– مەن جارقىن تۇستەردى ۇناتامىن, الەمدى تەك قانا اشىق بوياۋلار ارقىلى سەزىنەمىن. اسىرەسە, ۇلتتىق بوياۋ – جانىما جاقىن. جان دۇنيەمدە تىنىشتىق ورناعاندا عانا سۋرەتتەر سالامىن, – دەيتىن ورەلى ونەر يەسىنىڭ, «استانا», «داستارقان», «كيىز ءۇي», «بايتەرەك», «حان شاتىر», «دومبىرا ۇستاعان قىز» اتتى گوبەلەندەرىنە ەشكىمگە ۇقسامايتىن ەرەكشە تۇستىك ۇيلەسىم ءتان.
شەبەر سۋرەتشى كورمەگە كەلۋشىلەرمەن سۇلۋلىققا دەگەن قۇشتارلىعىمەن بولىسكىسى كەلەدى. ونىڭ توقىما كومپوزيتسيالارىنىڭ ەرەكشە وبرازدى الەمىندە وتكەن مەن بۇگىن, باقىت, ماحاببات, سۇلۋلىق تۋرالى پوەتيكالىق جانە فيلوسوفيالىق ويلار ءبىرتۇتاس ويۋ-ورنەكتىك استارلى مانگە يە.
بالنۇردىڭ كارتينالارىنداعى تۇستەردىڭ ۇيلەسىمدىلىگى مەن ءتۇرلى-ءتۇستى رەڭكتەردىڭ بىرىككەن بايلانىسى, بوياۋدىڭ اشىقتىعى كورەرمەننىڭ كوڭىل-كۇيىن كوتەرىپ, ادام بويىنا قۋات بەرەدى.
سۋرەتشى ءوز ەڭبەكتەرىندە عاسىرلار بويى قالىپتاسقان تۇستەر مەن بەلگىلەردىڭ كۇردەلى نىشاندارىنا دا ۇلكەن ءمان بەرەتىنىن ونەر سىنشىلارى دا ايتىپ ءجۇر. ونىڭ كەسكىندەمەلەرى مەن گوبەلەندەرىندە ءداستۇرلى ونەردىڭ جاڭا مۇمكىندىكتەرى كورسەتىلەدى ءارى سوزبەن جەتكىزە المايتىن ەرەكشە تارتىم-
دىلىعىن ساقتاپ قالادى.
ەڭ باستىسى, بالنۇردىڭ شىعارماشىلىعىمەن بىرگە عىلىمي قىزمەتتى قاتار الىپ جۇرگەنى قۋانتادى. ۋ-شۋ, الەم-جالەم داڭعازا كەشتەردەن بويىن اۋلاق سالاتىن سۋرەتشى كوشپەندى وركەنيەتتىڭ عاجايىبى سانالاتىن كوركەم كيىز جانە قازاق مادەنيەتىنىڭ, دەكور-ورنەك بەينەلەمەسى مەن ونىڭ زاماناۋي ديزاينەرلىك تاجىريبەدە قولدانىلۋىن, كونە جانە ورتاعاسىرلىق كەزەڭدە قازاق ۇلتتىق كيىمىنىڭ تاريحي جانە ەتنوگرافيالىق دامۋىن زەرتتەۋمەن اينالىسادى.
ديزاينەر رەتىندە ابدەن كەمەلىنە كەلگەن اسانوۆا ەرسى ەكسپەريمەنتتەرگە بارماي-اق, ءوز الەمىندەگى باسەكەلەستەرىن مويىنداتا ءبىلدى.
بالنۇردىڭ شىعارماشىلىعىندا وزىندىك موتيۆتەن اجىرامايتىن, بۇلجىمايتىن تۇجىرىمدى العا سۇيرەيتىن تاماشا ستيل بار ەكەندىگىن اتاعان ءجون.
ايناش ەسالي,
«ەگەمەن قازاقستان»
الماتى
