ىنتىماقتاسۋدان باسقا جول جوق. ءوزارا ءىس-قيمىلىمىز ءتيىمدى بولۋ ءۇشىن ناقتى ىستەر اتقارىپ, ءبىر-ءبىرىمىزدى قولداۋىمىز قاجەت», دەدى مەملەكەت باسشىسى.
نۇرسۇلتان نازارباەۆ وزبەكستاننىڭ وڭىردە ماڭىزدى ءرول اتقاراتىنىنا ەرەكشە توقتالىپ, شاۆكات ميرزيوەۆتىڭ ەكى ەلدىڭ ىسكەرلىك ىنتىماقتاستىعىن جانداندىرۋعا ايرىقشا ۇلەس قوسقانىن اتاپ ءوتتى.
ء«سىز پرەزيدەنت لاۋازىمىنداعى ءبىر جىل ىشىندە كوپ جۇمىس اتقاردىڭىز. ءسىزدىڭ ۆاليۋتالىق رەتتەۋ, شەكارانى اشۋ, بيزنەستى دامىتۋ ءۇشىن جاعداي جاساۋ جونىندە قابىلداعان شەشىمدەرىڭىزدى تاريحي شەشىمدەر دەپ اتاۋعا بولادى. ءبىزدىڭ ىسكەرلىك قارىم-قاتىناستارىمىز ءوزارا ءتيىمدى جاعدايلارعا نەگىزدەلۋگە ءتيىس», دەدى قازاقستان پرەزيدەنتى.
سونداي-اق كەلىسسوز بارىسىندا ساۋدا-ەكونوميكالىق, ينۆەستيتسيا, اۋىل شارۋاشىلىعى, كولىك-ترانزيت, اسكەري-ونەركاسىپ جانە مادەني-گۋمانيتارلىق سالالارىنداعى ەكى ەل اراسىنداعى ىنتىماقتاستىقتى نىعايتۋ ماسەلەلەرى تالقىلاندى.
كولىك قاتىناسى كۇشەيدى
قازاقستان پرەزيدەنتىنىڭ وزبەكستان رەسپۋبليكاسىنا مەملەكەتتىك ساپارىنىڭ قورىتىندىسى بويىنشا ەكى ەلدىڭ باسشىلارى قاتىسقان ارنايى ءباسپاسوز ءماسليحاتى ءوتتى. وندا نۇرسۇلتان نازارباەۆ جوعارى دەڭگەيدەگى تۇراقتى كەزدەسۋلەر يگى داستۇرگە اينالعانىنا توقتالىپ, وزبەكستانعا جاساعان وسى ساپارىن تاريحي ساپار دەپ اتادى. «از عانا مەرزىمدە وسىمەن التىنشى رەت جۇزدەسىپ وتىرمىز. بۇل – ءبىزدىڭ ستراتەگيالىق سەرىكتەستىگىمىزدىڭ, ەكىجاقتى قارىم-قاتىناستاردىڭ قارقىندى دامۋىنىڭ جارقىن مىسالى», دەدى مەملەكەت باسشىسى.
نۇرسۇلتان نازارباەۆ شاۆكات ميرزيوەۆپەن جاسالعان ۋاعدالاستىقتاردىڭ قورىتىندىلارى بويىنشا ەكى ەل اراسىنداعى ىنتىماقتاستىقتى, سونىڭ ىشىندە كولىك سالاسىنداعى بايلانىستاردى نىعايتۋعا قاتىستى قول جەتكىزىلگەن ناتيجەلەرگە نازار اۋداردى.
«قازىردىڭ وزىندە ۋاعدالاستىقتارىمىزدىڭ ناقتى ناتيجەلەرى كورىنە باستادى. ماسەلەن, اپتاسىنا ەكى رەت الماتى مەن تاشكەنت اراسىندا «تۇلپار-تالگو» جۇردەك پويىزى قاتىنايدى. ءبىزدىڭ ۇلتتىق اۋە تاسىمالداۋشىلارىمىز ەكى ەلدىڭ استانالارى اراسىندا قوسىمشا رەيستەر اشتى, الداعى ۋاقىتتا باسقا دا قالالارىمىز اراسىندا اۋە قاتىناسى ورنايدى. تۇراقتى اۆتوبۋس قاتىناسى بار. ءىرى مەملەكەتارالىق اۆتوجولدى جوندەۋ جۇمىستارى جۇرگىزىلۋدە. م-39 اۆتودالىزىندە ەكى وتكىزۋ پۋنكتى اشىلدى. قازاقستان-وزبەكستان ىنتىماقتاستىعىنىڭ اياسىندا اۆتوموبيل قۇراستىرۋ جونىندەگى جوبا جۇزەگە اسىرىلدى», دەدى قازاقستان پرەزيدەنتى.
