القالى جيىنعا وراي ورتالىق كوممۋنيكاتسيالار قىزمەتىندە ءباسپاسوز ءماسليحاتى ءوتىپ, وعان «قازاگرو» ۇلتتىق حولدينگى» اق باسقارما توراعاسىنىڭ ورىنباسارى گۇلناز اتامقۇلوۆا قاتىستى. ول الدىمەن اۋىل شارۋاشىلىعى سالاسىنداعى ينۆەستيتسيالىق ساياساتتىڭ نەگىزگى مىندەتى اگروونەركاسىپتىك كەشەندى بارىنشا ءتيىمدى دامىتۋ ءۇشىن ىشكى جانە سىرتقى قاراجاتتى تارتۋدا قولايلى جاعداي جاساۋ ەكەنىن ايتتى. قازىرگى قولدانىستاعى اگرارلىق سەكتوردىڭ زاڭنامالىق بازاسى الەمدىك نارىقتىق ەكونوميكا تالاپتارىنا ساي كەلەدى جانە ءبىرىنشى كەزەكتە, كاسىپكەرلىكتى قولداۋ مەن قورعاۋعا باعىتتالعان. بۇل «Doing Business» رەيتينگتەرىمەن دالەلدەنگەن.
«مەملەكەت باسشىسى نۇرسۇلتان نازارباەۆ قازاقستان حالقىنا جولداۋىندا اگرارلىق سەكتور ەل ەكونوميكاسىنىڭ جاڭا درايۆەرى بولۋى ءتيىس ەكەنىن جەتكىزدى. وسى ماقساتتا 2017-2021 جىلدارعا ارنالعان اگروونەركاسىپتىك كەشەندى دامىتۋدىڭ مەملەكەتتىك باعدارلاماسى قابىلداندى. وعان ساي نەگىزگى باسىمدىق باسەكەگە قابىلەتتى ءارى نارىقتا سۇرانىسقا يە بولاتىن اۋىلشارۋاشىلىق ونىمدەرىن وندىرۋگە بەرىلمەك. «قازاگرو» حولدينگىنىڭ كرەديتتىك جانە ينۆەستيتسيالىق ساياساتى سالانىڭ بارلىق ماقساتتارى مەن مىندەتتەرىن ەسكەرە وتىرىپ تۇزەتىلگەن. بۇدان وزگە, ۇكىمەت ينۆەستيتسيالىق احۋالدى جاقسارتۋ ماقساتىندا ەكونوميكالىق ىنتىماقتاستىق جانە دامۋ ۇيىمىنىڭ تالاپتارىنا ساي كەلەتىن جوسپار قابىلداعان. حولدينگ وسىنى ورىنداۋ ءۇشىن بيىل ينۆەستيتسيالار تارتۋ ستراتەگياسىن بەكىتىپ, سول بويىنشا اقپاراتتىق-يميدجدىك شارالاردى وتكىزبەك», دەدى گۇلناز تورەحانقىزى.
اگروونەركاسىپتىك كەشەندى دامىتۋعا باعىتتالعان مەملەكەتتىك مىندەتتەردى ىسكە اسىرۋ ءۇشىن «قازاگرو» بۇل سالاعا ينۆەستيتسيالاردى كوپتەپ تارتۋدا اۋقىمدى جۇمىس جاساۋدا. حولدينگتىڭ ينۆەستيتسيالىق باعدارلامالارىن قارجىلاندىرۋدىڭ نەگىزگى كوزدەرى – ىشكى جانە سىرتقى كاپيتال نارىقتارىنان تارتىلعان قاراجات. سپيكەردىڭ ايتۋىنشا, قازاقستاننىڭ اۋىل شارۋاشىلىعى سەكتورىن دامىتۋ ءۇشىن «قازاگرو» حولدينگىنىڭ ەنشىلەس كومپانيالارى دا شەتەلدىك كاپيتالداردى تارتۋ ءۇشىن بارىن سالۋدا. وسىنىڭ ناتيجەسىندە سوڭعى بەس جىلدا سالاعا جالپى كولەمى 375 ميلليارد تەڭگەدەن اساتىن شەتەلدىك ينۆەستيتسيا قۇيىلعان.
