ءتۋرنيردىڭ العاشقى كۇنى ءبىزدىڭ قۇراما ءۇشىن ساتسىزدەۋ باستالدى. ءبىرىنشى اينالىمنىڭ وزىندە 52 كيلو سالماقتاعى ازامات يساقۇلوۆ پەن 60 كيلودا ونەر كورسەتكەن ادىلەت قۇرمەتوۆ قارسىلاستارىنا ەسە جىبەرىپ, جارىس جولىنان شىعىپ قالدى.
«قۇرمەتوۆتىڭ جۇيكەسى سىر بەردى. قارسىلاسى ۇسىنعان اشىق ايقاستى قابىل الامىن دەپ, وپىق جەپ قالدى. راس, تاجىريبە كەمدەۋ بولدى, ءبىر جاعىنان شەبەرلىك تە جەتىڭكىرەمەدى. ال يساقۇلوۆ بولسا, ءوزىنىڭ بوكسىن كورسەتپەدى. قارسىلاسىنىڭ ىڭعايىنا جىعىلا بەرگەنى دۇرىس بولمادى. ودان دا ءوزى ويلى شابۋىل ۇيىمداستىرىپ, قارسىلاسىن ىقتىرىپ الۋى كەرەك ەدى», – دەپ ءتۇسىندىردى بوكسشىلارىمىزدىڭ ساتسىزدىگىن قۇراما جاتتىقتىرۋشىسى الەكساندر سترەلنيكوۆ.
دەگەنمەن, بۇل كۇنى جومارت ەرجان (49 كگ), قايرات ەراليەۆ (56 كگ), ءابىلحان امانقۇل (75 كگ) جانە بەكداۋلەت يبراگيموۆ (64 كگ) جەڭىسكە جەتىپ, جانكۇيەر قاۋىمنىڭ كوڭىلىندەگى كۇدىكتى سەيىلتكەن بولاتىن.
جارىستىڭ ەكىنشى كۇنىندەگى جەكپە-جەكتەردىڭ ىشىندە قايرات ەراليەۆ پەن وزبەك بوكسشىسى مۋرودجون احماداليەۆ اراسىنداعى ايقاستى ەرەكشە اتاۋعا بولادى. اسا تارتىستى وتكەن بۇل جەكپە-جەكتە ءبىزدىڭ بوكسشى ريو-2016 وليمپياداسىندا ءوزىنىڭ جولىن كەسكەن قارسىلاسىن ايقىن باسىمدىقپەن جەڭىپ, قارىمتا قايتاردى. وزبەك بوكسشىسىنىڭ بۇل سالماقتاعى ەڭ مىقتىلاردىڭ ءبىرى ەكەنىن ەسەپكە الساق, قايرات ەراليەۆتىڭ ءتۋرنيردى تاماشا ناتيجەمەن اياقتاۋعا مول مۇمكىندىگى بار.
وكىنىشكە قاراي, 1/8 فينالدا بەكداۋلەت يبراگيموۆ ارمەنيا بوكسشىسى وۆانەسس بوچكوۆتان 2:3 ەسەبىمەن جەڭىلىپ قالدى.
