فوتو: ورىنباي بالمۇرات, «ەگەمەن قازاقستان»
سالتاناتتى ءىس-شارا ەلوردا تورىندەگى «قازاقستان» ورتالىق كونتسەرت زالىندا ءوتتى. بيىلعى ۇلتتىق كونكۋرسقا ەلىمىزدىڭ تۇكپىر-تۇكپىرىنەن باس-اياعى 16 جانۇيا ىرىكتەلىپ الىندى. بۇل وتباسىلاردىڭ ىشىندە جاسى جۇزدەن اسقان, وتكەن عاسىردىڭ سان ءتۇرلى سوقپاقتارىنان ءوتىپ, بۇگىنگى كۇنگە امان-ەسەن جەتكەن داناگوي قاريالارىمىز دا بولدى.
وسىمەن ءتورتىنشى جىل قاتارىنان ۇيىمداستىرىلعان بايقاۋدىڭ جەڭىمپازى 7-15 قىركۇيەك ارالىعىندا عالامتور جانە سمس داۋىس بەرۋ ارقىلى انىقتالدى.
ناتيجەسىندە, ۇلتتىق بايقاۋدىڭ لاۋرەاتى اتاعىنا قاراعاندى وبلىسىنان كەلگەن كۋريلەنكو وتباسى لايىق دەپ تانىلدى.
بۇل اۋلەتتىڭ اقساقالى – نيكولاي سەمەنوۆيچ كۋريلەنكو. ول – ۇلى وتان سوعىسىنىڭ ارداگەرى. تەمىرتاۋ قالاسىنداعى مەتاللۋرگيالىق كومبيناتتا سلەسار, شەبەر, ءبولىم باسشىسى لاۋازىمدارىندا تابان اۋدارماستان 45 جىل قىزمەت ەتكەن. قاريا ء«Iى دارەجەدەگى وتان سوعىسى» وردەنى, «ەرلىگى ءۇشىن» مەدالى, « ۇلى وتان سوعىسىندا گەرمانيانى جەڭگەنى ءۇشىن», سونداي-اق «گەورگي جۋكوۆ» سەكىلدى بىرقاتار مەدالدارمەن ماراپاتتالعان.
ال جۇبايى ماريا فەدوروۆنا كۋريلەنكو بولسا, سوعىس ۋاقىتىندا تىلدا ەڭبەك ەتكەن. ولاردىڭ وتاۋ قۇرىپ, ءبىر شاڭىراق استىندا ءومىر سۇرگەنىنە 66 جىلدىڭ ءجۇزى بولىپتى. كۋريلەنكو اۋلەتى تەمىرتاۋدا 2016 جىلعى ۇزدىك وتباسى اتاعىنا يە بولدى. بۇگىندە ولار بەس بالاسىنان 10 نەمەرە, 7 شوبەرە ءسۇيىپ وتىر. ۇلگىلى وتباسىنىڭ بالالارى ءتۇرلى سالادا قىزمەت ەتىپ ءجۇر.
– جاسىم 70-كە كەلدى, – دەپ شاتاسىپ قالدى قۋانىشى قوينىنا سىيماعان قاريا نيكولاي. – بيىل 90 جاستامىن. وسىنداي ۇلكەن كونكۋرستى ۇيىمداستىرعان ەلباسىمىزعا العىسىمدى بىلدىرگىم كەلەدى. ول ۇلى وتان سوعىسى ارداگەرلەرى مەن تىل ەڭبەككەرلەرىن ۇنەمى نازارىندا ۇستاپ, بىزگە قولداۋ كورسەتىپ كەلەدى. ەلىمىزگە تىنىشتىق, بارلىق وتباسىعا باقىت تىلەيمىن! العا, قازاقستان! – دەدى نيكولاي كۋريلەنكو.
«مەرەيلى وتباسى» اتاعىنا يە بولعان كۋريلەنكو اۋلەتىن مەملەكەتتىك حاتشى گۇلشارا ابدىقالىقوۆا قۇتتىقتاپ, شاعىن اۆتوبۋستىڭ كىلتىن تابىس ەتتى. ول ەلباسى نۇرسۇلتان نازارباەۆتىڭ كونكۋرسقا قاتىسقان ءاربىر وتباسى تۋرالى تولىق حاباردار ەكەنىن مالىمدەدى. سونىمەن قاتار, جينالعان قاۋىمنىڭ الدىندا مەملەكەت باسشىسىنىڭ قۇتتىقتاۋ ءسوزىن وقىپ بەردى.