تاۋار اينالىمى ارتتى
سونىمەن قاتار, ەلباسى كەڭ اۋقىمدى باعىتتار بويىنشا ەكىجاقتى قاتىناستاردى جانداندىرۋ ءوزارا تاۋار اينالىمىنا وڭ ىقپال ەتكەنىن اتاپ ءوتتى.
بۇل رەتتە وزبەكستاننىڭ يمپورتتالاتىن تاۋارلاردىڭ كەيبىر تۇرىنە اكتسيزدى تومەندەتۋ تۋرالى شەشىمى ساۋدا ىنتىماقتاستىعىن جانداندىرۋ جولىندا جاسالعان وڭ قادام بولعانىن, ناتيجەسىندە بيىلعى 7 ايدىڭ ىشىندە ەكىجاقتى ساۋدا 35%-عا وسكەنىن تىلگە تيەك ەتتى. «بۇل – وتە جاقسى ناتيجە. 2020 جىلعا قاراي تاۋار اينالىمىن 5 ملرد دوللارعا جەتكىزۋ مىندەتى قويىلدى. وسىعان وراي, ۇكىمەتتەرىمىزگە ءوزارا ءتيىمدى ىنتىماقتاستىقتى جانداندىرۋ جانە پايدالانىلماعان بارلىق رەزەرۆتى جۇمىلدىرۋ جونىندە تاپسىرما بەرىلدى», دەدى نۇرسۇلتان نازارباەۆ.
قازاقستان پرەزيدەنتى سونداي-اق ەنەرگەتيكا سالاسىنداعى ينۆەستيتسيالىق سەرىكتەستىك پەن ىنتىماقتاستىقتى كەڭەيتۋ قاجەتتىگىنە نازار اۋداردى.
«ورتامەرزىمدى پەرسپەكتيۆادا بىرلەسكەن 2-3 ءىرى ينۆەستيتسيالىق جوبانى ىسكە اسىرۋعا ۋاعدالاستىق. ەلدەرىمىزدىڭ گاز سالاسىنداعى ىنتىماقتاستىعى ءتيىمدى دامىپ كەلەدى. ۇكىمەتتەرىمىزگە ەكىجاقتىڭ مۇددەسىنەن شىعاتىن جاڭا گاز جوبالارىن پىسىقتاۋ تاپسىرىلدى», دەدى ەلباسى.
مەملەكەت باسشىسى ەكى ەل اراسىنداعى بايلانىستاردى كەڭەيتۋگە سەپتىگىن تيگىزەتىن وڭىرارالىق ىنتىماقتاستىق فورۋمىن تۇراقتى تۇردە وتكىزۋدىڭ ماڭىزدىلىعىن دا اتاپ ءوتتى. عارىش يندۋسترياسىن دامىتۋ بويىنشا بىرلەسە جۇمىس جاساپ, وسى سالادا ءوزارا ءتيىمدى بايلانىستار ورناتۋ قاجەتتىگىن ايتتى.
سۋ ماسەلەسى شەشىلەدى
قازاقستان پرەزيدەنتى ءباسپاسوز ءماسليحاتىندا وزبەكستان پرەزيدەنتىمەن سۋ ماسەلەسىن كەڭىنەن تالقىلاعانىنا توقتالدى.
«بۇل ماسەلە بۇكىل ورتالىق ازيا ءوڭىرىنىڭ ودان ءارى دامۋى ءۇشىن ايرىقشا ماڭىزعا يە. ورتالىق ازيانىڭ شەكاراارالىق سۋ رەسۋرستارى وڭىردەگى بارلىق حالىقتاردىڭ ورتاق مۇراسى مەن يگىلىگى بولىپ تابىلاتىنىن اتاپ وتكەن ءجون», دەدى نۇرسۇلتان نازارباەۆ. سونىمەن قاتار, مەملەكەت باسشىسى وزبەكستان پرەزيدەنتىمەن ارال تەڭىزىنىڭ جاعدايىنا قاتىستى كەلىسسوزىنىڭ قورىتىندىسى تۋرالى ايتتى.
