ولار قاراتوبە اۋداندىق ىشكى ساياسات ءبولىمىنىڭ باستاماسىمەن, اۋداندىق «مۇحيت جاستارى» جقب-نىڭ قولداۋىمەن ەلوردادا بەس كۇندەي بولىپ, ارۋ قالانىڭ تاڭعاجايىپ كورىنىسىنە كۋا بولدى. قوناقتار اراسىندا اۋدانىمىزدىڭ الەۋمەتتىك-ەكونوميكالىق دامۋىنا سۇبەلى ۇلەس قوسىپ كەلە جاتقان ارداگەر اعالارىمىز, ءبىلىم, مادەنيەت سالاسىنىڭ بىلىكتى ماماندارى, جالىندى جاستار جانە بىرقاتار مەكەمە باسشىلارى مەن اۋىل اكىمدەرى بولدى.
ەكسپو قالاشىعىنداعى تاڭعاجايىپ پاۆيلونداردى, ساۋلەت ونەرىنىڭ ەڭ سوڭعى ۇلگىلەرىمەن سالىنعان اسەم عيماراتتاردى ارالاپ, ەرەكشە ۇلگىدە توپتاستىرىلعان عىلىم مەن تەحنيكانىڭ سوڭعى جاڭالىقتارىمەن تانىستى. شەكسىز قۋانىشقا بولەنگەن قاريالار قىسقا مەرزىم ىشىندە استانا كوركىنە كورىك قوسىپ, ەرەكشە ساۋلەتتەنىپ, دامىپ كەتكەندىگىنە تاڭدانىسىن ءبىلدىردى.
استانادان العان اسەرى جونىندە بايانداعان اۋداندىق ارداگەرلەر كەڭەسى توراعاسىنىڭ ورىنباسارى ەركىنبەك جانىبەكوۆ:
– بۇل ساپار ماعان ەرەكشە اسەر ەتتى. بىرىنشىدەن, ەل يگىلىگى جولىندا قاجىرلى ەڭبەك ەتكەن اعا ۇرپاق وكىلدەرىنە ۇلكەن ءىلتيپات ءبىلدىرىپ, قۇرمەت كورسەتۋ بولسا, ەكىنشىدەن, ەكسپو-2017 كورمەسىندەي ەل ومىرىندەگى ايتۋلى وقيعانى كوزبەن كورۋدىڭ ءساتى ءتۇستى.
مەنىڭ نازارىما باستى نىسان – جەر شارىن بەينەلەيتىن «نۇر-الەم» سفەراسى ءتۇستى. سفەرانىڭ وزەگىندە ءبىزدىڭ ۇلتتىق پاۆيلون ورنالاسقان. وندا قازاقستاندىق عالىمداردىڭ ەڭ وزىق جوبالارى كورسەتىلگەن. وسى كورمەنى تاماشالاپ جۇرگەنىمدە ءوزىمنىڭ قازاق ەكەنىمە, قازاقستاننىڭ ازاماتى ەكەنىمە قۋاندىم, ماقتاندىم! سەبەبى, شەتەلدەردەن كەلگەن قوناقتار ءبىزدىڭ اسەم استانامىزعا, ونداعى ادەمى دە ءزاۋلىم عيماراتتارعا, كورمە قالاشىعىنا تاڭدانىستارىن جاسىرا الماي, تاڭىرقاي قاراپ جاتقان كەزدە بويىمدى ماقتانىش سەزىمى بيلەدى. وسىنىڭ ءبارى, ارينە, ەلدەگى تۇراقتىلىقتىڭ, ەلباسىمىزدىڭ كورەگەن ساياساتىنىڭ ارقاسى.
الداعى ۋاقىتتا ەكسپو كورمەسىن تاماشالاۋعا اۋدانىمىزدىڭ بىرقاتار ەڭبەك ادامدارى بارادى دەپ جوسپارلانۋدا.
مارالبەك امانتاەۆ,
باتىس قازاقستان وبلىسى
