اڭگىمەلەسۋ بارىسىندا دونالد ترامپ قازاقستان پرەزيدەنتىن استاناداعى ەكسپو-2017 حالىقارالىق كورمەسىنىڭ تابىستى وتۋىمەن قۇتتىقتاپ, امەريكا دەلەگاتسياسىنىڭ وسى ءىس-شاراعا قاتىسۋىنىڭ ناتيجەلەرىن جوعارى باعالادى.
مەملەكەت باسشىسى نۇرسۇلتان نازارباەۆ تەحاس شتاتىنداعى ونداعان ادامنىڭ ءومىرىن قيعان تابيعات اپاتىنا بايلانىستى كوڭىل ايتىپ, زارداپ شەككەن اۋداندارداعى ينفراقۇرىلىمنىڭ تەزىرەك قالپىنا كەلۋىنە جانە جەرگىلىكتى حالىقتىڭ قالىپتى تىرشىلىككە قايتا ورالۋىنا تىلەكتەستىگىن ءبىلدىردى.
ەكى ەل كوشباسشىلارى بيىلعى 21 مامىردا ەر-ريادتا وتكەن «يسلام الەمى – اقش» ءسامميتى اياسىنداعى العاشقى كەزدەسۋدىڭ استانا مەن ۆاشينگتون اراسىنداعى ىنتىماقتاستىقتى نىعايتۋ ىسىندەگى ماڭىزدىلىعىن اتاپ ءوتتى.
نۇرسۇلتان نازارباەۆ اقش پرەزيدەنتىنە بيىلعى 10-11 قىركۇيەكتە استانادا يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتى وتەتىنىن ايتتى.
مەملەكەتتەر باسشىلارى قازاقستان مەن امەريكا قارىم-قاتىناسىنىڭ جاعدايىن جانە ونىڭ دامۋ پەرسپەكتيۆالارىن تالقىلادى. بۇل رەتتە تاراپتار ەكىجاقتى ساۋدا-ەكونوميكا سالاسىنداعى ءوزارا ءىس-قيمىلدى نىعايتۋ تۋرالى ۋاعدالاستى.
پرەزيدەنتتەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
نۇرسۇلتان نازارباەۆ قازاقستاندا بيىلعى 29 تامىزدا جۇمىسىن باستاعان تومەن بايىتىلعان ۋران بانكىنىڭ جاھاندىق قاۋىپسىزدىكتى نىعايتۋداعى ماڭىزدىلىعىنا نازار اۋداردى.
ەكى ەل كوشباسشىلارى امەريكا-رەسەي قارىم-قاتىناستارىنىڭ جاعدايىنا جەكە توقتالدى. قازاقستان پرەزيدەنتى ۆاشينگتون مەن ماسكەۋ اراسىنداعى ديالوگتىڭ جاقساراتىنىنا سەنىم ءبىلدىردى.
دونالد ترامپ نۇرسۇلتان نازارباەۆتى ۆاشينگتونعا رەسمي ساپارمەن كەلۋگە شاقىردى.
مەملەكەتتەر باسشىلارى اڭگىمە سوڭىندا ەكى جاقتىڭ دا مۇددەلى بولاتىن ماسەلەلەرى جونىندەگى تۇراقتى ديالوگتى قولداۋعا نيەتتى ەكەندىكتەرىن ءبىلدىردى.
تەلەفون ارقىلى سويلەسۋگە اقش جاعى باستاماشى بولدى.
