«ەلگە ەل قوسىلسا − قۇت» دەمەكشى, التايداعى اعايىن الاتاۋ باۋرايىنان كەلگەن قوس وتباسىن جىلى راۋىشپەن قۇشاق جايا قارسى الدى. «التاي دەگەن قاسيەتتى جەر عوي. مۇندا كوشىپ كەلگەنىمىزگە قۋانىشتىمىز. قولىمدا ەكى ۇلىم بار. جۇمىس جاعى جۋىق ارادا شەشىلىپ قالاتىن شىعار دەپ ءۇمىت ەتىپ وتىرمىز. ەلدىڭ ءىشى عوي», دەيدى وسىدان ءبىر ايدان استام ۋاقىت بۇرىن الماتى وبلىسىنىڭ ەسكەلدى اۋىلىنان كوشىپ كەلگەن كاكەن شەري.
قوس وتباسى دا قازىر مەملەكەتتەن كومەك الۋ ءۇشىن قۇجاتتارىن جيناستىرىپ جاتقان كورىنەدى. قىتايدىڭ التايىندا دۇنيەگە كەلگەن, اتاجۇرتقا ورالعانىنا 13 جىلعا جۋىقتاعان كاكەن شەري قۇجات جاعى رەتتەلگەنشە قول قۋسىرىپ قاراپ وتىرمايىق دەپ ۇلدارىمەن بىرگە جول شەتىنە كيىز ءۇي تىگىپ, وتكەن-كەتكەن جولاۋشىلارعا قىمىز ساتۋدى قولعا الىپتى. الداعى ۋاقىتتا كيىز ءۇي ىشىنەن شايحانا اشىپ, اۋدانداعى ءتۋريزمنىڭ دامۋىنا ۇلەس قوسپاق ويى بار. ء«وزىم بالالىق شاعىمدى وتكەرگەن, ءوسىپ-ونگەن قىتايدىڭ بۋىرشىن اۋدانىندا تۋريزم جاقسى دامىعان. ايگىلى قاناس كولى دە سول ماڭدا. مۇندا جىلىنا 20 مىڭ تۋريست كەلەدى. جولدىڭ بويى قۇجىناعان حالىق. بيە بايلايدى, ۇلتتىق بۇيىمدار ساتادى, ۇلتتىق تاعامدار ازىرلەيدى. كاتونقاراعايدىڭ تابيعاتى ول جەردەن اسىپ تۇسپەسە كەم ەمەس. بۇل جەرگە دە جىلىنا جيىرما مىڭ ادام كەلىپ تۇرسا اۋدان بيۋدجەتىنە سالىق تۇسەر ەدى عوي. كورگەنىمدى ايتىپ وتىرمىن. سول جاقتان كەلدىم عوي. كاتونقاراعايدىڭ شەكاراعا تاقاۋ اۋىلدارىندا حالىق سانى ازايىپ بارادى دەپ ەستيمىن. تۇسىنبەيمىن, مىناداي جەردى قالاي تاستاپ كەتۋگە بولادى؟ باتىستان, باسقا ەلدەردەن قانشاما ادام وسى التايدىڭ ءبىر جۇتىم اۋاسىن جۇتۋعا زار بولىپ كەلىپ جاتقان جوق پا؟ ءومىر سۇرگەننەن كەيىن وسىنداي جەردە ءسۇرۋ كەرەك قوي. قىسى بولماسا, التاي عاجاپ جەر عوي», دەيدى ول.
جەتىسۋدان كوشىپ كەلگەن ەكىنشى وتباسىنىڭ 5 بالاسى بار ەكەن. سونىڭ ۇشەۋى مەكتەپ جاسىندا كورىنەدى. جاستارىنان جاسامىسى كوپ, شەكارا شەبىندەگى بەلقاراعاي اۋىلىنىڭ تۇرعىندارى ەلدى مەكەندەگى ءبىلىم ورداسىنىڭ ءۇش وقۋشىمەن تولىعاتىنىن جاقسىلىققا بالاپ وتىر. وتاعاسى ايدىنبەك جىلاي قىتايدا مال دارىگەرى بولىپ ەڭبەك ەتىپتى. ء«بىز دە قىتايدىڭ التايىندا تۇرعانبىز. شىنىن ايتقاندا, جەتىسۋدىڭ اۋا رايىنا ۇيرەنە المادىق. تاۋدا تۋىپ, تاۋدا وسكەنبىز عوي. بىزگە وسىنداي تابيعات ۇنايدى», دەيدى بەس بالانىڭ اكەسى.
بەلقاراعايعا قونىس اۋدارعان تۇرعىنداردىڭ جاعدايىمەن بىزبەن بىرگە تانىسقان كاتونقاراعاي اۋدانى اكىمىنىڭ ورىنباسارى رەنات قۇرمامباەۆ قوس وتباسىنىڭ ءار مۇشەسىنە مەملەكەت تاراپىنان 70 مىڭ تەڭگە كولەمىندە قارجىلاي كومەك كورسەتىلەتىنىن, بۇل جەردە قانداي كاسىپپەن شۇعىلدانۋعا بولاتىندىعىن ايتىپ, ءوزىنىڭ اقىل-كەڭەستەرىن بەردى. ء«بىز سىزدەرگە جۇمىس تاۋىپ بەرۋگە جاردەمدەسەمىز. كاتونقاراعايعا كەلىمدى-كەتىمدى كىسى كوپ. سوندىقتان كيىز ءۇي تىگىپ, تۋريزم سالاسىن وركەندەتپەك ويلارىڭىزدى قۇپتايمىز. قىمىزدان بولەك, ۇلتتىق بۇيىمدار جاساپ, تۋريستەرگە ساتۋلارىڭىزعا دا بولادى», – دەگەن اۋدان اكىمىنىڭ ورىنباسارى مەملەكەتتىڭ كومەگىمەن ءبىر اي تەگىن وقىپ, جاڭا ماماندىق يگەرۋگە دە بولاتىنىن جەتكىزدى. وعان مۇمكىندىك بار. قازىرگى ۋاقىتتا وبلىس ورتالىعى – وسكەمەننەن ارنايى كەلگەن ماماندار كاسىپ اشقىسى, مال بورداقىلاۋ الاڭدارىن قۇرعىسى كەلەتىن ازاماتتارعا قۇجات رەسىمدەۋ, نەسيە الۋ, كەپىلدىك قويۋ ماسەلەلەرىن جان-جاقتى ءتۇسىندىرىپ, وقىتىپ جاتىر.
ازامات قاسىم,
«ەگەمەن قازاقستان»
شىعىس قازاقستان وبلىسى,
كاتونقاراعاي اۋدانى