«كەلەسى جىلى حالىقارالىق ارالدى قۇتقارۋ قورىنا 25 جىل تولادى. قازىر ول ارال ماسەلەسى جونىندەگى بىردەن-ءبىر مەملەكەتارالىق تەتىك بولىپ تابىلادى. وسىعان وراي ءبىز قوردىڭ جۇمىسىن جانداندىرۋ قاجەتتىگى جونىندەگى ۇستانىمدارىمىز ورتاق ەكەنىن راستادىق. اتاپ ايتقاندا, ءبىز 2018 جىلى جوعارى دەڭگەيدە كەزدەسۋ وتكىزىپ, ارىپتەستەرىمىزبەن بىرگە بارشامىزعا ورتاق وسى ماسەلەنى شەشۋدىڭ ءوزارا ءتيىمدى جولدارىن تالقىلاۋعا نيەتتى ەكەنىمىزدى بىلدىردىك, دەدى ەلباسى.
ۇستانىمىمىز ۇقساس
نۇرسۇلتان نازارباەۆ كەلىسسوزدەر بارىسىندا وڭىرلىك جانە حالىقارالىق كۇن تارتىبىندەگى وزەكتى ماسەلەلەرگە ەرەكشە نازار اۋدارىلعانىنا توقتالىپ, كوپتەگەن حالىقارالىق وقيعالارعا قاتىستى قازاقستان مەن وزبەكستاننىڭ ۇستانىمى ۇقساس ەكەنىن اتاپ ءوتتى.
ء«بىز كوپجاقتى فورماتتا, سونىڭ ىشىندە قازاقستاننىڭ بۇۇ-نىڭ قاۋىپسىزدىك كەڭەسىندەگى مۇشەلىگى اياسىندا ءوزارا ءىس-قيمىل جاساۋدىڭ ماسەلەلەرىن قاراستىردىق. اۋعانستانداعى جاعدايعا بايلانىستى وڭىردە قاۋىپسىزدىكتى قامتاماسىز ەتۋ ماسەلەلەرىنە قاتىستى پىكىر الماستىق. يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى استانا ءسامميتىنىڭ قورىتىندىلارىن, سونداي-اق تاشكەنتتىڭ يسلام ىنتىماقتاستىعى ۇيىمىنىڭ وسىنداي ءسامميتىن وزبەكستاندا وتكىزۋ تۋرالى باستاماسىن تالقىلادىق», دەدى پرەزيدەنت.
رۋحاني مۇددە ورتاق
مەملەكەت باسشىسى, سونداي-اق ەكى ەل اراسىندا مادەني-گۋمانيتارلىق بايلانىستاردى دامىتۋدىڭ ماڭىزدى ەكەنىن ايتتى.
ء«بىزدىڭ تىعىز مادەني-گۋمانيتارلىق بايلانىستارىمىز دوستىق قارىم-قاتىناستارىمىزدىڭ ماڭىزدى فاكتورى بولىپ سانالادى. ءبىز 2018 جىلى قازاقستاندا وزبەكستان جىلىن وتكىزۋگە كەلىستىك. وزبەكستاندا قازاقستان جىلىن دا وتكىزۋ كۇن تارتىبىندە تۇر. وسى باستامالار اياسىندا ءتۇرلى ءىس-شارالار وتكىزىلىپ, ولار باۋىرلاس حالىقتارىمىزدىڭ جاقىنداستىعىن ودان ءارى تەرەڭدەتۋگە سەپتىگىن تيگىزەدى», دەدى نۇرسۇلتان نازارباەۆ.
مەملەكەت باسشىسى ساپار قورىتىندىلارىن جوعارى باعالاپ, ونىڭ قازاقستان مەن وزبەكستان اراسىنداعى ءداستۇرلى تاتۋ كورشىلىك, دوستىق جانە سەنىمگە نەگىزدەلگەن بايلانىستار مەن سەرىكتەستىكتى ودان ءارى نىعايتۋعا سەرپىن بەرەتىنىنە سەنىم ءبىلدىردى.
