ساپار بارىسىندا گۇلشارا ابدىقالىقوۆا 2016 جىلى قالانىڭ 1000 جىلدىعىنا وراي اشىلعان الماتى مۇراجايىندا بولدى. مۇراجاي قالانىڭ ءىرى عىلىمي جانە مادەني ورتالىعى بولىپ سانالادى. ونىڭ ەكسپوزيتسياسى تاقىرىپتىق 11 زالدا ورنالاسقان. ولار: «الماتىنىڭ ەجەلگى تاريحى», «ورتا عاسىرداعى الماتى تاريحى», «قازاق مەملەكەتتىلىگىنىڭ باستاۋىندا», «جەتىسۋ ەتنوگرافياسى», «الماتىنىڭ ۆەرنىي كەزەڭىندەگى تاريحى», «حح عاسىرداعى الماتى», «مادەنيەت پەن ونەردىڭ دامۋى», «الپينيزم تاريحى», «جەلتوقسان», «الماتى جانە ەلباسى», «بەيبىتشىلىك پەن كەلىسىم مودەلى» زالدارى.
سودان كەيىن مەملەكەتتىك حاتشى 1931-1933 جىلدارداعى اشارشىلىق قۇرباندارىنا ارنالعان ەسكەرتكىشكە گۇل شوعىن قويدى. ەسكەرتكىش ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى مىندەتتەردى ىسكە اسىرۋ اياسىندا 2017 جىلعى 31 مامىردا «قاراعايلى» ساياباعىندا اشىلعان. مونۋمەنت ونەرى سالاسىنداعى جاڭا قۇرىلىستاردى ورناتۋ جونىندەگى مەملەكەتتىك كوميسسيانىڭ شەشىمىمەن 20-دان استام جۇمىستىڭ اراسىنان بيىكتىگى ءتورت مەتر, قولا مەن گرانيتتەن جاسالعان, ءسابيىن باۋىرىنا باسىپ تۇرعان انا بەينەلەنگەن ەسكەرتكىش تاڭداپ الىندى.
ساپار سوڭىندا مەملەكەتتىك حاتشى «الماتى كوك-توبە وpera – 2017» حالىقارالىق فەستيۆالىنە قاتىستى. ءىس-شارادا اباي اتىنداعى قازاق مەملەكەتتىك اكادەميالىق وپەرا جانە بالەت تەاترى سيمفونيالىق وركەسترىنىڭ سۇيەمەلدەۋىمەن ەلىمىزدىڭ ۇزدىك سوليستەرى مەن الەمنىڭ وپەرا جانە بالەت جۇلدىزدارى ونەر كورسەتتى.
العاشقى فەستيۆال 2016 جىلى الماتى قالاسىنىڭ 1000 جىلدىعىن مەرەكەلەۋ اياسىندا ۇيىمداستىرىلدى. بيىل فەستيۆال «استانا ەكسپو-2017» حالىقارالىق كورمەسىنە جانە «قالا كۇنى» مەرەكەسىنە ورايلاستىرىلىپ وتىر.
