قىزىلجاردىڭ توپىراعى قۇنارلى. ورتاشا بونيتەت 55 بالدى قۇرايدى. استىق وسىرۋگە تاپتىرمايتىن قۇتتى ولكە. بۇگىنگە دەيىن بيداي داقىلىنا باسىمدىق بەرىلىپ كەلسە, ەلباسىنىڭ استىق ءوندىرىسىن ءارتاراپتاندىرۋ تاپسىرماسىنا بايلانىستى كەشەندى شارالار جۇزەگە اسىرىلا باستادى. قازىر مايلى داقىلدار القابى 712 مىڭ گەكتارعا جەتكىزىلدى. الداعى ۋاقىتتا 1 ميلليون گەكتارعا دەيىن ۇلعايتىلماق. اۋىل شارۋاشىلىعى سالاسىن كەڭىنەن دامىتۋدىڭ ىقتيمالدى جولدارى سان تاراۋ. ونىڭ ىشىندە ۇقساتۋ ءىسىن جولعا قويۋدىڭ, قالتالى قارجىگەرلەردىڭ كومەگىنە سۇيەنۋدىڭ ماڭىزى زور. ەلىمىزدە شەتەلدىك ينۆەستورلارعا قولداۋ ايرىقشا. سول سەبەپتى بولار, قىتاي ەلىنىڭ ينۆەستورلارى وبلىسقا كەلگەن ءبىر ساپارىندا اگرووندىرىستىك پارك قۇرماق ويلارىن جەتكىزگەن. ولاردىڭ ەت, ءسۇت, تاعى باسقا اۋىلشارۋاشىلىق ونىمدەرىن تەرەڭدەتىپ وڭدەۋ جونىندەگى وزىق جوبالارى ايماق باسشىسى قۇمار اقساقالوۆتىڭ تاراپىنان قولداۋ تاپقان بولاتىن. جاسىراتىنى جوق, وڭىردە شيكىزات قورى مول, جەتكىلىكتى بولعانىمەن, ەتتىڭ 20 پايىزى, ۇننىڭ 10 پايىزى, ءسۇتتىڭ 50 پايىزى عانا تەرەڭدەتىلىپ وڭدەلەدى. ىرگەتاسى تايىنشا اۋدانىندا قالانادى دەپ بەلگىلەنگەن بولاشاق زاۋىتتىڭ قۇرىلتايشىسى دزيا حەيدىڭ ء«بىز قازاقستاننىڭ ساپاسى جوعارى, ەكولوگيالىق تازا ونىمدەرىن بىرلەسىپ پايدالانۋ ءۇشىن تىعىز ارىپتەستىك قارىم-قاتىناس ورناتۋعا مۇددەلىمىز. سىزدەردەگى «نۇرلى جول», بىزدەردەگى ء«بىر بەلدەۋ – ءبىر جول» باعدارلامالارى ءبىر-بىرىمەن تىعىز ساباقتاس. ماقساتىمىز – لوگيستيكالىق تىزبەك قۇرۋ», دەگەن ەدى. «ايتسزيۋ» سەكىلدى الەمدىك نارىقتا تانىمال كومپانيانىڭ قۇرامىنا 1400-دەي ەنشىلەس ازىق-تۇلىك كاسىپورنى ەنەتىنىن ەسكەرسەك, ينۆەستورلاردىڭ مۇمكىندىكتەرى قانداي دارەجەدە ەكەنىن شامالاي بەرۋگە بولادى. قاي-قايسىسى بولسىن IT-تەحنولوگيالارمەن جۇمىس ىستەيدى.
«تايىنشا-ماي» جشس-ءنىڭ ديرەكتورى ساكەن مۇحاماديەۆ باق وكىلدەرىنە بەرگەن سۇحباتىندا شيكىزات وندىرۋشىلەرمەن, كووپەراتيۆتەرمەن بىرلەسىپ جۇمىس ىستەيتىندەرىن, باستى ماقسات ەكسپورتقا باعدارلانعانىن جەتكىزدى. كەلەشەكتە ءارتۇرلى سالالارداعى ينۆەستورلاردى تارتۋ ارقىلى كەسپە, ەت-ءسۇت ونىمدەرىن قالدىقسىز وڭدەۋ قولعا الىناتىن بولادى. قىتايعا جونەلتىلەتىن ءونىمنىڭ ساپاسى مەن ەكولوگيالىق تازالىعىنا ەرەكشە نازار اۋدارىلعان. جاڭا تسەح تولىق اۆتوماتتاندىرىلىپ, كۇنىنە 400 توننا تازارتىلعان وسىمدىك مايىن شىعارادى. 70 ادام تۇراقتى جۇمىسپەن قامتىلعان.
– مايلى داقىلداردىڭ رەنتابەلدىلىگىن كوتەرۋدىڭ ناقتى شارالارىن ۇزبەي قاراستىرۋىمىز قاجەت. بۇل تۇرعىدان العاندا, ەلىمىزدەگى شيكىزات وڭدەيتىن جانە ماي تازارتاتىن ەڭ ءىرى زاۋىتتىڭ مۇمكىندىكتەرى مول, – دەدى تۇساۋكەسەر راسىمىندە سويلەگەن سوزىندە قۇمار ىرگەباي ۇلى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