«قازاقستان مەن وزبەكستان كوشباسشىلارىنىڭ بىرلەسكەن مالىمدەمەسىن قابىلدادىق. ۇكىمەتتەرىمىز قازاقستان-وزبەكستان قارىم-قاتىناسى مەن ىنتىماقتاستىعىن ودان ءارى دامىتۋعا باعىتتالعان بىرقاتار ەكىجاقتى قۇجاتتارعا قول قويدى, دەدى مەملەكەت باسشىسى.
ەلباسى قازاقستان دەلەگاتسياسىنىڭ جانە جەكە ءوزىنىڭ اتىنان وزبەك حالقىنىڭ ءوسىپ-وركەندەۋىنە نيەتتەستىك ءبىلدىرىپ, بارلىق باستامالارىنا تابىس تىلەدى. سونداي-اق ەكىجاقتى جانە كوپجاقتى قارىم-قاتىناستارعا قولداۋ بىلدىرەتىنىن ايتتى.
«عاسىرلار توعىسىندا» وزبەكشە «سويلەدى»
وزبەكستان پرەزيدەنتى قازاقستان پرەزيدەنتىنە نيەتتەستىگى ءۇشىن العىس ايتىپ, نۇرسۇلتان نازارباەۆتىڭ ۇلتارالىق جانە وڭىرارالىق قاقتىعىستاردى شەشۋدەگى بىتىمگەرشىلىك ءرولىن ەرەكشە اتاپ ءوتتى.
ء«سىزدىڭ «عاسىرلار توعىسىندا» اتتى كىتابىڭىز وزبەك تىلىنە اۋدارىلدى. مەن سىزگە سول كىتاپتى ىستىق ىقىلاسپەن كورسەتكىم كەلەدى», دەدى شاۆكات ميرزيوەۆ.
وزبەكستان كوشباسشىسى بۇل كىتاپتى 1996 جىلى جيزاق وبلىسىنىڭ حوكيمى بولىپ تۇرعاندا وقىعانىن ايتىپ, نۇرسۇلتان نازارباەۆتىڭ كىتابىنان ءۇزىندى كەلتىردى. كىتاپتىڭ «قازاقتار تالاي جەردە تۇتاسىمەن قىرىلىپ كەتۋگە شاق قالدى. بىراق ومىرگە قۇشتارلىق, ازاتتىققا قۇشتارلىق قايتادان جىعىلعان ەڭسەنى كوتەرىپ, تاۋەكەلگە بەل بۋعىزدى. مەن ءوز حالقىمدى سۇيەمىن. ونىڭ مەنى بالا كەزىمنەن سابىر مەن پاراساتقا باۋلىعانىن ماقتانىش تۇتامىن. بەيبىت تاسىلدەرگە عانا جۇگىنىپ, شيەلەنىس پەن كيكىلجىڭنىڭ ەرەجەلەرىنە مويىن ۇسىنعىم كەلمەيتىندىگى دە سوندىقتان», دەگەن جولدارىن وزبەكستان باسشىسى تەبىرەنە وقىپ بەردى. سونداي-اق شاۆكات ميرزيوەۆ بۇل كىتاپتىڭ وزبەكستاننىڭ مەملەكەتتىك باسقارۋ اكادەمياسىندا وقۋ ۇدەرىسى بارىسىندا پايدالانىلاتىنىن اتاپ ءوتتى.
ء«بىز ءۇشىن استانا قازاقستان پرەزيدەنتىمەن استاساتىن ۇعىم. استانا – ءسىزدىڭ وتانىڭىزعا دەگەن سۇيىسپەنشىلىگىڭىزدىڭ كورسەتكىشى. مەن ءسىزدى ماقتان تۇتامىن» دەدى وزبەكستان باسشىسى.
