– اقتىق دەمىمىز قالعانشا كۇرەسەتىن بولامىز. العاشقى ويىندا جىبەرگەن قاتەلىكتەرىمىزدەن قورىتىندى شىعاردىق. ءبارىن ۇمىتىپ, گلازگوداعى ماتچتاعى ەسەپ ءادىل ەمەس ەكەندىگىن كورسەتكىمىز كەلەدى. جانكۇيەرلەرىمىزدىڭ الدىندا بار ونەرىمىزدى كورسەتەتىن بولامىز.
– ءبىرىنشى ماتچتان كەيىن ەلىمىزدە «استانانى» قاتتى سىنعا العاندار بولدى. جىگىتتەردىڭ پسيحولوگيالىق جاعدايى قانداي؟
– ءوزىم جايلى ايتار بولسام, مۇنداي سىنعا قاتتى ءمان بەرمەۋگە تىرىسامىن. اركىمنىڭ ءوز ويى, پىكىرى بار. ءبىزدىڭ جۇمىسىمىز – الاڭعا شىعىپ, جوعارى دەڭگەيدە ويناي الاتىنىمىزدى دالەلدەۋ.
– «استانا» تەڭ ناتيجەنى قاناعات تۇتا ما الدە كەلەسى كەزەڭگە وتۋدەن ءالى دە بولسىن ءۇمىتتى مە؟
– ءبارىمىز بەس نەمەسە ودان دا كوپ گول ايىرماشىلىعىمەن جەڭۋدى ارمانداپ ءجۇرمىز دەپ ويلايمىن. باستى ماقساتىمىز – الاڭعا شىعىپ, جانكۇيەرلەرىمىزدى قۋانتۋ. ال قانداي ەسەپ تىركەلەتىنىن ەرتەڭ كورەمىز.
– «سەلتيكتى» قانداي جاعدايدا ۇتا الامىز دەپ ويلايسىز؟
– ءبىز ءوز الاڭىمىزدا, جانكۇيەرلەرىمىزدىڭ الدىندا وينايمىز. مۇمكىندىكتەرىمىزدىڭ ءبارىن پايدالانۋىمىز كەرەك. ارينە, ازداعان ساتتىلىك بولسا جەڭىسكە جەتۋىمىزگە بولادى.
– گلازگودا «سەلتيك» «استانادان» الدەقايدا باسىم بولدى دەپ ويلايسىز با, الدە قاتەلىكتەرى ءۇشىن جازالادى ما؟
– مەن ءۇشىن العاشقى ماتچ وتكەننىڭ ەنشىسىندە قالدى. ءتيىستى قورىتىندىنى شىعاردىق. «سەلتيك» جاقسى كوماندا, قاتەلىكتەرىمىزدى ءمۇلت جىبەرمەدى. مۇنداي دەڭگەيدەگى ماتچتا جىبەرگەن كىشكەنە عانا قاتەلىگىڭ ءۇشىن سىباعاڭدى بىردەن الاسىڭ. ەرتەڭ بارىنشا جيناقى ويناۋىمىز كەرەك.
ايان ءابدۋالي,
«ەگەمەن قازاقستان»
