وبلىس اكىمى حالىقارالىق جارىستاردا جۇلدەگەر اتانعان قامشىبەك قوڭقاباەۆقا اۆتوكولىكتىڭ, رۇستەم سىبايعا 2 ملن تەڭگەنىڭ, ال ولاردىڭ باپكەرلەرىنە 500 مىڭ تەڭگەنىڭ سەرتيفيكاتتارىن تابىستادى.
ەستەرىڭىزگە سالا كەتەيىك, گامبۋرگتە 25 تامىز بەن 2 قىركۇيەك ارالىعىندا بوكستان اۋەسقويلار اراسىندا وتكەن ءحىح الەم چەمپيوناتىندا قازاقستان قۇراماسى 1 التىن, 2 كۇمىس, 3 قولا جۇلدەنى ولجالاپ, جالپىكوماندالىق ەسەپتە 3-ءشى ورىندى يەلەنگەن بولاتىن. جەرلەسىمىز قامشىبەك قومقاباەۆ «كۇمىس» مەدالدىڭ يەگەرى اتاندى.
زىلتەمىرشى رۇستەم سىباي دا 19-30 تامىز ارالىعىندلا قىتايدىڭ تايبەي قالاسىندا وتكەن 29-شى بۇكىلالەمدىك جازعى ۋنيۆەرسيادادا ەكىنشى ورىندى جەڭىپ الدى.
وبلىس اكىمى سپورتشىلاردى جەڭىستەرىمەن قۇتتىقتاپ, وڭتۇستىك كوريادا وتەتىن ازيا ويىندارىندا جانە 2020 جىلى توكيودا وتەتىن وليمپيادادا ساتتىلىك تىلەدى.
-ەڭبەكسىز جەڭىس تە بولمايدى. قوس سپورتشىنىڭ جۇلدەسى جاستاردىڭ جىگەرىن جاندىرىپ, جاڭا بيىكتەرگە جەتەلەيدى. كوپتەگەن جاسوسپىرىمدەر سپورتقا ىنتىعاتىن بولادى. سىزدەر ءبىزدىڭ ەلىمىزدىڭ حالىقارالىق سپورتتاعى مارتەبەسىنىڭ جوعارى ەكەندىگىن دالەلدەپ, جاتتىقتىرۋشىلار مەن جانكۇيەرلەردىڭ عانا ەمەس, بارشا قازاقستاندىقتاردىڭ ءۇمىتىن اقتادىڭىزدار,-دەدى ايماق باسشىسى.
سپورتشىلار ءوز كەزەگىندە سايىستان العان اسەرلەرىمەن ءبولىسىپ, بارشا تىلەۋلەستەرىنە العىستارىن ءبىلدىردى.
ايتا كەتۋ كەرەك, جىل باسىنان بەرى قىزىلوردا وبلىسىنىڭ سپورتشىلارى قازاقستان چەمپيوناتتارىندا - 563 مەدال جەڭىپ السا, ازيا, الەم چەمپيوناتتارىندا – 53 مەدال يەلەندى. ەلىمىزدىڭ ۇلتتىق قۇراما كومانداسىنا وبلىستان 420 سپورتشى ەندى.
