تاياۋدا استانادا ءتورتىنشى رەت «التىن تۇلپار» الامان بايگەسى ءوتتى. ايتارى جوق, تاماشا باستاما. باياعىداعى, ەرتەدەن سالسا كەشكە وزعان, ەڭىستەن سالسا توسكە وزعان قازاقى قازاناتتاردىڭ رۋحىن ءتىرىلتۋدى كوزدەگەن مۇباراك ماقساتىنىڭ ءوزى نەگە تۇرادى؟!
ايتسە دە, ءاۋ باستا اعايىننىڭ ىقىلاسى اۋعان بۇل باستامانىڭ بىرتە-بىرتە سيىرقۇيىمشاقتانىپ بارا جاتقانى وسى جولى انىق بايقالدى. نەگە دەيسىز عوي؟ بىرىنشىدەن, اتالعان بايگەدە 37 سايگ ۇلىك باق سىنادى. بۇل دەگەنىڭىز, العاشقى الامانداعىدان 38 جۇيرىككە كەم دەگەن ءسوز. ياعني, «التىن تۇلپارعا» دەگەن قىزىعۋشىلىقتىڭ ات قوسقان اعايىن تاراپىنان كەمىپ وتىرعانى – ويلاندىراتىن شارۋا. بازبىرەۋلەر مۇنىڭ باستى سەبەبىن بايگە الدىنداعى ءار اتتان الىناتىن جارنانىڭ قىمباتتىعىنا اكەلىپ تىرەيدى. راس, 95 مىڭ تەڭگە دەگەنىڭىز بىرەۋگە تيىن بولعانىمەن, الىستان ات ارىتىپ كەلەتىن كەيبىر اعايىن ءۇشىن قىپ-قىزىل اقشا. جۇلدە الام دەپ دامەلەنىپ كەلگەنىندە «جارنا» دەپ جالماڭداپ تۇرسا, جالت بۇرىلماعاندا قايتسىن؟ دەسە دە, بۇل جەردەگى ماسەلە سان سالالى سياقتى...
شىنتۋايتىنا كەلگەندە, اتتاردى 51 شاقىرىمعا ايداۋدان كىم, نە ۇتتى؟ سارشا تامىزدىڭ شىجىعان ىستىعىندا قىلقۇيرىقتاردى وسىنشا قيناعاننان نە تاپتىق دەگەندە وي كەلەدى. قازاقتىڭ باعزىداعى بايگە ءۇردىسىن جاڭعىرتامىز دەگەننىڭ وزىندە بۇگىنگى كۇننىڭ تالاپ-تىلەگىن ەلەپ-ەسكەرگەن كىم بار؟
ءيا, شىمبايعا باتسا دا – شىندىق, «التىن تۇلپار» جوباسى بۇل جولى جەر باۋىرلادى. ويتكەنى, ءبىز سوڭعى الامان وتكەندە جۇلدە بەرەر جۇيرىك تاپپاي جەر شۇقىدىق. تىگىلگەن توعىز جۇلدەنىڭ ۇشەۋى يەسىن تاپتى-اۋ, ال قالعان التاۋىن بايلار قانجىعانىڭ تابىلماۋى اتتىڭ جالىندا وسكەن قازاق بالاسى ءۇشىن اۋىر قامشى. باسقالاي ايتقاندا, سورەدەن ءۇش جۇيرىك قانا ءوتتى...