وزبەكتىڭ «توسىن سىيى»
قازاقستان پرەزيدەنتى نۇرسۇلتان نازارباەۆ وزبەكستان رەسپۋبليكاسىنىڭ «ەل يۋرت حۋرماتى» («حالىق پەن وتان قۇرمەتى») وردەنىمەن ماراپاتتالدى. وردەندى ەلباسىنا وزبەكستان پرەزيدەنتى شاۆكات ميرزيوەۆ تابىستادى. وردەن جونىندەگى توسىن جاڭالىقتى وزبەك باسشىسى ءباسپاسوز ءماسليحاتى اياقتالعاندا ايتتى. «كەشە مەن جارلىققا قول قويدىم. سونىڭ ءماتىنىن وقىپ بەرۋگە رۇقسات ەتىڭىز», دەدى شاۆكات ميرزيوەۆ.
«نۇرسۇلتان ءابىش ۇلى نازارباەۆ – الەمدىك دەڭگەيدەگى كورنەكتى مەملەكەت جانە ساياسي قايراتكەر, تاۋەلسىز قازاقستان رەسپۋبليكاسىنىڭ نەگىزىن قالاۋشى. ۇلت كوشباسشىسىنىڭ دانا باسشىلىعىمەن قازاقستان الەمدىك قوعامداستىقتا لايىقتى ورىنعا يە بولىپ, بۇگىندە نارىقتىق ەكونوميكاسى قۋاتتى ءارى ازاماتتىق قوعامى اشىق قارقىندى دامىعان دەموكراتيالىق مەملەكەت بولىپ سانالادى. قازاقستان پرەزيدەنتى ءبىزدىڭ تاۋەلسىز مەملەكەتتەرىمىزدىڭ تاتۋ كورشىلىك پەن ءوزارا تۇسىنىستىك قارىم-قاتىناستارىن قالىپتاستىرۋدىڭ باستاۋىندا بولدى. نۇرسۇلتان نازارباەۆتىڭ زور جەكە ۇلەسىنىڭ ارقاسىندا باۋىرلاس وزبەك جانە قازاق حالىقتارى اراسىنداعى دوستىق پەن ىنتىماقتاستىقتىڭ بەرىك كوپىرى جاسالدى. وسى نەگىزدە قازىرگى ۋاقىتتا ەلدەرىمىزدىڭ ءوزارا ءتيىمدى جانە جەمىستى بايلانىستارى نىعايىپ كەلەدى. ءبىزدىڭ ەلدەرىمىز اراسىنداعى ءداستۇرلى دوستىق قارىم-قاتىناس پەن ستراتەگيالىق سەرىكتەستىكتى نىعايتىپ, ونى كەڭەيتۋگە, سونداي-اق بەيبىتشىلىك پەن دامۋ جولىنداعى حالىقارالىق ىنتىماقتاستىقتى ارتتىرۋعا قوسقان زور ۇلەسى ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ «ەل يۋرت حۋرماتى» وردەنىمەن ماراپاتتالسىن» دەلىنگەن جارلىقتا.
مەملەكەت باسشىسى ءوز كەزەگىندە شاۆكات ميرزيوەۆكە جانە بارشا وزبەك حالقىنا شىن نيەتپەن اسا ماڭىزدى ماراپات ءۇشىن العىس ءبىلدىردى.
«مەن شەتەلدەردىڭ دە, ەلىمىزدىڭ دە كوپتەگەن ماراپاتىنا يە بولدىم, الايدا بۇل ماراپاتتىڭ ورنى ەرەكشە. ويتكەنى كورشى مەملەكەتتىڭ جوعارى باعاسىنا يە بولۋ زور مارتەبە. مەن ءۇشىن بۇل توسىن سىي. ءبىز ءاردايىم وزبەك حالقىمەن قۋانىشتى دا, قايعىنى دا بىرگە بولىسەتىنىمىزدى اتاپ وتكىم كەلەدى. تەك وسىلاي عانا ءبىز تاۋەلسىزدىگىمىزدى ساقتاپ قالا الامىز. بۇگىن كۇن تارتىبىندە تۇرعان بارلىق ماسەلە شەشىلدى, جاڭا مىندەتتەر قويىلدى. وزبەك حالقىنا جانە شاۆكات ميرزيوەۆكە تاعى دا ريزاشىلىعىمدى بىلدىرەمىن», دەدى نۇرسۇلتان نازارباەۆ.
