استانادا تۇراتىن نۇربولاتتىڭ ءتورت بالاسى بار. ءۇشىنشى بالاسى ءنۇرادىلدى مەكتەپ جاسىنا جەتەر-جەتپەسىندە فورتەپيانو ۇيىرمەسىنە الىپ بارعان. ءوزى بالا كەزىنەن مۋزىكاعا اۋەس بولىپ, دەگەنىنە جەتە الماعان سوڭ بالام مەن شىقپاعان بيىكتى باعىندىرار ما ەكەن دەگەن اكەنىڭ ءۇمىتى-داعى. بىراق, مۋزىكا الەمى ءنۇرادىلدى ءوزىنىڭ سيقىرىمەن ارباي المادى, بالانىڭ دا قۇلشىنىپ تۇرعانى شامالى ەدى...
«سول ۋاقىتتاردا, – دەپ سىر اقتارادى نۇربولات, – رەسەيدە تۇسىرىلگەن «مولودەجكا» دەگەن حوككەي تۋرالى سەريالدىڭ تۇراقتى كورەرمەنى ەدىم. جاستار حوككەي ليگاسىندا وينايتىن بوزبالالاردىڭ حوككەيدەگى قيلى تاعدىرىن وتباسىلىق درامامەن, ماحابباتپەن, تاربيەمەن ادەمى شەندەستىرىپ تۇسىرىلگەن سەريالدان باسىمدى الا الماي قالدىم. كوماندا ىشىندەگى تاتۋلىق پەن ارازدىق, دوستىق پەن ساتقىندىق, باپكەر تاربيەسى, ءتارتىپ, ءبارى شەبەر قامتىلعان. قازىر سانانى تۇرمىس بيلەگەن زامان. سپورتتا دا اقشانىڭ ايتقانى جۇرەدى. وزگە كلۋبتار تاڭداۋلى ويىنشىلارعا سىرتتان كەلىپ قوماقتى اقشا ۇسىنىپ جاتادى. سوندايدا ءوزىڭ تاربيە العان كوماندانىڭ نامىسىن قورعاپ, شەشىمدى بولۋ دا ەرلىكتى, بەلگىلى ءبىر دارەجەدە تۇراقتىلىقتى تالاپ ەتەدى ەكەن. وسىنداي سىنداردان وتكەن سپورتشى جىگىتتەرگە كادىمگىدەي باۋىر باستىم. سولار ارقىلى وزىمدە بولەك كوزقاراس قالىپتاستى دا, ءنۇرادىلىمدى حوككەيگە بەرەم دەپ شەشتىم. مۇنداي تاربيەنى كورىپ, سپورتتاعى نەبىر شىرعالاڭنان شىڭدالىپ وسكەن بالا جامان بولماۋى ءتيىس دەپ وي ءتۇيدىم».
ول كەزدە ءنۇرادىلى التى جاستا-تۇعىن. اكەسى بۇرىن باس سۇعىپ كورمەگەن حوككەي دۇكەندەرىن تۇگەل ارالادى. بەس-التى جاستاعى بالانىڭ ءبىر جابدىق كيىم-كەشەگى 200-250 مىڭ تەڭگە تۇرادى ەكەن. بالا وسكەن سايىن ونىڭ دا باعاسى قىمباتتاي تۇسەتىن كورىنەدى.
اۋەلدە باسىنا نەشە الۋان كۇماندى ويلاردىڭ كىرگەنى راس ەدى. قىپ-قىزىل اقشاعا مۇزداي ەتىپ كيىندىرىپ, مۇزعا جىبەرگەن بالا ءبىر اپتادان كەيىن «حوككەيى قۇرىسىن!», دەپ تاستاي قاشسا قايتەدى؟
دەگەنمەن, بالاسى سەنىمىن اقتادى. حوككەيدىڭ قىزىعىنا تەرەڭ بويلاپ, جاتپاي-تۇرماي سپورتتىڭ وسى ءتۇرى تۋرالى ويلايتىن بولدى. قولىنا سمارتفون تيسە بولدى, يۋتۋبتان حوككەيدى عانا قارايتىندى شىعاردى. تاڭعى ساعات التىدا كيىنىپ الىپ, مۇز ۇستىندە تۇرادى. قىسى-جازى وسىلاي...
