ءباسپاسوز ءماسليحاتىندا باس پروكۋراتۋرانىڭ قۇقىق قورعاۋ قىزمەتتەرى ورتالىعىنىڭ باسشىسى ساعاتبەك سۇلەيمەن جۇمىس بارىسى جونىندە بايانداپ, ورتالىقتىڭ قۇرىلۋى ۇلت جوسپارىنىڭ 100-ءشى قادامى, ياعني قۇقىق قورعاۋ قىزمەتتەرىن ءبىر جەرگە شوعىرلاندىرۋدان باستاۋ الاتىنىن اتاپ ءوتتى.
«ەلباسى بارلىق مەملەكەتتىك ورگاندارعا ادامداردى كابينەت ارالاتپاي, ولاردىڭ كەز كەلگەن تالاپ-تىلەكتەرى شەشىمىن تابۋى ءتيىس دەپ تاپسىرما بەردى. جىل سايىن پروكۋرورلاردىڭ جەكە قابىلداۋىنا 50 مىڭعا جۋىق ادام جۇگىنەدى. وسىنى ەسكەرىپ, ازاماتتاردى قابىلداۋ ءراسىمىن بارىنشا ىڭعايلى ەتۋ ماقساتىندا بيىل شىلدە ايىندا قۇقىق قورعاۋ قىزمەتتەرى ورتالىعىن اشتىق», دەدى ساعاتبەك سۇلەيمەن.
ءباسپاسوز ءماسليحاتى بارىسىندا ورتالىق ۇسىناتىن قىزمەت تۇرلەرى دە كەڭىنەن باياندالدى. ورتالىق باسشىسىنىڭ ايتۋىنشا, پروكۋرورلار ازاماتتاردى قابىلداۋ بارىسىندا ناقتى ىستەردى سۇراتۋ, تومەن تۇرعان پروكۋرورلاردىڭ پروتسەسسۋالدىق شەشىمدەرىنىڭ زاڭدىلىعىن تەكسەرۋ, سونىمەن قاتار ءوتىنىشتى «ەلەكتروندى ۇكىمەت» پورتالى ارقىلى قۇزىرلى ورگاندارعا جولداۋ مۇمكىندىگىنە يە.
شاراعا رەسپۋبليكالىق ادۆوكاتتار القاسى توراعاسىنىڭ ورىنباسارى قادىرجان بايمۇحانوۆا, «قازاقستان مەدياتورلار قاۋىمداستىعى» زتب-نىڭ باس ديرەكتورى ءجاندىلدا جاقىپوۆ جانە «پراۆو» قق-نىڭ ءتورايىمى ولگا رىل قاتىستى. سپيكەرلەر ورتالىق جۇمىسىنا قاتىستى پىكىرلەرىمەن ءبولىسىپ, كەلەلى ماسەلەلەردى تالقىلادى.
ورتالىق كەلتىرگەن دەرەكتەرگە سۇيەنسەك, ءبىر اي ىشىندە 608 ازامات پروكۋرورلاردىڭ جەكە قابىلداۋىندا بولىپ, 342 ادامعا قۇقىقتىق كومەك كورسەتىلىپتى. سونداي-اق, 266 ارىز قابىلدانىپ, وڭىرلەرگە تاپسىرمالار بەرىلگەن. ال ورتالىق پسيحولوگى 97 كەلۋشىگە كونسۋلتاتيۆتىك كومەك كورسەتتى. 47 كەلۋشىگە ەتسق بەرىلىپ, سول ارقىلى 33 ەلەكتروندى جانە 68 بەينەوتىنىشتەر جىبەرىلىپتى. سونىمەن قاتار, ادۆوكاتتار 100 ازاماتقا تەگىن كومەك كورسەتكەن ەكەن.
ەستەرىڭىزگە سالا كەتەيىك, 21 شىلدەدە استانادا باس پروكۋراتۋرانىڭ عيماراتىندا قۇقىق قورعاۋ قىزمەتتەرى ورتالىعى اشىلعان-تۇعىن. مەكەمەنىڭ نەگىزگى ماقساتى – وتىنىشتەردى جەدەل تۇردە شەشۋ, حالىقتىڭ قۇقىق قورعاۋ جانە مەملەكەتتىك ورگاندارعا دەگەن سەنىمىن ارتتىرۋ, سونىمەن قاتار اكىمشىلىك كەدەرگىلەر مەن بيۋروكراتيانى جويۋ. مۇنداي ورتالىق بۇگىندە اقتوبە جانە قىزىلوردا وبلىستارىندا دا اشىلدى. جىل سوڭىنا دەيىن ەلىمىزدىڭ بۇكىل وڭىرلەرىندە قۇقىق قورعاۋ قىزمەتتەرى ورتالىقتارىن اشۋ جوسپارلانىپ وتىر.
اباي اسانكەلدى ۇلى,
«ەگەمەن قازاقستان»
