1976 جىلدان باستاپ بىرىككەن ۇلتتار ۇيىمىنا مۇشەلىككە وتكەن. سوڭعى جىلدارى قازاقستان مەن ساموا مەملەكەتى اراسىندا ەكىجاقتى قارىم-قاتىناس نىعايىپ كەلەدى. اتاپ ايتار بولساق, 2013 جىلدىڭ 7 اقپانىندا نيۋ-يورك قالاسىندا مەملەكەتارالىق بىرلەسكەن كومميۋنيكەگە قول قويىلىپ, ديپلوماتيالىق قاتىناس ورناعان بولاتىن. سونىڭ ناتيجەسىندە بۇگىن ساموالىقتار ارقا تورىندە كەڭ كوسىلىپ, كورىكتى كورمەنىڭ ءسانىن كەلتىرگەن قۇرمەتتى قوناق رەتىندە قابىلداندى.
رەسمي شارانىڭ اشىلۋ سالتاناتى قازاقستان جانە ساموا ەلدەرىنىڭ مەملەكەتتىك گيمندەر الما-كەزەك شىرقالۋمەن باستالىپ, كورمەنى ۇيىمداستىرۋشى ەل رەتىندە العاشقى بەتاشار پىكىر ءبىلدىرۋ مارتەبەسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى ايدا قۇرمانعاليەۆاعا بۇيىردى.
ايدا دادەنقىزى اۋەلى وسىندا جينالعان بارشا جۇرتتى ەكسپو-2017 حالىقارالىق كورمەسى اياسىندا وتكىزىلىپ وتىرعان ساموا مەملەكەتىنىڭ ۇلتتىق كۇنى مەرەكەسىمەن قۇتتىقتاپ, ايشىقتى كورمە بۇرىنعى كەڭەستىك ەلدەر اۋماعىندا قازاقستاننىڭ استاناسىندا العاش رەت وتكىزىلىپ وتىرعانىن, بۇل ءبىز ءۇشىن تەك قۇرمەت قانا ەمەس, جاۋاپتى ميسسيا بولىپ تابىلاتىنىن جەتكىزدى.
«ياعني, مامانداندىرىلعان كورمەنىڭ ۇرانى «بولاشاقتىڭ ەنەرگياسى» اتالىپ, بالامالى قۋات كوزدەرىن قولدانۋدى اۋقىمدى تۇردە كەڭەيتۋگە نەگىز بولاتىن ەكونوميكالىق دامۋدىڭ جاھاندىق تۇعىرىنا تولىققاندى ساي كەلەدى. ءبىزدىڭ كورمە دۇنيەگە دەگەن زاماناۋي كوزقاراستىڭ, تازا جاھاندىق ەنەرگەتيكانىڭ دامۋ يدەيالارىن جەتىلدىرۋدىڭ جاڭا پاراعىن اشاتىنىنا سەنىمدىمىن. ءار ەلدىڭ ەنەرگەتيكا سالاسىنداعى نوۋ-حاۋ تانىستىرىلىمىنان بولەك كورمە اياسىندا ءىرى حالىقارالىق ءىس-شارالار ۇيىمداستىرىلۋدا. قازاقستاننىڭ ەلورداسى تورتكۇل دۇنيەنىڭ ءتۇرلى ۇلتتىق كۇندەرىنە كۋا بولىپ وتىر. كۇن سايىن كورمە اۋماعىندا قاتىسۋشى مەملەكەتتەردىڭ ۇلتتىق كۇندەرى, حالىقارالىق ۇيىمداردىڭ تاقىرىپتىق جيىندارى جانە سان ءتۇرلى مادەني ويىن-ساۋىق ءھام سپورتتىق ءىس-شارالار وتكىزىلۋدە. سونىڭ ءبىرى بۇگىنگى ساموا مەملەكەتىنىڭ ۇلتتىق پاۆيلونىنىڭ اشىلۋى. ۇلتتىق كۇندەر كورمەگە قاتىسۋشى مەملەكەتتەردىڭ اراسىنداعى قارىم-قاتىناستى نىعايتۋعا جاردەمدەسەتىن حالىقارالىق مادەنيەت الماسۋ قۇرالى بولىپ تابىلادى ءارى قاتىسۋشىلارعا ۇلتتىق مادەنيەتتىڭ, ءومىر سالتىنىڭ ۇزدىك ۇلگىلەرىن پاش ەتۋگە مۇمكىندىك بەرەدى. ءبىز ءوز كەزەگىمىزدە قازاقستان ەكونوميكانىڭ ءتۇرلى سالالارىندا, سونىڭ ىشىندە ەڭبەك جانە حالىقتى الەۋمەتتىك قورعاۋ سالاسىنداعى حالىقارالىق تاجىريبە مەن الەمنىڭ ۇزدىك ۇردىستەرىن زەردەلەۋگە مۇددەلى ەكەنىن مالىمدەيمىن. ساموا ەلىنىڭ مۇنداعى وكىلدەرىن مەرەكەسىمەن قۇتتىقتايمىن», دەدى ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى.