نۇرادىلمەن قۇرالىپتاس 60 بالانى التى جاسىنان باپتاپ جۇرگەن «استانا-2009» حوككەي كلۋبىنىڭ جاتتىقتىرۋشىسى ءادىل المەنوۆ قازىر سايدىڭ تاسىنداي ىرىكتەلگەن 30 قارادومالاقتى رەسەيدە ءوتىپ تۇراتىن جارىستارعا ءجيى اپارىپ ءجۇر. چەليابى, ەكاتەرينبۋرگ, باشقۇرتستانعا دەيىن بارىپ, ولجالى قايتقان كەزدەرى از ەمەس. وزگە ەلدە باس جۇلدەنى جەڭىپ الۋ قيىن بولسا دا, بۇل كۇندە بالالاردىڭ كۇمىس پەن قولادان تاققان جۇلدەلەرى اجەپتاۋىر جينالىپ قالعان. كۇنى كەشە عانا قازاقتىڭ حوككەيشى بالاقايلارى چەليابى وبلىسىنىڭ پەرۆومايسكي اۋدانىندا وتكەن ماۋسىمالدى تۋرنيردەن كەلدى. المەنوۆتىڭ شاكىرتتەرى جۇلدەلى ءۇشىنشى ورىندى جەڭىپ الىپ, ءتاپ-ءتاۋىر ونەر كورسەتىپ قايتتى. سول دودانىڭ شەشۋشى ويىنىندا ءنۇرادىل نۇربولات ۇلى «ماتچتىڭ ۇزدىك ويىنشىسى» اتانىپ, ارنايى كادەسىيمەن ماراپاتتالدى. ەڭبەگىنىڭ جەمىسىن كورە باستاعان اكەنىڭ قۋانىشىن تىلمەن ايتىپ-جەتكىزۋ ءتىپتى مۇمكىن ەمەس. بولاشاعىنان ءۇمىت كۇتكەن بالاسىنىڭ جەكە ويىنشى رەتىندە العان تۇڭعىش سىيلىعى اكەنى قاناتتاندىرىپ جىبەرگەنى راس ەدى.
اكەسى ءنۇرادىلدىڭ ويىنىنا قاشاندا سىن كوزبەن قارايدى, قوياتىن تالابى دا قاتاڭداۋ. جاسىراتىنى جوق, كوماندادا بالاسىنان اسىپ تۇسەتىن دارىندى حوكەيشىلەر بار. سول سەبەپتى, نۇربولات قانداي دا ءبىر بيىككە تەك ەڭبەكپەن عانا جەتۋگە بولاتىنىن بالاسىنىڭ قۇلاعىنا قۇيۋدان استە جالىققان ەمەس.
ءيا, حوككەي دەگەنىڭىز قىمبات تۇراتىن سپورت ءتۇرى. كيىمىنىڭ قانشا تۇراتىنىن جوعارىدا ايتتىق. بۇدان بولەك, جارىسقا باراتىن بالانىڭ جول شىعىنىن اتا-انانىڭ ءوزى كوتەرەدى. شوتقا قاعىپ سانار بولساق, بالعىن حوككەيشىنىڭ ءبىر جارىسقا دەگەن ساپارىنىڭ ءوزى 100-150 مىڭ تەڭگەنىڭ ارالىعىن قامتيدى ەكەن. «راس, حوككەي دەگەن قىمبات سپورت, – دەيدى نۇربولات تۋىسباي ۇلى. – بىراق, قازاق تا حوككەي ويناي الادى دەگەن نامىس ودان دا قىمبات!».
ءبىر باعىتىنىڭ ءوزى مىڭ شاقىرىم, كەيبىرى ەكى مىڭعا تاياۋ شاقىرىم بولاتىن قاشىقتىقتى ءجۇرىپ ءوتىپ, جارىسقا كەلەتىن قازاق كومانداسىنىڭ قاجىر-قايراتىنا رەسەيلىك اتا-انالار كادىمگىدەي تاڭداناتىن كورىنەدى. ال كوماندانىڭ باپكەرى بولسا, بالالارعا تاجىريبە كەرەكتىگىن العا تارتىپ, جارىستارعا ءجيى شىعىپ تۇرۋدىڭ پايداسىن ايتۋدان جالىققان ەمەس. ونىڭ ايتقانىنا قارسى كەلىپ جاتقان اتا-انا جوق. ويتكەنى, ءبارى دە كوز الدارىندا – بالعىن حوككەيشىلەر ۋاقىت وزعان سايىن بۋىن بەكىتىپ, كوك مۇز ۇستىندەگى دودانىڭ كوكبورىلەرىنە اينالىپ كەلەدى. بۇل جەردە كوڭىلدى سەمىرتەتىن تاعى ءبىر دۇنيە بار. ول – حوككەيگە قازاق بالالارىنىڭ كوپتەپ كەلە باستاعاندىعى.
ەگەر, ءادىل المەنوۆتەي ەڭبەكقور باپكەر باستاپ, نۇربولات تۋىسباي ۇلى سياقتى نامىسشىل اتا-انالار قوشتاي بىلسە, قازاق حوككەيىندەگى قالىڭ شوعىردىڭ قاۋلاي ءوسىپ شىعاتىنى, ولاردىڭ باعىندىرارى دا بيىك شىڭدار بولاتىنى ايدان انىق. حاكىم ابايدىڭ ءوزى «قىران بۇركىت نە المايدى, سالسا باپتاپ؟», دەدى ەمەس پە؟!
قايرات ءابىلدا,
«ەگەمەن قازاقستان»