حاتتا: «قىمباتتى, قازاقستاندىقتار! قۇرمەتتى كونكۋرسقا قاتىسۋشىلار! بارشاڭىزدى «مەرەيلى وتباسى» ۇلتتىق كونكۋرسىنىڭ ءوز مارەسىنە جەتۋىمەن شىن جۇرەكتەن قۇتتىقتايمىن! وتباسى قاي زاماندا دەنى ساۋ قوعامنىڭ جانە مىقتى مەملەكەتتىڭ نەگىزى بولىپ كەلەدى. تاۋەلسىزدىك العاننان بەرگى شيرەك عاسىردا قازاقستاندىق تاتۋ وتباسىندا پاتريوتيزم, ەڭبەكسۇيگىشتىك, جاڭا قوعام قۇرۋ قۇندىلىقتارىمەن تاربيەلەنگەن تۇتاس بۋىن ءوسىپ كەلەدى. ولار – بىلىمگە قۇشتار, باسەكەگە قابىلەتتى, جاڭا الەم مەن يننوۆاتسيالارعا اشىق ءۇشىنشى جاڭعىرۋدى جۇزەگە اسىرۋشىلار. قازاقستاننىڭ بولاشاعى ءوزارا سىيلاستىق پەن تاتۋلىققا ۇيىعان. جاقىندارىنا جاناشىرلىق جاساۋمەن بىرگە وزگەلەرگە كومەگىن ايامايتىن, اركىم ءوزىنىڭ سۇيىكتى ىسىمەن اينالىساتىن, ۇرپاقتان ۇرپاققا جالعاسقان بىرلىك پەن كەلىسىم قۇندىلىقتارى ساقتالعان وتباسىلارى دەپ سەنىممەن ايتا الامىن. ەلىمىزدىڭ تىرەگى بولعان وسىناۋ قۇندىلىقتار ءاردايىم ءبىزدىڭ بايلىعىمىز بولىپ قالا بەرمەك. بارشاڭىزعا زور دەنساۋلىق, امان-ساۋلىق, بەيبىتشىلىك پەن ءوسىپ-وركەندەۋ تىلەيمىن! شاڭىراقتارىڭىزعا شاتتىق, جايلىلىق پەن مولشىلىق سالتانات قۇرسىن», دەلىنگەن.
«مەرەيلى وتباسى» كونكۋرسى العاش رەت 2014 جىلى ۇيىمداستىرىلعان بولاتىن. بايقاۋدىڭ ەڭ العاشقى جەڭىمپازى – احمەتوۆتەر وتباسى.
– مۇنداي ۇلكەن جارىستىڭ العاشقى جەڭىمپازى بولعانىمدى ماقتان تۇتامىن. ءالى ەسىمدە, ەلباسىنىڭ قولىنان اۆتوكولىك كىلتىن الىپ تۇرعانىمدا, ماعان ك ۇلىمسىرەپ قاراپ تۇرىپ: «مىنا كولىكتى ساتپا», دەدى. ارينە مۇنداي بايقاۋدان العان تۇلپارىمدى بۇگىنگە دەيىن ءوز يگىلىگىمە پايدالانىپ كەلەمىن. وتباسى – بەرەكە-بىرلىكتىڭ قاينار كوزى. «مەرەيلى وتباسى» كونكۋرسى وتباسى بەدەلىن نىعايتۋعا, وسكەلەڭ ۇرپاقتىڭ بويىندا پاتريوتتىق سەزىم قالىپتاستىرۋعا ۇلكەن سەپتىگىن تيگىزەدى, – دەدى كەنتاي احمەتوۆ.
ايتا كەتەيىك, تۇساۋى كەسىلگەن جىلى بايقاۋعا 1298 وتباسى قاتىسسا, بيىل ەلىمىزدىڭ تۇكپىر-تۇكپىرىنەن 2879 جانۇيا قاتىسۋعا نيەت بىلدىرگەن ەكەن. بۇل وتكەن جىلمەن سالىستىرعاندا 11,6%-عا ارتىق (2016 جىلى – 2579 وتباسى). قاتىسۋشىلاردىڭ 36,2%-ى (1041 وتباسى) كوپ بالالى وتباسىلار (2016 جىلى – 1065 وتباسى). بايقاۋعا 20 ەتنوس پەن 27 ينتەرناتسيونالدىق وتباسى قاتىسقان.
ايان ءابدۋالي,
«ەگەمەن قازاقستان»