بريفينگتى قورىتىندىلاعان وزبەكستان پرەزيدەنتى قازاقستان پرەزيدەنتىنە تابىس ەتىلگەن ماراپات وزبەك حالقىنىڭ جانە جەكە ءوزىنىڭ نۇرسۇلتان نازارباەۆقا دەگەن شىنايى نيەتى ەكەنىن اتاپ ءوتتى.
ون قۇجاتقا قول قويىلدى
مەملەكەت باسشىسىنىڭ وزبەكستان رەسپۋبليكاسىنا مەملەكەتتىك ساپارى اياسىندا 10 ماڭىزدى قۇجاتقا قول قويىلدى. اتاپ ايتقاندا, «قازاقستان تەمىر جولى» ۇلتتىق كومپانياسى» اكتسيونەرلىك قوعامى مەن «ۋزبەكيستونتەميريۋللاري» اكتسيونەرلىك قوعامى اراسىنداعى ىنتىماقتاستىق تۋرالى كەلىسىم; قازاقستان رەسپۋبليكاسى قىزىلوردا وبلىسىنىڭ اكىمدىگى مەن وزبەكستان رەسپۋبليكاسى ناۋاي وبلىسىنىڭ حوكيمياتى اراسىنداعى ساۋدا-ەكونوميكالىق جانە مادەني-گۋمانيتارلىق سالالارداعى ءوزارا تۇسىنىستىك تۋرالى مەموراندۋم; قازاقستان رەسپۋبليكاسى وڭتۇستىك قازاقستان وبلىسىنىڭ اكىمدىگى مەن وزبەكستان رەسپۋبليكاسى تاشكەنت وبلىسىنىڭ حوكيمياتى اراسىنداعى ساۋدا-ەكونوميكالىق جانە مادەني-گۋمانيتارلىق سالالارداعى ءوزارا تۇسىنىستىك تۋرالى مەموراندۋم; قازاقستان رەسپۋبليكاسى وڭتۇستىك قازاقستان وبلىسىنىڭ اكىمدىگى مەن وزبەكستان رەسپۋبليكاسى سىرداريا وبلىسىنىڭ حوكيمياتى اراسىنداعى ساۋدا-ەكونوميكالىق جانە مادەني-گۋمانيتارلىق سالالارداعى ءوزارا تۇسىنىستىك تۋرالى مەموراندۋم; قازاقستان رەسپۋبليكاسى قارجى مينيسترلىگى مەن وزبەكستان رەسپۋبليكاسى مەملەكەتتىك كەدەن كوميتەتى اراسىنداعى كونتراباندامەن جانە كەدەن زاڭنامالارىنىڭ بۇزىلۋىمەن كۇرەس جۇرگىزۋدەگى ىنتىماقتاستىق تۋرالى كەلىسىم; قازاقستان رەسپۋبليكاسى ۇكىمەتى مەن وزبەكستان رەسپۋبليكاسى ۇكىمەتى اراسىنداعى اسكەري-تەحنيكا سالاسىنداعى ىنتىماقتاستىق تۋرالى كەلىسىم; قازاقستان رەسپۋبليكاسى ۇكىمەتى مەن وزبەكستان رەسپۋبليكاسى ۇكىمەتى اراسىنداعى ەنەرگەتيكا سالاسىنداعى ىنتىماقتاستىقتىڭ بىرقاتار ماسەلەلەرى تۋرالى نەگىزدەمەلىك كەلىسىم; سۋ قاتىناستارى سالاسىنداعى ىنتىماقتاستىق ماسەلەلەرى جونىندەگى جول كارتاسى; قازاقستان-وزبەكستان مەملەكەتتىك شەكاراسىنىڭ وتكىزۋ پۋنكتتەرى مەن اۆتوموبيل جولدارىن قايتا جوندەۋ جانە جاڭعىرتۋ, سونداي-اق ءتيىستى اۋماقتى اباتتاندىرۋ جونىندەگى جول كارتاسى.
جيىن سوڭىندا قازاقستان رەسپۋبليكاسى پرەزيدەنتى مەن وزبەكستان رەسپۋبليكاسى پرەزيدەنتىنىڭ بىرلەسكەن مالىمدەمەسىنە قول قويىلدى.
دينارا بىتىك,
«ەگەمەن قازاقستان» –
تاشكەنتتەن
سۋرەتتەر پرەزيدەنتتىڭ ءباسپاسوز قىزمەتىنەن الىندى