ودان كەيىن ەكىنشى تاراپتىڭ وكىلى رەتىندە ءسوز العان ساموا تاۋەلسىز مەملەكەتى قارجى ءمينيسترىنىڭ ورىنباسارى مۋليپولا لەياتاۋا لاكي مۋليپولا مىرزا اتالمىش كورمەگە ءوز ەلىنىڭ جەكە-دارا مەملەكەت رەتىندە قاتىسىپ وتىرۋى زور مارتەبە ەكەنىن ماقتانىشپەن جەتكىزىپ, تولقىعان كوك تەڭىزدىڭ تەرەڭ تۇكپىرىندە تىپ-تىنىش جاتقان ساموالىقتار اتىنان بارلىق قازاقستاندىقتارعا جانە ەلباسىنا, ۇكىمەت مۇشەلەرىنە العىسىمدى بىلدىرەمىن. جانە الەمدىك ساياسي قاۋىمداستىقتار تاراپىنان قازاقستانعا قاراتا ايتىلىپ جاتقان ماداق-ماقتاۋلار مەن رەسمي مويىنداۋلارعا تولىق قوسىلامىن. قازىرگى تاڭدا كۇللى الەم حالقى تابيعي رەسۋرستاردىڭ جەتىسپەۋشىلىگىنە ۇشىراي باستادى. كەيبىر مەملەكەتتەر قازىردىڭ وزىندە تىعىرىققا تىرەلۋ ۇستىندە. ادامداردىڭ ەنەرگيانى شەكتەن تىس باقىلاۋسىز پايدالانۋىنان جاھاندىق داعدارىس ءورشىپ كەلە جاتىر. ەگەر دە ەنەرگيا ماسەلەسىن اركەز رەتتەپ وتىرماسا, قورشاعان ورتانىڭ ءجونسىز لاستانۋى, كليماتتىق وزگەرىستەردىڭ جەدەل قۇبىلمالى كۇيگە ۇشىراۋى, ەكولوگيالىق ارىلماس قاتەلىكتەردىڭ ورىن الۋىنا اسەر ەتەرى ءسوزسىز, دەگەندى ايتتى.
سونىمەن قاتار, مۋليپولا مىرزا: «الداعى ۋاقىتتا الەم تۇرعىندارىنىڭ جاسىل ەنەرگياعا دەگەن سۇرانىسى ارتادى. ءبىز سياقتى تىنىق مۇحيتى ايماعى ەلدەرى جاسىل جانە جاڭعىرمالى ەنەرگيا كوزدەرىن پايدالانۋدى قولدايمىز. ەنەرگياعا دەگەن سۇرانىس پەن ونى ءوندىرۋ ءىسىن رەتتەمەسە كۇيزەلىستىڭ پايدا بولۋ ىقتيمالدىعى ارتادى. بارلىعىمىز ءبىر جەڭنەن قول, ءبىر جاعادان باس شىعارا وتىرىپ, ەنەرگيا كوزدەرىنە قاتىستى ماسەلەنى شەشۋ بارىسىندا ورنىقتى جانە بەرىك ارىپتەستىك قۇرۋدى قولعا العانىمىز ابزال. سونداي-اق, بارىنشا قورشاعان ورتانىڭ تازالىعىن ساقتاۋ, جاسىل ەنەرگيا كوزدەرىن دۇرىس پايدالانۋدى ىنتالاندىرۋ كەرەك», دەپ ءسوزىن تۇجىرىمدادى.
شارا سوڭىندا جينالعان كوپشىلىك ساموالىقتاردىڭ ۇلتتىق بي ونەرىن تاماشالاپ, جىلى رايلى ولكەدە ونگەن ۇلتتىڭ وزىندىك سيپاتىنا قانىقتى.
بەكەن قايرات ۇلى,
«ەگەمەن قازاقستان»
سۋرەتتەردى تۇسىرگەن,
ورىنباي بالمۇرات,
«ەگەمەن قازاقستان»
