ەندى دومبىرانى ۇيالى تەلەفونىڭىزدان تارتىپ, ءان شىرقاۋىڭىزعا بولادى. ەگەر ۇيرەنگىڭىزگە كەلسە, تەگىن جۇكتەۋگە دە مۇمكىندىك تۋىپ وتىر. «Apple» كومپانياسى ماقۇلداعان بۇل باعدارلامانىڭ اۆتورى – وڭتۇستىكقازاقستاندىق ىT مامان نۇرلان قامبار. ونەرتاپقىش جىگىت اتالعان باعدارلامانى جۋىردا عانا اقش-تاعى «Apple» كومپانياسىنا ماقۇلداتىپ, اۆتورلىق قۇقىق يەسى اتاندى.
بۇگىندە نۇرلان باۋىرجان ۇلى الماتىداعى سۇلەيمەن دەميرەل اتىنداعى ۋنيۆەرسيتەتتىڭ اقپاراتتىق جۇيەلەر ماماندىعىنىڭ 2 كۋرسىندا وقيدى. جاستايىنان وقۋدا وزات بولىپ, زەيىنى زەرەك وسكەن نۇرلاننىڭ الداعى ارمانى – اتاقتى ءىT مامان اتانۋ.
دومبىرانىڭ ەلەكتروندى نۇسقاسىن ويلاپ تاپقان 20 جاسار جىگىتكە بۇل يدەيا استاناداعى ەكسپو كورمەسىنە بارعاندا كەلىپتى. نۇرلاننىڭ بۇل يدەياسىن ىسكە اسىرۋعا بەلگىلى IT مامان ارمان سۇلەيمەنوۆ اقىل-كەڭەس بەرىپتى.
«قازىرگى تاڭدا قازاق جاستارى جاڭاشىلدىققا ۇمتىلىپ, جاڭا تەحنولوگيالاردى يگەرۋگە كۇش سالىپ جاتىر. سولاردىڭ ءبىرى رەتىندە مەن دە ءوز باعىمدى سىناپ كورۋدى ءجون ساناپ, العاشقى ەڭبەگىمدى جۇزەگە اسىرۋعا تىرىستىم. بۇل باعدارلامانىڭ ءبىر ەرەكشەلىگى – دومبىرا ۇيرەنۋگە ءارى دومبىرا جوق جەردە ۇيالى تەلەفوننان كۇي نەمەسە ءان تارتۋعا مۇمكىندىك بەرەدى. اتالعان باعدارلامانى سىلتەمە ارقىلى تەگىن جۇكتەپ الۋىڭىزعا بولادى», - دەيدى ونەرتاپقىش. بۇگىندە ول جازعى دەمالىس كەزەڭىن پايدالانىپ استانا قالاسىنداعى نازارباەۆ ۋنيۆەرسيتەتىندەگى ءىT مامانداردان ارنايى ساباق الىپ ءجۇر.