«قازىرگى تاڭدا ون جىلعا 100 ميلليون ەۋرو الۋ ءۇشىن ەۋروپالىق ينۆەستيتسيالىق بانكپەن كەلىسسوز جۇرگىزىلۋدە. بۇل قارجى ەلىمىزدەگى اگرارلىق سەكتوردا كليماتتىڭ وزگەرۋى مەن ونىڭ زارداپتارىن جەڭىلدەۋگە, اۋىلدىق شاعىن جانە ورتا كاسىپورىنداردى دامىتۋعا جانە جەكە كاسىپكەرلىك سۋبەكتىلەرىنىڭ كىشى جانە ورتا جوبالارىن جۇزەگە اسىرۋعا جاردەمدەسۋگە جۇمسالماق», دەدى باسقارما توراعاسىنىڭ ورىنباسارى.
اگروونەركاسىپتىك كەشەنگە تىكەلەي ينۆەستيتسيا تارتۋدىڭ ءبىر ءتۇرى تىكەلەي ينۆەستيتسيالىق قورلار دەسەك, باستاپقى كاپيتالداندىرۋ 40 ميلليون دوللاردى قۇرايتىن بىرلەسكەن قازاق-ۆەنگر تىكەلەي ينۆەستيتسيالىق قورى بۇل باعىتتاعى تۇڭعىش باستاما بولىپ تابىلادى. گۇلناز اتامقۇلوۆانىڭ ايتۋىنشا, قوسىمشا ينۆەستورلار تارتۋ ارقىلى قوردىڭ كاپيتالدانۋىن 150 ميلليون دوللارعا دەيىن ۇلعايتۋ جوسپارلانۋدا. «بۇل قور اوك-ءتىڭ ىسكە اسقان, بىراق قازىرگى تاڭدا قارجى تاپشىلىعىن تارتىپ وتىرعان جوبالارىن دامىتۋدى, مال, قۇس, جەمىس-كوكونىس, بالىق شارۋاشىلىعى, ءسۇت ءوندىرىسى, ءداندى جانە مايلى داقىلداردى, اۋىلشارۋاشىلىق تەحنيكاسىن قۇراستىرۋ باعىتىنداعى جاڭا جوبالاردى قارجىلاندىرۋدى كوزدەيدى. سونىمەن قاتار تەحنولوگيالاردىڭ ترانسفەرتى مەن جوبالاردىڭ مەنەدجمەنت ساپاسىن جەتىلدىرۋگە قىزمەت ەتەدى», دەگەن ول تىكەلەي ينۆەستيتسيالىق قور اياسىندا اقمولا وبلىسىندا تاۋارلى ءسۇت فەرماسى مەن مينەرالدى تىڭايتقىشتار زاۋىتى جوبالارى قاراستىرىلعانىن مالىمدەدى.
«قازاگرو» ۇلتتىق حولدينگى» اق باسقارما توراعاسىنىڭ ورىنباسارى «AgroInvest Forum 2017» فورۋمى جايىندا اڭگىمەلەپ, وعان ازيا دامۋ بانكى, ازىق-ت ۇلىك قاۋىپسىزدىگى جونىندەگى يسلام ۇيىمى, يسلام دامۋ بانكى, حالىقارالىق ەلەكتروندى ساۋدا الاڭىنىڭ جانە تاعى باسقا ۇيىمداردىڭ وكىلدەرى قاتىساتىنىن ايتتى. شارادا قازاقستاندىق وندىرۋشىلەر اگروجوبالاردى ىسكە اسىرۋ مەن ينۆەستورلارمەن جۇمىس ىستەۋ تاجىريبەلەرىمەن بولىسەدى ەكەن. سودان كەيىن قازاق-ۆەنگر قورىنىڭ اقتوبە وبلىسىنداعى جىلىجاي كەشەنى جوباسىن ىسكە اسىرۋ بويىنشا العاشقى كەلىسىم بەكىتىلەدى.
اسحات رايقۇل,
«ەگەمەن قازاقستان»
