بۇعان دەيىن كوپشىلىك اقيىق اقىننىڭ ءومىرى مەن شىعارماشىلىعىنا قاتىستى كوشىرمە ماتەريالدارمەن عانا تانىسىپ كەلسە, بۇل جاڭالىق كەلەسى جىلى كەڭىنەن اتاپ وتىلەتىن 125 جىلدىعىنا ۇلكەن تارتۋ بولماق.
باق وكىلدەرىمەن جۇرەك جاردى قۋانىشتى بولىسكەن مۇراعاتتىڭ ديرەكتورى ساۋلە مالىكوۆانىڭ ايتۋىنشا 1922 جىلدارى ماعجان اقمولا گۋبەرنياسىنىڭ اشتىقپەن كۇرەس جونىندەگى كوميتەتىن باسقارعان. ول اۋىلداردى ارالاپ, قازاقتاردىڭ اۋىر حالىمەن, ازاپتى تۇرمىسىمەن تانىسقاننان كەيىن كورگەن-بىلگەندەرىن ەسەپتى بايانداماعا ارقاۋ ەتىپ, ءتيىستى ورىنداردى حاباردار ەتكەن. ايىرتاۋ, مەزگىل بولىستارىندا تۇراتىن قازاقتاردىڭ دالا جيدەكتەرىن عانا تالعاجۋ ەتىپ وتىرعانىن, ابدەن السىرەپ, ءتۇرلى ىندەت اۋرۋلار جايلاي باستاعانىن اشىپ ايتقان. مۇنىمەن شەكتەلىپ قالماي, كوزى اشىق ازاماتتار مەن داۋلەتتى جانداردى جۇمىلدىرا وتىرىپ ارنايى قور قۇرعان. ء سويتىپ, تالاي ادامداردى اشتىق قۇرساۋىنان قۇتقارۋعا تىكەلەي جاردەمدەسكەن. كوكشەتاۋدا جەتىم بالالار ءۇيىن اشۋعا ىقپال ەتكەن.
ورىس تىلىندە جازىلعان ەكى بەتتىك ەسەپتى باياندامادا سول كەزدەگى اششى شىندىق جايلى كوپتەگەن دەرەكتەر كەلتىرىلگەن. ۇلت جاناشىرىنىڭ اشىققاندارعا كومەك بەرۋ ماقساتىمەن اقمولا گۋبەرنياسى توتەنشە جاعدايلار كوميسسياسى توراعاسىنىڭ ورىنباسارى رەتىندە پەتروپاۆل جانە كوكشەتاۋ ۋەزدەرىنە ىسساپارعا جىبەرىلگەنىن ايعاقتايتىن ماندات بەرىلگەنىن ەسكەرسەك, تۇپنۇسقا ماقالا اقىننىڭ ءوز قولىمەن جازىلعانى ەش تالاس تۋدىرمايدى. كەيىن اشتىقتىڭ اۋىر زارداپتارى جايلى جەرگىلىكتى «مير ترۋدا» گازەتىنە كولەمدى ماقالا جاريالاعان.
مۇراعات ماماندارى «ەكسپو-2017» حالىقارالىق مامانداندىرىلعان كورمە شەڭبەرىندە وتەتىن وبلىستىڭ مادەنيەت كۇندەرى بارىسىندا تاريحي ماڭىزى ولشەۋسىز قۇجاتتى رەسپۋبليكا تۇرعىندارىنىڭ نازارىنا ۇسىنۋدى ماقسات ەتىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
