«يسپان تىلىندە عالامشارىمىزداعى 500 ميلليوننان اسا ادام تىلدەسەدى. وسى ءتىلدى ءبىلۋ كەز كەلگەن سالادا قاجەتكە جارايدى. يسپان ءتىلىن بىلەتىن ادام ريۆەرا مايا نەمەسە گالاپاگوسس ارالدارى سىندى يسپان تىلىندە سويلەيتىن كورىكتى ەلدەرگە ەركىن ساياحات جاساپ, تىلدەسۋ جاعىنان ەش قيىندىق سەزىنبەيتىن بولادى», دەيدى ماسكەۋدەگى سەرۆانتەس ينستيتۋتىنىڭ ديرەكتورى ابەل مۋرسيا.
باسقوسۋدا ينستيتۋت وكىلدەرى يسپان ءتىلى ءبىلىمىن راستايتىن رەسمي قۇجاتتى قالاي الۋعا بولاتىندىعى جايىندا ارنايى سەسسيا وتكىزدى. قالاعان ادام ءوزىنىڭ ءتىل دەڭگەيىن تەكسەرىپ, DELE يسپان ءتىلىنىڭ ديپلومى مەن ءتىل مەڭگەرۋ دەڭگەيىن باعالايتىن SIELE حالىقارالىق سەرۆيسىنىڭ ەلەكتروندى سەرتيفيكاتى سىندى بۇكىل الەمدە مويىندالعان قۇجاتتاردى الۋ ءۇشىن ەمتيحانداردى قالاي تاپسىرۋ قاجەت ەكەندىگى جونىندە اقپارات الدى.
يسپان ءتىلىنىڭ كۇنىندە ادەبيەت تە اڭگىمەگە ارقاۋ بولدى. وقۋ ورنىنىڭ مادەنيەت ءبولىمى جەتەكشىسى تاتيانا پيگاريوۆا ميگەل سەرۆانتەستىڭ «لامانچتىق ايلاكەر يدالگو دون كيحوت» رومانىنىڭ باس كەيىپكەرىنىڭ قازىرگى زامانداعى ينتەرپرەتاتسياسى تۋرالى ءدارىس وقىدى.
«20 عاسىردا دون كيحوتتىڭ بەينەسى ءوز ىسىڭە نىق سەنىممەن قاراۋ يدەياسىمەن تىعىز ۇشتاستى. قازىرگى زامانىمىزدا دون كيحوت بۇگىنگى وركەنيەتتىڭ باس بەينەسىنە اينالىپ وتىر. ەگەر ادام ءوز ىسىنە سەنسە, ول ءبىزدىڭ ومىردەگى قانداي قيىندىق بولماسىن, البەتتە, جەڭە الادى دەگەن وي جاتىر. يسپانيا پاۆيلونىنىڭ تاقىرىبى كليماتتى جانداندىرۋعا, ەكولوگيالىق كوزقاراستىڭ جەڭىسىنە ارنالعان. ال بۇل – ناعىز دونكيحوتتىق ماقسات. الەمدى جۇتاتقان تەحنوگەندىك وركەنيەتتە قالاي جەڭىسكە جەتۋگە بولادى؟ ادامزات ءتىرى عالامشاردا ءومىر ءسۇرۋى قاجەت دەگەن دونكيحوتتىق سەنىم عانا ادامداردىڭ ەكولوگيا مەن ەنەرگياعا قاتىستى كوزقاراسىن وزگەرتە الادى», دەدى ت.پيگاريوۆا.
شارا كەزىندە يسپانيانىڭ مادەني جانە تۋريستىك مۇراسى بەينەلەنگەن 90 شارشى مەترلىك ينتەراكتيۆتى كارتا تانىستىرىلدى. سودان كەيىن يسپانيالىق مۋزىكانتتار – سازگەر ءارى ءانشى ماريا ارنال مەن گيتاراشى مارسەل باجەس ونەر كورسەتتى.
اسحات رايقۇل,
"ەگەمەن قازاقستان"
