وڭتۇستىك ادام رەسۋرسىنا باي بولعاندىقتان بالاباقشا كەزەگىندە ەلۋ مىڭعا دەيىن ءبۇلدىرشىن بار ەدى. ەلەكتروندى جۇيەنىڭ ارتىقشىلىعى – توبەسىمەن كوك تىرەگەن ءداۋدىڭ بالاسى بولسا دا كەزەكتەن اتتاپ وتە المايدى. ءار اتا-انا تولىق اقپاراتتاندىرىلعان جۇيەدەن ءبارىن كورىپ وتىرادى.
جيىنعا ءبىلىم جانە عىلىم مينيسترلىگىنىڭ وكىلى, وبلىستىق ءماسليحات دەپۋتاتتارى مەن باسقارما باسشىلارى, اۋدان, قالا اكىمدەرى, جالپى ءبىلىم سالاسىنا قاتىستى قۇرىلىمداردىڭ جەتەكشىلەرى, بارلىعى 800-دەن استام ادام قاتىسقان.
وبلىستىق ءبىلىم باسقارماسىنىڭ باسشىسى يساتاي ساعىندىقوۆ سالاداعى جەتىستىكتەر مەن الدا اتقارىلاتىن جۇمىستار جا-يىن باياندادى.
اتاپ ايتقاندا, بيىل ءبىلىم سالاسىن قارجىلاندىرۋعا وبلىستىق بيۋدجەتتەن 257,6 ملرد تەڭگە ءبولىنىپ, وتكەن جىلمەن سالىستىرعاندا 19 ملرد تەڭگەگە ارتىپ وتىر. مۇنان بولەك, وسى جىلى 31,2 ملرد تەڭگەگە 79 ءبىلىم نىسانىنىڭ قۇرىلىسى جۇرگىزىلىپ جاتسا, ونىڭ ىشىندە 29-ى جىل سوڭىنا دەيىن اياقتالىپ, پايدالانۋعا بەرىلمەك.
2016 جىلى اپاتتى جانە ءۇش اۋىسىمدى 43 مەكتەپ بولعان ەدى. اعىمداعى جىلى 20 مەكتەپ پايدالانۋعا تاپسىرىلادى. ال قالعان 23 مەكتەپتىڭ قۇرىلىسىن 2018-2019 جىلدارى اياقتاۋ جوسپارلانعان. مەكتەپكە دەيىنگى تاربيە مەن ءبىلىم بەرۋ مەكەمەلەرى وتكەن وقۋ جىلىمەن سالىستىرعاندا 95 بىرلىككە ارتىپ, بالاباقشاعا كەزەككە تۇرعان 3-6 جاستاعى بالالار سانى 43 مىڭنان 28 مىڭعا ازايدى.
مەملەكەتتىك باعدارلاماعا سايكەس مەكتەپ وقۋشىلارى تەگىن وقۋلىقتارمەن قامتاماسىز ەتىلۋدە. وبلىس بويىنشا وسى وقۋلىقتارعا جالپى 4,5 ملرد تەڭگە ءبولىنىپ, وتكەن جىلمەن سالىستىرعاندا 1,8 ملرد تەڭگەگە ءوستى.
جيىن بارىسىندا ءسوز العان وبلىس باسشىسى ءوڭىر پەداگوگتارىن جاڭا وقۋ جىلىمەن قۇتتىقتادى.
ەلباسى نۇرسۇلتان نازارباەۆ «تابىستى بولۋدىڭ ەڭ ىرگەلى, باس-تى فاكتورى ءبىلىم ەكەنىن اركىم تەرەڭ ءتۇسىنۋى كەرەك. جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت. سەبەبى, قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى», دەگەن بولاتىن. سوندىقتان دا بۇگىنگى تاڭدا ءبىلىم بەرۋ مازمۇنىنا, وقۋشى مەن پەداگوگ تۇلعاسىنا جانە قىزمەتىنە دەگەن كوزقاراستار تۇبەگەيلى وزگەرىسكە بەت بۇرىپ وتىرعان كۇردەلى كەزەڭ, دەدى ءوڭىر باسشىسى.
وبلىس اكىمى سالاداعى كەمشىن ءتۇسىپ جاتقان ماسەلەلەرگە دە توقتالدى. كۇردەلى ماسەلەلەردى شەشۋدىڭ جايتتارىن تارازىلادى. بۇل كۇن كەيبىر ۇستازدار ءۇشىن قونىس تويىنا ۇلاستى.
تامىز كونفەرەنتسياسىندا ءبىلىم سالاسىندا تالاي جىلداردان بەرى ۇلگىلى قىزمەت ەتىپ كەلە جاتقان وڭىردەگى ءۇش ۇستازعا, اتاپ ايتقاندا, شىمكەنت قالاسىنىڭ م.جۇماباەۆ اتىنداعى №39 جالپى ورتا مەكتەبىنىڭ باستاۋىش سىنىپ مۇعالىمى اينۇر دۇيسەبەكوۆاعا, №66 قازىعۇرت جالپى ورتا مەكتەبىنىڭ ينفورماتيكا ءپانىنىڭ مۇعالىمى جانات مۇساەۆاعا جانە تۇركىستان قالاسىنداعى №9 نەكراسوۆ اتىنداعى گيمنازياسىنىڭ قازاق ءتىلى ءپانى مۇعالىمى ۆەنەرا باتىرقۇلوۆاعا پاتەر كىلتى تابىستالدى. سونىمەن قاتار, ءبىلىم جانە عىلىم مينيسترلىگىنىڭ ناگرادالارى اياسىندا 5 مۇعالىم «ى.التىنسارين», 5 ۇستاز ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىمەن ماراپاتتالدى.
بۇگىندە وڭىردە ورتا مەكتەپتە 69 مىڭنان اسا مۇعالىم ءبىلىم بەرەدى. بيىلعى وقۋ جىلىندا 640 مىڭعا جۋىق وقۋشى مەكتەپ تابالدىرىعىن اتتايدى دەپ كۇتىلۋدە.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