«قازاق سالماعىندا» ونەر كورسەتىپ جۇرگەن ابىلايحان ءجۇسىپوۆتىڭ جولى اۋىرلاۋ بولىپ تۇر. يتاليالىق شەبەر, لوندون وليمپياداسىندا دانيار ەلەۋسىنوۆتى جارىس جولىنان شىعارعان ۆينچەنتسو مانجاكاپرەمەن بولعان جەكپە-جەك بارىسىندا ءبىزدىڭ بوكسشىنىڭ باسىمداۋ بولعانى راس ەدى. شارتپا-شۇرت ايقاس كەزىندە ەكەۋى باسپەن ءسۇزىسىپ قالعان. وسىنىڭ سالدارىنان ءجۇسىپوۆتىڭ ماڭدايى جارىلدى. وسى كەزدە, ءۇشىنشى راۋند اياقتالماي جاتىپ تورەشى جەكپە-جەكتى توقتاتتى دا, يتاليالىق بوكسشىنىڭ قولىن كوتەردى. دەگەنمەن, ءبىزدىڭ جاتتىقتىرۋشىلار شتابىنىڭ دەر كەزىندە تۇسىرگەن شاعىمى وڭ ناتيجە بەرىپ, ايبا سۋپەرۆايزەرى جەكپە-جەك ناتيجەسىن قايتا قارادى دا, ابىلايحان ءجۇسىپوۆتى جەڭىمپاز دەپ تانىدى. «مۇنداي ساتتەر جەڭىسكە دەگەن قۇلشىنىستى ارتتىرا تۇسپەسە, بالەندەي كەرى اسەرىن تيگىزە قويمايدى», دەپتى باق وكىلدەرىنە بەرگەن سۇحباتىندا ءبىزدىڭ بوكسشى.
سونداي-اق, چەمپيوناتتىڭ شيرەك فينالىندا ۆاسيلي لەۆيت (91 كگ) پەن اسا اۋىر سالماقتاعى قامشىبەك قوڭقاباەۆ تا باق سىنايتىن بولدى. جالپى, ءبىزدىڭ قۇرامادان جەتى بوكسشى شيرەك فينالعا شىقسا, وزبەكستاننىڭ توعىز بىردەي ورەنى ءتۋرنيردىڭ وسى كەزەڭىندە ونەر كورسەتتى. ايتىپ, ايتپاي نە كەرەك, بۇل الەم چەمپيوناتى دا قازاق-وزبەك بىلعارى قولعاپ شەبەرلەرىنىڭ تەكەتىرەسىمەن قىزىقتى بولعالى تۇر. كەشە كەشكى سەسسيادا بۇل تارتىستىڭ العاشقى جەكپە-جەكتەرى دە ءوتتى: شارشى الاڭدا ەرىك ءالجانوۆ پەن بەكتەمىر مەليكۋزيەۆ جانە قامشىبەك قوڭقاباەۆ پەن باحودير دجالولوۆ كىم مىقتىنى انىقتادى. بۇدان بولەك, تورەشىنىڭ تەپەرىشىنەن امان قالعان ابىلايحان ءجۇسىپوۆ بولسا, ۆەنەسۋەلالىق گابريەل مەسترە پەرەسپەن جەكپە-جەككە ءتۇستى.
ال كۇندىزگى سەسسيادا 49 كيلو سالماقتاعى جومارت ەرجان ەۋروپانىڭ بيىلعى چەمپيونى, رەسەيلىك ۆاسيلي ەگوروۆتى تىزە بۇكتىرىپ, جارتىلاي فينالعا شىقتى. سونداي-اق, 56 كيلودا ونەر كورسەتكەن قايرات ەراليەۆ تە قارسىلاسىنان باسىم ءتۇستى. بۇل جولى رينگ يەسى ومار ەل-حاگتى جارىس جولىنان ىعىستىردى. ۆاسيلي لەۆيت 91 كيلو سالماقتا اۋستراليالىق دجەيسون ۋوتەليمەن كۇش سىناسىپ, جەڭىسكە جەتتى. شيرەك فينالدا ءبىزدىڭ ءابىلحان امانقۇلدى دا وتە اۋىر جەكپە-جەك كۇتىپ تۇردى. جەرلەسىمىز وليمپيادا چەمپيونى, كۋبالىق ارلەن لوپەسپەن قولعاپ ءتۇيىستىرىپ, جەكپە-جەكتى جەڭىسپەن اياقتادى.
سونىمەن, كۇندىزگى سەسسيانىڭ ستاتيستيكاسىنا ساي, ءبىزدىڭ ءتورت بوكسشىمىز جارتىلاي فينالعا جولداما الدى. ال بۇل دەگەنىڭىز – ءتورت قولا جۇلدە قورجىندا دەگەن ءسوز.
قايرات ءابىلدا,
«ەگەمەن قازاقستان»
