بۇگىن بوكستان گەرمانيانىڭ گامبۋرگ قالاسىندا ءوتىپ جاتقان بوكستان الەم چەمپيوناتىنىڭ جارتىلاي فينالدىق باسەكەسىنىڭ ەكىنشى كۇنى باستالدى. كەشەگى جارىس كۇنىندە ءتورت بوكسشىمىز شىعىپ, قايرات ەراليەۆ (56 كگ) پەن امانقۇل ءابىلحان (75 كگ) فينالعا شىققان بولاتىن.
جارتىلاي فينالدىڭ ەكىنشى كۇنىندە +91 كيلوداعى وتانداسىمىز قامشىبەك قوڭقاباەۆ كامەرۋندىق بوكسشى فوكۋ ارسەنمەن جۇدىرىقتاسىپ, ۇپاي سانى بويىنشا جەڭىسكە جەتتى.
قوس بوكسشى العاشقى راۋندتى وتە ساقتىقپەن باستادى. ەكەۋى دە قورعانىسقا اسا قاتتى كوڭىل ءبولىپ, رەتى كەلگەن شابۋىلداپ جاتتى. دەگەنمەن, قامشىبەك ەكىنشى نومىرمەن جۇمىس ىستەپ, قارسى سوققىمەن كۇتىپ الىپ جاتتى. راۋند سوڭىندا قوڭقاباەۆ جىلدامدىعىن قوسىپ, قارسىلاسىنا قاراعاندا انىق جانە ءدوپ سوققىلارمەن كوزگە ءتۇستى.
ەكىنشى راۋندتا قامشىبەك ارسەندى سوققىنىڭ استىنا الىپ, ءبىر رەت ەسەڭگىرەتىپ جىبەردى. سونان سوڭ تورەشى ەسەپ اشىپ, نوكداۋن تىركەدى. ءۇشىنشى راۋندتا دا وتانداسىمىز كامەرۋندىق بوكسشىنى تاعى ءبىر رەت ەسەڭگىرەتىپ, تورەشى ەكىنشى رەت ەسەپتى اشۋعا ءماجبۇر بولدى. ءسويتىپ, بۇل كەزدەسۋ قامشىبەك قوڭقاباەۆتىڭ ايقىن باسىمدىلىعىمەن اياقتالدى.