زادى, قازاق بايگەسىنىڭ و باستاعى ماقساتى جاماعاتتى قىزىققا باتىرۋ ەمەس پە ەدى؟ سونان كەيىن بارىپ, جۇزدەن جۇيرىكتى تاڭداۋ, قىل اياعى, ءوزىنىڭ اتىن شىعارۋ دەگەن سياقتى ەكىنشى كەزەكتەگى پەندەۋي تىرلىكتەر كۇيتتەلەدى عوي. ولاي بولسا, «التىن تۇلپار» بايگەسى ءوزىنىڭ شارىقتاۋ شەگىنە جەتكەندە كورەرمەنگە نە قىزىق كورسەتتى دەگەنگە جاۋاپ ىزدەيىكشى. جانكۇيەر جازعان ابدەن سىلىكپەسى شىققان جانۋارلاردىڭ شىقپا جانىم شىقپامەن مارەنى ارەڭ قيعانىن كوردى. قان سورپاسى شىعىپ, تەكىرەكپەن كوز الدىنان وتكەن قوس جۇيرىككە جۇرەگى تاس ادامنىڭ عانا جانى اشىماعان شىعار. ءۇشىنشى بولىپ وتكەن تۇلپار تۇياعى توڭكەرىلىپ قۇلاپ تۇسپەسە ەكەن دەپ قۋ جانىن شۇبەرەككە ءتۇيىپ وتىرعانداردىڭ قاراسى دا مول بولدى...
البەتتە, الامان بايگە دەسە ىشەر اسىن جەرگە قوياتىن اعايىننىڭ دا ايتارى بولۋى ابدەن مۇمكىن. دەي تۇرعانمەن, قازاقتىڭ الامانىنا قايتكەندە دە ءبىر وزگەرىستىڭ كەرەكتىگىن وسى جولعى قالىپتاسقان جاعداي كوزگە شۇقىپ كورسەتتى. مۇمكىن, اتتى قينامايتىنداي قاشىقتىقتىقتى قىسقارتۋ كەرەك پە؟ الدە, انگلياداعىداي, مىنا رەسەيدەگىدەي ات جارىستارىنىڭ وزىق ۇلگىلەرىمەن بايگە جارىسىنىڭ مازمۇنىن بايىتا وتىرىپ, بارشا قازاقتىڭ بابىن تاباتىن سايگ ۇلىكتەر سايىسىن سۇرىپتاپ شىعارۋ كەرەك پە؟
ءيا, ءداستۇردىڭ وزىعى بار, توزىعى بار. سول تۇرعىدان كەلگەندە, الامان بايگەنىڭ ىشكى الەمىنە تەرەڭىرەك ءۇڭىلىپ, بۇگىنگى كورەرمەننىڭ تىلەگىن, زاماننىڭ تالابىن ەسكەرە وتىرىپ, ەستى دۇنيەنى ومىرگە كەلتىرۋ كەرەكتىگى كۇن تارتىبىندە وتكىر تۇرعانداي. قازاقتىڭ جىلقىسى ەرتەدەن قارا كەشكە دەيىن تالماي شابا بەرەدى دەگەندى قويا تۇرىپ, ءبىر ۋاق قامبار اتا تۇقىمىنا دا قامقور كوزبەن قاراساق. ەلۋ شاقىرىم ەڭكۋ-ەڭكۋ جەر شاپقان جۇدىرىقتاي بالانىڭ بولاشاقتاعى دەنساۋلىعىن دا ەسكەرگەن ءجون شىعار. مۇنى ايتىپ جاتقان سەبەبىمىز, بالالاردىڭ, قالا بەردى جانۋارلاردىڭ قۇقىعىن قىزعىشتاي قوريتىن, قورعايتىن حالىقارالىق ۇيىمداردىڭ بارلىعىن ەستەن شىعارماعان ابزال. بۇگىن بولماسا, ەرتەڭ بۇل اڭگىمەنىڭ جوعارى دەڭگەيدە, بيىك مىنبەرلەردە قوزعالماسىنا كىم كەپىل؟
تەگى, «تاۋلاردى الاسارتپاي, دالانى اسقاقتاتقانعا» نە جەتسىن؟! ايتسە دە, اسىل مۇرا – الامان بايگەنىڭ جۇلدەسى بار, جۇيرىگى جوق بۇگىنگى تاعدىرى ءبىزدى الاڭداتپاي قويمايدى. دەمەك, تولعاعى جەتكەن بۇل ماسەلەنى كەشەندى تۇردە تالقىعا سالاتىن كەز جەتكەن سياقتى.
