باۋىرلاس ەلدەردىڭ ساۋدا-ەكونوميكالىق ىنتىماقتاستىعىنىڭ ارتۋىنا مۇمكىندىك بەرەتىن كەزدەسۋگە 500-دەن استام قوس ەلدىڭ كاسىپكەرلەرى قاتىستى.
سونىمەن قاتار, تاشكەنت قالاسىندا وتكەن بيزنەس-فورۋم شەڭبەرىندە قازاقستاندا وندىرىلەتىن ونىمدەرىنىڭ كورمەسى ءوتتى.
وزبەكستان استاناسىندا كەشە باستالعان كورمەگە 90-عا جۋىق وتاندىق كومپانيانىڭ ونىمدەرى قويىلعان. قازاقستاندىق تاۋاروندۋشىلەر كورمەگە تاماق جانە ونەركاسىپ, ينجەنەرلىك, ماشينا جاساۋ, فارماتسەۆتيكا جانە قۇرىلىس زاتتارى مەن حيميا, مەتاللۋرگيا IT سالالارىنداعى 500-دەن استام ونىمدەرىن اكەلىپ وتىر.
«وزەكسپوورتالىق» كورمە كەشەنىندە ءوتىپ جاتقان كورمەگە وڭتۇستىك قازاقستان وبلىسىنىڭ بىرقاتار ءىرى كاسىپورىندارىنىڭ ونىمدەرى قويىلدى. اتاپ ايتقاندا, كىلەم ونىمدەرىن شىعاراتىن «بال تەكستيل» فابريكاسى, ۇن جانە ءسۇت ونىمدەرىن وندىرۋدە كوشباسشىلاردىڭ قاتارىنداعى كاسىپورىننىڭ ءبىرى «التىن ءدان» جشس-گى, جىلىنا تسەمەنت وندىرەتىن «شىمكەنت تسەمەنت» جانە «ستاندارت تسەمەنت» زاۋىتتارى مەن تمد-دا ءبىرىنشى اشىلعان ۆاكۋمدىق پروبيركالار مەن ەكىجاقتى ينە شىعاراتىن «ەكوفارم ينتەرنەشنل» كومپانياسى مەن تەراپيانىڭ ءتۇرلى سالالارىنداعى اۋرۋلاردى ەمدەۋگە ارنالعان 12 فاراماتسەۆتيكالىق توپقا جاتاتىن گەنەريكتىك جانە تۇپنۇسقالىق 200-دەن استام ءدارى-دارمەك شىعاراتىن «حيمفارم» زاۋىتى, مەديتسينالىق جابدىقتاردىڭ 17 ءتۇرىن شىعاراتىن «Marai E7 Group» جشس-ءنىڭ ونىمدەرى قويىلدى.
سونىمەن قوسا, كورمەدە «اتاستروي» قۇرىلىس كومپانياسى سارىاعاش اۋدانىنداعى جىبەك-جولى شەكارا بەكەتىن مودەرنيزاتسيادان وتكىزۋ جوباسىن تانىستىردى. قۇنى 18 ملن اقش دوللارى بولاتىن جوبا جۇزەگە اسسا تاۋلىگىنە 30 مىڭ ادام ەمىن-ەركىن ەكى ەل شەكاراسىنان وتە الادى.
وقو اكىمدىگى مەن كاسىپكەرلەر پالاتاسىنىڭ ۇيىمداستىرۋىمەن وزبەكستان-قازاقستان بيزنەس-فورۋمىنا وڭتۇستىك قازاقستان وبلىسىنان ءوڭىر باسشىسى جانسەيىت تۇيمەباەۆ باستاعان 150-دەن استام مەملەكەتتىك جانە قارجىلىق ۇيىمدار مەن كاسىپكەرلەر قاتىستى. بيزنەس-فورۋم كەزىندە ۆ2ۆ فورماتىندا كەلىسسوزدەر جۇرگىزىلىپ, ونداعى قاتىسۋشىلار ءوزارا ءىس-ارەكەتتەر جاقىن بولاشاقتا ءوز ناتيجەسىن بەرەرىنە سەنىم ءبىلدىردى.
