مۋزەيدىڭ اشىلۋى ەلباسى ن. نازارباەۆتىڭ «بولاشاققا باعدار: رۋحاني جاڭعىرۋ» اتتى كولەمدى جوباسىن جۇزەگە اسىرۋمەن قاتار, قۇقىقتىق ءتارتىپ اسكەرىنىڭ جاۋىنگەرلىك ءداستۇرىن ساربازدار اراسىندا كەڭىنەن ناسيحاتتاۋ شاراسىمەن ءوزارا ۇندەستىكتە ۇيىمداستىرىلعان. سوندىقتان دا جيىندى اشقان ۇلتتىق ۇلاننىڭ باس قولباسشىسى گەنەرال-لەيتەنانت رۋسلان جاقسىلىقوۆ ۇلتتىق ۇلان قۇرىلۋىنىڭ 25 جىلدىعى قۇقىقتىق ءتارتىپ اسكەرى ءۇشىن تاعى ءبىر ەلەۋلى وقيعامەن تولىعىپ وتىرعانىن اتاپ ءوتتى.
«بۇل – قازاقستان رەسپۋبليكاسىنىڭ كونستيتۋتسياسى كۇنى قارساڭىندا جاڭا بەينەدەگى ۇلتتىق ۇلاننىڭ ورتالىق مۋزەيىنىڭ اشىلۋى. مەن تاۋەلسىز قازاقستان تۇرعىندارىنىڭ قاۋىپسىزدىگىن قامتاماسىز ەتىپ, ءوزىنىڭ ەرجۇرەك ەرلىگىمەن قانشاما ازاماتتاردى قۇتقارعان جاۋىنگەرلەردى ماقتان تۇتامىن. حالىق ءوز باتىرلارىن تانۋى ءتيىس دەسەك, ولاردىڭ ەسىمدەرى اسكەري بولىمدەردەگى جاۋىنگەرلىك داڭق بولمەلەرى مەن بۇگىنگى ورتالىق مۋزەيدە ماڭگى ساقتالاتىن بولادى», دەدى گەنەرال-لەيتەنانت.
سودان كەيىن ءسوز العان ارميا گەنەرالى مۇحتار التىنباەۆ ۇلتتىق ۇلان مۋزەيىنىڭ اشىلۋى ەلىمىزدىڭ قارۋلى كۇشتەرىنىڭ تاريحىندا ايتۋلى وقيعا ەكەنىن ايتتى.
«بۇگىنگى شارا ەلباسى ن.نازارباەۆىتىڭ رۋحاني جاڭعىرۋ بويىنشا مەملەكەتتىك رەفورمالارىمەن توعىسىپ تۇر. ەكونوميكالىق جانە الەۋمەتتىك جەتىستىكتەرمەن قاتار, ءبىز ءوز تاريحىمىزدى ءبىلۋىمىز قاجەت. بۇل – ءبىز بەن ءسىزدىڭ دامۋىمىزدىڭ نەگىزى», دەدى مۇحتار قاپاش ۇلى.
ورتالىق مۋزەي نەگىزگى ءۇش زال مەن مۇراعاتتىق قۇجاتتاردان تۇرادى. ونىڭ ءبىرىنشىسى – ۇلتتىق ۇلان تاريحىنان سىر شەرتىپ, ەكسپوزيتسيالار قۇقىقتىق تارتىپكە قاتىستى اسكەريلەر ءومىرىنىڭ وتكەن كەزەڭىن قامتىسا, ەكىنشى زالدا – قازاقستان رەسپۋبليكاسى ۇلتتىق ۇلانىنىڭ بۇگىنگى بەت-بەينەسى جۇرتشىلىق نازارىنا ۇسىنىلادى. اتاپ ايتقاندا, «ۇلتتىق ۇلان – ەل ايبىنى!» ۇرانىمەن قۇقىقتىق ءتارتىپ اسكەرىنىڭ دامۋ ساتىلارىنا ارنالعان. ال ءۇشىنشى زال – كورمە زالى. بۇل جەردەگى ەكسپوزيتسيالاردا ەلىمىزدىڭ ءوز تاۋەلسىزدىگىن العاننان كەيىنگى ۇلتتىق ۇلان جاۋىنگەرلەرىنىڭ جاساعان ەرلىكتەرى ايشىقتالعان.
سىرى كەتسە دە, سىنى كەتپەگەن مۋزەي ەكسپوناتتارىنىڭ قاتارىندا, جاۋىنگەرلىك تۋلار مەن وردەن-مەدالدار, قارۋ-جاراق كوللەكتسيالارى, جاۋىنگەرلەردىڭ بۇگىنگى اسكەري كيىم ۇلگىلەرى بار. سونداي-اق, كوركەم بەزەندىرىلگەن زاماناۋي ستەندتەردە ۇلتتىق ۇلاننىڭ قۇرىلىمدىق بولىمشەلەرىنىڭ تاريحى مەن اسكەري-جاۋىنگەرلىك ارەكەتتەرىن بەينەلەيتىن فوتوسۋرەتتەر قويىلعان.
نۇرلىبەك دوسىباي,
«ەگەمەن قازاقستان»
