اتىراۋدا اي-كۇنى جەتكەن ءار بەسىنشى ايەل بالاسىن كەسۋ تىلىگى ارقىلى ومىرگە اكەلەدى. ءتىپتى قازىر تولعاقتىڭ ازابىن اۋىرسىنىپ, وتا جاساتۋدى سۇرايتىن انالار قاتارى كوبەيدى. «ايەل دەنساۋلىعى ءۇشىن كەسۋ تىلىگىنىڭ كەسىرى كوپ» دەيدى دارىگەرلەر. وتكەن جىلى وڭىردە بەس انا ءولىمى تىركەلدى. ال بيىلعى 5 شىلدەدە جاس انا كەسار تىلىگى ارقىلى ەگىز بالاسىن دۇنيەگە اكەلىپ, جەتى ساعاتتان سوڭ كوز جۇمدى. ول بۇعان دەيىن دە ءۇش بالاسىن «پىشاققا ءتۇسىپ» بوسانعان. وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاۋىنشا, قازىر انا ولىمىنە بايلانىستى قىلمىستىق كودەكستىڭ 317-بابى 3-بولىگىمەن سوتقا دەيىنگى تەرگەۋ-تەكسەرۋ ءجۇرىپ جاتىر. قايعىلى جاعداي دارىگەرلەردىڭ سالعىرتتىعىنان با, الدە باسقا سەبەپ بولدى ما, ونى تەكسەرۋ انىقتايدى.
وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆا قاۋىپتى جۇكتىلىك پەن انا مەن بالا ءولىمى كورسەتكىشى جوعارى بولىپ تۇرعانىن ايتادى. جىل باسىنان بەرى 7818 انا ومىرگە ءسابي اكەلگەن. سوڭعى جىلدارى ۋاقىتىنا جەتپەي بوسانۋ دەرەكتەرى كوبەيىپ تۇر. بيىلدىڭ وزىندە 492 بالا شالا تۋعان. مەديتسينا دامىپ, ادامداردىڭ دەنساۋلىق ساقتاۋ تۋرالى اقپاراتى مولايعانىمەن, ءالى كۇنگە دەيىن دارىگەرگە كورىنۋدى كەيىنگە قالدىرا بەرەتىندە ازايار ەمەس. «جۇكتىلىك كەزىندە مەديتسينالىق تەكسەرۋدەن وتپەيتىندەر بار. ناقتى مالىمەت بويىنشا, ەلۋ جۇكتى ايەلدىڭ ەش جەردە تىركەلمەگەنى بەلگىلى بولدى», دەيدى دەنساۋلىق ساقتاۋ باسقارماسىنىڭ باسشىسى.
وبلىس اكىمى نۇرلان نوعاەۆتىڭ توراعالىعىمەن وتكەن ۇيلەستىرۋ كەڭەسىندە وسى ماسەلەگە قاتىستى تاعى ءبىر جايت ايتىلدى. قازىر ەل دارىگەردەن بۇرىن بالگەرلەر مەن تاۋىپتەرگە كوبىرەك سەنەدى. مىسالى, ماحامبەت اۋدانىنىڭ تۇرعىنى – جۇكتى ايەل قالقانشا بەزى اۋىراتىنىن بىلە تۇرا, ەمحاناعا ەسەپكە تۇرماعان. ىزدەپ بارعان دارىگەرلەرگە دە كورىنۋدەن قاشىپتى. تۋىستارىنان بەلگىلى بولعانداي, ول قۇلسارى قالاسىنداعى ءبىر ەمشىگە قارالعان جانە سونىڭ عانا ايتقاندارىن ىستەپ, ءدارى قابىلداماعان. سونىڭ سالدارىنان مەرزىمىنەن بۇرىن بوسانىپ, ومىرگە شالا نارەستە اكەلدى. دارىگەرلەر بالانىڭ جاعدايى ناشار ەكەنىن ايتادى. وكىنىشتىسى سول, مۇنداي دەرەكتەر ەل اراسىندا از كەزدەسپەيدى. بۇعان دەيىن دە تاۋىپكە كورىنەمىن دەپ اجال قۇشقان ماحامبەت اۋدانىنىڭ تۇرعىنى تۋرالى ايتىلعان بولاتىن. وسى جايتتى قاپەرگە العان ايماق باسشىسى قۇزىرلى ورگاندارعا ليتسەنزياسى جوق باقسى-بالگەرلەرگە شارا قولدانۋ قاجەتتىگىن تاپسىردى.
باقىتگۇل باباش,
«ەگەمەن قازاقستان»
اتىراۋ
