تاشكەنتتەگى شاعىن جانە كەڭەيتىلگەن قۇرامداعى كەلىسوزدەردەن كەيىنگى بىرلەسكەن مالىمدەمە بارىسىندا وزبەكستان باسشىسى قازاقستان پرەزيدەنتى نۇرسۇلتان ءابىش ۇلى نازارباەۆتى «ەل-جۇرت قۇرمەتى» وردەنىمەن ماراپاتتاۋ تۋرالى ارنايى جارلىققا كەشە قول قويعانىن ايتتى. اتالعان جارلىقتا نۇرسۇلتان ءابىش ۇلى نازارباەۆتىڭ الەمدىك اۋقىمداعى كورنەكتى مەملەكەت جانە ساياسي قايراتكەر ەكەندىگى جانە ونىڭ كورەگەن باسشىلىعىنىڭ ارقاسىندا الەمدىك قوعامداستىقتا لايىقتى ورىن العان جانە بۇگىندە قارقىندى, دەموكراتيالىق جولمەن دامىپ, قۋاتتى نارىقتىق ەكونوميكا مەن اشىق قوعام قۇرعان تاۋەلىز قازاقستان رەسپۋبليكاسىنىڭ نەگىزى قالانعانى ايتىلعان.
«نۇرسۇلتان ءابىش ۇلى نازارباەۆتىڭ جەكە زور ۇلەسىنىڭ ارقاسىندا باۋىرلاس وزبەك پەن قازاق حالىقتارىنىڭ اراسىندا دوستىق پەن ىنتىماقتاستىقتىڭ مىعىم كوپىرىنىڭ نەگىزى قالاندى. وسىنىڭ نەگىزىندە قازىرگى ۋاقىتتا ەلدەر اراسىندا ءوزارا ءتيىمدى ءارى جەمىستى بايلانىستار دامۋ ۇستىندە. باۋىرلاس ەكى ەل ءداستۇرلى دوستىق پەن ستراتەگيالىق سەرىكتەستىكتى تەرەڭدەتۋ, كەڭەيتۋ, سونىمەن قاتار بەيبىتشىلىك ءۇشىن الەمدىك قوعامداستىقتى نىعايتۋداعى ۇلى ەڭبەگىنە وراي قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ «ەل-جۇرت قۇرمەتى» وردەنىمەن ماراپاتتالسىن!», دەلىنگەن جارلىقتا.
قازاقستان پرەزيدەنتى نۇرسۇلتان نازارباەۆ وزبەكستاننىڭ بۇل قۇرمەتى وزى ءۇشىن ەرەكشە «توسىن سىي» بولعانىن اتاپ ءوتتى. «مەن ومىرىمدە الەمنىڭ كوپتەگەن مەملەكەتتەرىنەن, ءوز ەلىمنەن كوپ ماراپات العان اداممىن. بىراق بۇل ماراپات ماعان بارلىعىنان دا اسا قۇرمەتتى, قىمبات. سەبەبى كورشى, ءبىر تۋعان ەلدىڭ قۇرمەتىنە بولەنۋ ول باسقا. بىلمەيتىن, الىستاعى ەلدىكى ساياسي. سوندىقتان مەن وتە جوعارى باعالايمىن. ويلاماعان جەردەن توسىن سىي جاسادىڭىز. وزبەك حالقى قۋانسا, قازاقستان حالقى دا قۋانامىز. وزبەك حالقىندا, قۇداي ساقتاسىن, قيىنشىلىق بولسا, ءبىز ءار ۋاقىتتا بىرگەمىز. سىزدەردىڭ قاستارىڭىزدان تابىلاتىن بولامىز. سولاي بولۋىمىز كەرەك. سولاي بولساق قانا تاۋەلسىزدىگىمىزدى ساقتاپ, ەل بولىپ, امان قالامىز», - دەدى نۇرسۇلتان نازارباەۆ ماراپاتتاۋ راسىمىندە. سونىمەن قاتار ەلباسى بۇگىنگى شاعىن جانە كەڭەيتىلگەن قۇرامداعى كەلىسسوزدەر بارىسىندا كوپ ماسەلە شەشىلگەندىگىن اتاپ ءوتتى. «الدىمىزعا تاعى دا ماقساتتار قويدىق. سونىڭ بارلىعىنا جەتۋگە اللا جازسىن. وزبەك حالقىنا باسىمدى ءيىپ, راحمەتىمدى ايتامىن. بىزدىڭ سىزدەر دەگەندە كوڭىلىمىز اق, جۇرەگىمىز ادال. سولاي بىرگە جۇمىس ىستەيمىز», دەدى قازاقستان پرەزيدەنتى.
دينارا بىتىك,
"ەگەمەن قازاقستان"
تاشكەنتتەن
